Ovafilippi 1:1-30
1 Ame Paulus naTimoteus, tu li ovapiya vaKristus Jesus, ohatu shangele ovayapuki vomuFilippi, ovo ve li ovahongwa vaKristus Jesus, nosho yo ovakulunhuongalo novayakuliongalo:
2 Efilonghenda nombili yaKalunga Tate yetu noyOmwene Jesus Kristus nai kale pamwe nanye.
3 Ohandi pandula alushe Kalunga ngeenge handi mu tumbula
4 momailikano ange aeshe, nohandi ilikana nehafo linene,
5 molwaashi ohamu yambidida onghundana iwa* okudja kefiku olo mwe i tambula ko fiyo opaife.
6 Onde lineekela kutya Kalunga ote ke mu kwafela mu manife oshilonga shiwa osho a hovela mokati keni fiyo okefiku laKristus Jesus.
7 Ondi wete sha yuka okudiladila ngaho kombinga yeni, molwaashi onda kala ndi mu hole amushe nomutima aushe nye ovo mwa kala tamu yambidida nge eshi ndi li modolongo naashi handi popi novapangeli, opo ndi dule okupopila paveta onghundana iwa.
8 Kalunga oku shi shii kutya onde mu djuulukwa amushe, nondi mu hole unene ngaashi Kristus Jesus e mu hole.
9 Ohandi ilikana opo ohole yeni i hapupale nomu kale mu na eshiivo lashili, eendunge dokuyoolola,
10 mu shiive oinima oyo ya fimanenena nomu kale mwa koshoka, opo muha pundukife vamwe fiyo okefiku laKristus.
11 Kungaho, otamu ka mona oshiimati shouyuki okupitila muJesus Kristus, opo Kalunga a fimanekwe noku hambelelwe.
12 Ovamwatate, onda hala mu shiive kutya onghalo yange oye shi ningifa tashi shiiva, opo onghundana iwa i tandavele,
13 nokutulwa kwange modolongo omolwaKristus ku shiivike apeshe mokati ketangakwaita lohamba yaRoma nokovanhu aveshe.
14 Eshi ovamwatate vahapu ovo tava longele Omwene va uda kutya onda tulwa modolongo, oshe va pameka nova kala tava udifa nouladi eendjovo daKalunga nopehe na oumbada.
15 Nonande ovanhu vamwe otava udifa kombinga yaKristus nehalo liwa, vamwe otave shi ningi omolwondubo nokulihalela komesho.
16 Ovo tava udifa nehalo liwa otave shi ningi omolwohole yaKristus, osheshi ove shi shii kutya onda hoololwa ndi popile onghundana iwa.
17 Ndele ovo tava udifa omolwondubo otave shi ningi, opo va etife po omapataneko, ashike itave shi ningi nehalo liwa, osheshi ova hala okweetela nge omaudjuu eshi ndi li modolongo.
18 Osha etifa oidjemo ilipi? Kashi na nee mbudi kutya ovanhu otava udifa nehalo liwa ile hasho, onghundana iwa kombinga yaKristus otai udifwa, naasho ohashi etele nge ehafo. Onghee ohandi twikile okukala nda hafa,
19 osheshi ondi shi shii kutya ohandi ka xupifwa omolwomaindilo eni nokekwafo lomhepo iyapuki oyo twa pewa kuJesus Kristus.
20 Osho oshi li metwokumwe naasho nda kala nda teelela nonde lineekela kutya itandi ka fifwa ohoni nandenande. Ndele omolwemanguluko lange lokupopya, ohandi fimanekifa Kristus paife, ngaashi handi ningi nale. Ota ka fimanekifwa okupitila mwaame,* kutya nee ondi na omwenyo ile onda fya.
21 Fimbo ndi li momwenyo, ohandi hopaenene Kristus, nongeenge onda fi, ohandi ka mona ondjabi.
22 Ndele ngeenge onda twikile okukala nomwenyo pambelela, ohandi longo shihapu omolwaKristus. Onghee itandi popi kutya ohandi hoolola po shike.
23 Oinima oyo ivali oya limbililika nge, osheshi onda hala okumangululwa noku ka kala pamwe naKristus; kwaame osho osho sha denga mbada.
24 Mepingafano naasho, ondi wete yo sha fimana okukala nomwenyo pambelela omolwouwa weni.
25 Ndele ondi na elineekelo nondi shi shii kutya ohandi twikile okukala nomwenyo pamwe nanye amushe, opo mu ninge exumokomesho nomu kale mwa hafa nomu na eitavelo.
26 Opo eshi handi ka alukila kunye, ehafo leni otali hapupala molwaashi omu li ovashikuli vaKristus Jesus.
27 Kaleni hamu lihumbata metwokumwe nonghundana iwa i na sha naKristus, opo ngeenge onde uya oku mu talela po ile onda kala inandi uya, otamu kala mwa pama, mwa hangana,* mu na ediladilo limwe* notamu ka kala neitavelo la kola monghundana iwa,
28 ndele itamu ka tilifwa kovapataneki veni. Osho oshi li oumbangi kuvo nokunye, wa dja kuKalunga, kutya vo otava ka hanaunwa po, ndele nye otamu ka xupifwa.
29 Nye inamu pewa ashike oufembanghenda wokwiitavela muKristus, ndele omu na yo okuhepekwa omolwaye.
30 Osheshi nanye otamu ka shakeneka omaupyakadi a faafana naao nda pita muo nonda taalela natango.
Eshangelo lopedu
^ Ile “ohamu kufa ombinga moku i xumifa komesho.”
^ Ile “molutu lange.”
^ Eln., “mu na omhepo imwe.”
^ Eln., “omwenyo umwe.”
