Ovagalati 4:1-31
4 Ngeenge omufyuululi okaana, nonande oye mwene woinima aishe, ke dule nandenande omupika.
2 Ndele oha kala mepashukilo lovatekuli vaye nolomalenga fiyo osheshi efiku olo la ufwa kuxe la fika.
3 Sha faafana, nafye eshi twa li ounona, otwa li ovapika voinima yomounyuni ou.*
4 Ndele eshi efimbo la fika, Kalunga okwa tuma Omona waye, oo a dalwa komukainhu nokwa li ha wilikwa komhango,
5 a mangulule ovo ve li koshi yomhango, opo tu ninge ovana vaKalunga.
6 Ndele molwaashi paife nye ovana vaKalunga, Kalunga okwa tula omhepo iyapuki momitima detu oyo i li mOmona, nohai tu linyengifa tu tye: “Abba,* Tate!”
7 Onghee kamu fi vali ovapika, ndele ovana vaKalunga; nongeenge omu li ovana vaye, ote ke mu pa efyuululo.
8 Ndele fimbo mwa li inamu shiiva Kalunga, omwa li ovapika voikalunga.
9 Paife eshi mwa shiiva Kalunga ile mwa shiivika kuKalunga, omolwashike mwa hala okushuna mu ka longele nokukala vali ovapika voinima yongaho?
10 Ohamu tale ko omafiku amwe, eemwedi, omafimbo okomudo nomido dimwe da fimana.
11 Ondi wete kutya eenghendabala edi nda ninga opo ndi mu kwafele oda hepa.
12 Ovamwatate, naame onda li nde mu fa, ashike onda ninga omalunduluko. Onghee ohandi mu indile mu ninge omalunduluko. Kamwa li mwa ungaunga naame nai.
13 Omu shi shii kutya eshi nde mu udifila onghundana iwa oshikando shotete, onda li handi vele.
14 Ndele nande ongaho kamwa li mwa tonda nge omolwouvela wange, oo wa li eyeleko kunye, ashike omwa li mwa tambula nge ko ngaashi omweengeli waKalunga, ile ngaashi Kristus Jesus.
15 Omolwashike muhe na vali ehafo olo mwa li mu na nale? Ondi shi shii kutya ngeno onde mu pulile mu kolole mo omesho eni mu a pe nge, ngeno omwe shi ninga.
16 Mbela paife onda ninga omutondi weni eshi nde mu lombwela oshili?
17 Ovanhu ovo kave na ko nasha nanye, ndele otava longo noudiinini opo ve mu pukife. Otave shi ningi molwaashi va hala oku mu amuna ko kwaame opo mu kale kombinga yavo.
18 Oshi li nawa ngeenge umwe te mu itavelifa oshinima shonhumba, shimha ashike te shi ningi netomheno liwa, naasho kashi na ashike okuningwa ngeenge ndi li nanye.
19 Ovamwange, ondi udite ouyahame wa fa oshifeta shokudala omolweni. Nohandi kala ndi udite ngaho fiyo mwa kulika omaukwatya a fa aKristus.
20 Onda hala ashike ngeno ndi uye kunye paife opo ndi popye nanye monghedi imwe i lili, molwaashi kandi shii kutya nandi mu ninge ngahelipi.
21 Lombwelei nge, nye ovo mwa hala okukala koshi yomhango, mbela ohamu dulika ngoo kOmhango?
22 Pashihopaenenwa, omishangwa oda ti kutya Abraham okwa li e na ovanamati vavali, umwe okwa dalwa komupika okakadona, naumwe okwa dalwa komukainhu omumangululwa.
23 Ou a dalwa komupika okakadona okwa dalwa ngaashi ounona vakwao,* naau a dalwa komukainhu omumangululwa okwa dalwa paudaneko.
24 Ehokololo olo oli na eityo lopafaneko; molwaashi ovakainhu otava faneke omahangano opavali; limwe ololo la ningilwa kOmhunda yaSinai, naaveshe ovo ve li mehangano olo ovapika, nehangano olo oli li ngaashi Hagar.
25 Hagar otashi ti Sinai, omhunda i li muArabia, nota faneke Jerusalem shokunena, osho shi li moupika pamwe novana vasho.
26 Jerusalem shopombada oshi li ngaashi meme yetu, noshi li omukainhu omumangululwa.
27 Omishangwa oda ti: “Nyakukwa ove omukainhu ongadji, ove ou iho dala. Hafa nokwiingida pombada, ove ou uhe shii ouyahame woshifeta, osheshi omukainhu oo a haulukwa oku na ounona vahapu e dule omukainhu ou e na omushamane.”
28 Ovamwatate, nanye omwa dalwa okupitila meudaneko, ngaashi Isak.
29 Ndele ngaashi ashike ou a li a dalwa ngaashi ounona vakwao* a li ha hepeke ou a dalwa okupitila momhepo, nanye osho tamu ningilwa paife.
30 Ndele mbela omushangwa owa ti ngahelipi? Owa ti: “Taataa omupika okakadona nomonamati waye, osheshi omona womupika ita ka fyuulula pamwe nomonamati womukainhu omumangululwa.”
31 Ovamwatate, fye katu fi ovana vomupika okakadona, ndele ovana vomukainhu omumangululwa.
Eshangelo lopedu
^ Ile “voinima yanafangwa.”
^ Oshitya shOshiheberi ile shOshiaramia tashi ti, “Tate.”
^ Eln., “pambelela.”
^ Eln., “a dalwa pambelela.”
