Ovagalati 5:1-26
5 Kristus okwe tu mangulula opo tu hafele emanguluko. Onghee hano, natu kaleni ovadiinini; inatu liyandjeni vali kondjoko youpika.
2 Taleni, ame Paulus ohandi mu lombwele kutya ngeenge omwa piti etanda, osho Kristus a ninga itashi mu etele ouwa washa.
3 Ohandi dimbulukifa vali ovalumenhu aveshe kutya keshe ou te lipitifa etanda oku na okudiinina Omhango aishe.
4 Ovo tamu liyukipalifa okupitila momhango otamu litukula ko kuKristus, notamu xutwifa efilonghenda laye.
5 Fye otwa teelela nelineekelo okutalika ko ovayuki kekwafo lomhepo yaKalunga nomolweitavelo.
6 Osheshi epitotanda ile okuhapita etanda itaku ti sha kovahongwa vaKristus Jesus, ndele eitavelo tali linyengifwa kohole olo tali ti sha.
7 Omwa li tamu shi endifa nawa.* Olyelye e mu kelela mu dulike koshili?
8 Oinima oyo tamu lalakanene inai dja kuKalunga ou e mu ifana.
9 Efulika linini otali dulu okupifa olumbololo alishe.
10 Ondi na elineekelo kutya mu li ovahongwa vOmwene otamu tu kumwe naame, ndele ou te mu etele oupyakadi, kashi na nee mbudi kutya olyelye, ota ka mona ehandukilo olo e lilongela.
11 Ovamwatate, ngeno onda li natango handi udifa shi na sha nepitotanda, ngeno itandi hepekwa, novanhu ngeno itava ka uda nai eshi handi udifa kutya Jesus okwa valelwa komuti womahepeko.*
12 Ovalumenhu ovo tava kendabala oku mu pukifa, nava ninge ovalutulwa.*
13 Ovamwatate, emanguluko olo mwa ifanenwa inamu li longifa okuwanifa po omahalo opambelela, ndele yakulafaneni pahole.
14 Osheshi Omhango aishe oya wanifa po oshipango osho tashi ti: “Hola mukweni ngaashi u lihole mwene.”
15 Ngeenge ohamu lwifafana nokuyahamekafana, lungameni muha hanaunafane po.
16 Ndele ohandi mu lombwele mu kale hamu wilikwa komhepo iyapuki opo muha wanife po vali nandenande omahalo opambelela.
17 Osheshi ombelela oi li omhinge nomhepo iyapuki, nomhepo iyapuki oi li omhinge nombelela; oinima oyo yopavali ohai kondjifafana opo muha longe osho mwa hala.
18 Kakele kaasho, ngeenge ohamu wilikwa komhepo iyapuki, kamu li vali koshi yomhango.
19 Ndele oilonga yombelela i li poluhaela oyo ei, oluhaelo,* okuhenoukoshoki, okunyona nopehe nouxwenge,*
20 okulongela oikalunga, oumhulile, outondwe, eenhamanana, ondubo, ehandu la pitilila, eemhata, omatukauko, oimhanga,
21 efupa, oukolwe, oivilo ihe na elandulafano* naikwao ya fa oyo. Ovamwatate, ngaashi nde mu londwela nale, natango ohandi mu londwele kutya: Keshe ou ta longo oilonga ya tya ngaho ita ka fyuulula Ouhamba waKalunga.
22 Mepingafano naasho, oiimati yomhepo oyo ei, ohole, ehafo, ombili, onheni,* olune, ouwa, eitavelo,
23 omwenyo muwa nelipangelo. Kape na omhango i li omhinge noinima ya tya ngaho.
24 Ovahongwa vaKristus Jesus ova dipaa* omahalo avo opambelela.
25 Ngeenge ohatu wilikwa komhepo iyapuki, natu kaleni yo hatu katuka metwokumwe newiliko layo.
26 Inatu kaleni tu na ounhwa molwaashi oo hau eta omhepo yefiyafanepo nokutwilafana ondubo.
Eshangelo lopedu
^ Eln., “omwa li tamu tondoka nawa.”
^ Tala omafatululo oitya.
^ Ile “nave lilutule vo vene.” Sha hala okutya inava wana vali okuwanifa po omhango oyo va li tava xumifa komesho.
^ MOshigreka, porneia. Tala omafatululo oitya.
^ Ile “okunyona nopehe na okufya ohoni.” MOshigreka, aselgeia. Tala omafatululo oitya.
^ Ile “eenhingo.”
^ Ile “elididimiko.”
^ Eln., “ova valela komuti.”
