Ovaheberi 1:1-14
1 Pefimbo lonale, Kalunga okwa kala ha popi nootatekulululwa peemhito dihapu okupitila movaprofeti nomeenghedi vali dimwe di lili.
2 Ndele paife oha popi nafye okupitila mOmona waye, oo a nangeka po a ninge omufyuululi waaishe, nokwe mu longifa eshi a shita eulu nedu.*
3 Oku na oshinge nosho yo omaukwatya a fa aKalunga filufilu. Oha kaleke po oinima aishe okupitila meenghono deendjovo daye. Ndele konima eshi e tu yelifa komanyono etu, okwa ka kala omutumba meulu kolulyo laKalunga Omunefimano alishe.
4 Molwaashi okwa pewa edina la tumbala li dule omadina ovaengeli, kungaho oshe mu ningifa a kale e va dule.
5 Pashihopaenenwa, omweengeli elipi a lombwelwa kuKalunga taku ti: “Ove omona wange; okudja nena onda ninga xo”? Ile taku ti: “Ohandi ka ninga xo, noto ka ninga omona wange”?
6 Eshi a tuma Omona waye oshiveli kombada yedu, okwa ti: “Ovaengeli vaKalunga aveshe nave mu linyongamene.”*
7 Kakele kaasho, okwa ti vali shi na sha novaengeli vaye: “Ota pe ovaengeli vaye eenghono, nota tumu ovapiya* vaye ve li ngaashi omalaka omundilo.”
8 Ndele shi na sha nOmona, okwa ti: “Kalunga oye e ku pa eenghonopangelo u pangele fiyo alushe,* nodibo yOuhamba woye oyo odibo youyuki.
9 Ou hole ouyuki nou tonde okuhenouyuki, nomolwaashi Kalunga koye e ku vaeka nomaadi, opo u kale u na ehafo linene li dule leehamba dikweni.”*
10 Okwa ti vali: “Omwene, owa dika po ekanghameno ledu okudja pehovelo, neulu oli li oilonga yomake oye.
11 Oinima oyo otai xulu po notai kulupa ngaashi oshikutu, ndele ove oto kala po alushe;
12 oto i tonyo noto i lundulula ngaashi omunhu ta djalulula oshikutu. Ndele ove ito lunduluka, noito xulu po nandenande.”
13 Mbela omweengeli elipi a lombwelelwe kutya: “Kala omutumba kolulyo lange fiyo handi ningi ovatondi voye oshilyatelo sheemhadi doye”?
14 Mbela ovaengeli aveshe kave fi oishitwa yopamhepo oyo hai yakula Kalunga? Mbela havo hava tumwa kuKalunga va ka kwafele ovo tava ka xupifwa?
Eshangelo lopedu
^ Ile “onghalelo yoinima.” Tala omafatululo oitya.
^ Ile “twile eengolo.”
^ Ile “ovayakuli.”
^ Eln., “Kalunga oye olukalwapangelo loye.”
^ Sha hala okutya, “eehamba domepata laDavid.”
