Ovagalati 1:1-24
1 Ame, omuyapostoli Paulus, inandi nangekwa po kovanhu ile okupitila movanhu, ndele onda nangekwa po kuJesus Kristus nokuKalunga, Tate yetu, oo a nyumuna Jesus koufi,
2 ohandi shangele omaongalo omuGalatia handi shi ningi pamwe novamwatate ovo ndi li navo:
3 Efilonghenda nombili yaKalunga Tate yetu noyOmwene Jesus Kristus nai kale nanye.
4 Kristus okwa yandja omwenyo waye omolwomatimba etu, opo a dule oku tu xupifa mounyuni ou* woukolokoshi, osho shi li metwokumwe nehalo laKalunga, Tate yetu,
5 oo e na okufimanekwa fiyo alushe. Amen.
6 Osha kumwifa nge eshi mwa efa po diva Kalunga oo e mu ifana okupitila mefilonghenda laKristus nomwa tambula ko onghundana imwe oyo tamu diladila kutya oiwa.
7 Osho inashi hala kutya ope na vali onghundana imwe iwa i lili, ndele ope na vamwe va hala okupengifa onghundana iwa i na sha naKristus.
8 Onghee hano, kutya nee oumwe womufye ile omweengeli womeulu te mu udifile onghundana iwa imwe i lili, ihe fi oyo twe mu udifila, na fingwe.
9 Ohandi endulula osho twa popya nale kutya: Keshe oo te mu udifile onghundana iwa imwe i lili, ihe fi oyo mwa tambula ko nale, na fingwe.
10 Mbela ohandi kendabala okuhafifa ovanhu ile oKalunga? Ngeenge ohandi kendabala okuhafifa ovanhu, nghi fi omupiya waKristus.
11 Ovamwatate, onda hala mu shiive kutya, onghundana iwa oyo nde mu udifila inai dja movanhu;
12 inandi i pewa okupitila movanhu noinandi i hongwa kovanhu, ndele onde i hololelwa kuJesus Kristus.
13 Ngaashi mu shi shii, eshi nda li melongelokalunga lOshijuda, onda li handi hepeke neenghono eongalo laKalunga, nonda li nda hala oku li hanauna po.
14 Onda li yo nda ninga exumokomesho melongelokalunga lOshijuda ndi dule vahapu vepupi lange moshiwana shetu, nonda li nda diinina eenghulunghedi dootate.
15 Ndele Kalunga, oo a pitika nge ndi dalwe, okwa ifana nge omolwefilonghenda laye, nokwa hala
16 okuholola Omona waye okupitila mwaame, opo ndi dule okuudifila oiwana imwe onghundana iwa kombinga yaye. Eshi a hoolola nge ndi ninge ngaho, kanda li nda pula omayele kovanhu;*
17 kanda li nda ya kuJerusalem ndi ka pule omayele kwaavo va ninga ovayapostoli tete kwaame, ndele onda li nda ya kuArabia, opo nee onda shuna kuDamaskus.
18 Konima yomido nhatu, onda li nda ya kuJerusalem opo ndi ka talele po Kefas,* nonda kala puye omafiku 15.
19 Ndele kanda li nda mona ko ovayapostoli vamwe vali, kakele kaJakob omumwaina wOmwene.
20 Shi na sha naasho handi mu shangele, ohandi ane koshipala shaKalunga kutya itandi fufya.
21 Konima yaasho, onda li nda ya kuSiria nokuKilikia.
22 Ndele kanda li nda shiivika komudidi kovanhu vomomaongalo opaKriste omuJudea.
23 Ova li ashike hava udu taku ti: “Omulumenhu oo a li he tu hepeke paife ota udifa onghundana iwa kombinga yeitavelo olo a li a hala okuxulifa po.”
24 Onghee ova li va hovela okutanga Kalunga omolwange.
Eshangelo lopedu
^ Ile “monghalelo ei yoinima.” Tala omafatululo oitya.
^ Eln., “kombelela nohonde.”
^ Oo ha ifanwa yo Petrus.
