Ovaheberi 10:1-39
-
Omayambo oinamwenyo itaa dulu okuningifa ovanhu va kale va wanenena (1-4)
-
Omhango oi li omudidimbe (1)
-
-
Kristus okwe liyamba palumwe (5-18)
-
Ondjila ya finda monhele iyapuki (19-25)
-
Inatu efa po okwoongala pamwe (24, 25)
-
-
Elondwelo li na sha nokunyonena owina (26-31)
-
Elineekelo neitavelo otali tu kwafele tu lididimike (32-39)
10 Omhango itai dulu okuningifa ovalongelikalunga va kale va wanenena okupitila momayambo oo haa yambwa omudo keshe, molwaashi oi li omudidimbe woinima iwa oyo tai ke uya, ndele hayo oinima yolela.
2 Ngeno oya li tai dulu okuningifa ovanhu va kale va wanenena, mbela ngeno okuyamba omayambo inaku xula po nale? Natango ngeno itava kala ve na eliudo li udite etimba konima eshi va kosholwa.
3 Mepingafano naasho, omayambo oo ohaa dimbulukifa ovanhu omanyono avo omudo keshe,
4 molwaashi ohonde yeemhedi noyoikombo itai dulu okukufa po omanyono.
5 Eshi Kristus e uya mounyuni, okwa ti kuKalunga: “‘Ino hala omayambo, ndele owa longekidila nge olutu.
6 Ino hokwa omaxwikiloyambo nomatimbayambo.’
7 Opo nee onda ti: ‘Tala, Kalunga kange, onde uya (ngaashi sha popiwa momushangwatonywa* shi na sha naame) ndi longe ehalo loye.’”
8 Eshi a popya tete a ti: “Ino hala noino hokwa omayambo, omaxwikiloyambo nomatimbayambo,” sha hala okutya omayambo oo haa yambwa paMhango,
9 okwa ti vali: “Tala, onde uya okulonga ehalo loye.” Okwa xulifa po osho shotete, opo a tote po oshitivali.
10 Otwa yapulwa okupitila mekuliloyambo lolutu laJesus Kristus palumwe metwokumwe ‘nehalo’ laKalunga.
11 Shimwe vali, omupristeri keshe okwa li ha longo oilonga iyapuki efiku keshe noha yambe omayambo luhapu, ashike osho itashi kufa po filufilu omanyono.
12 Ndele omulumenhu ou okwa yamba eyambo palumwe omolwomanyono, nokwa ka kala omutumba kolulyo laKalunga,
13 nokudja opo okwa kala a teelela fiyo osheshi ovatondi vaye va ningwa oshilyatelo sheemhadi daye.
14 Eyambo olo a yamba ola ningifa ovo va yapulwa va kale va wanenena fiyo alushe.
15 Onghee hano, omhepo iyapuki oye tu hepaululila ya ti:
16 “Jehova okwa ti: ‘Ehangano eli olo handi ka ninga navo okudja pomafiku oo. Ohandi ka tula eemhango dange momadiladilo avo noku di shangela momitima davo.’”
17 Oya ti vali: “Itandi ka dimbuluka vali omatimba avo nosho yo oilonga yavo ii.”
18 Ngeenge ova diminwa po omolwoilonga aishe oyo ii, itapa ka yambwa vali omayambo omolwomanyono.
19 Onghee hano, ovamwatate, omolwohonde yaJesus, katu na oumbada* wokuya mondjila oyo ya finda monhele iyapuki,
20 oyo e tu yeululila i li ondjila ipe tai twala komwenyo okupitila metukulifolapi, sha hala okutya mombelela yaye,
21 naashi yo tu na omupristeri munene oo ta pashukile eumbo laKalunga.
22 Natu longeleni Kalunga nomutima aushe, tu na eitavelo la kola, omitima da kosholwa,* eliudo la yela nomalutu a koshwa nomeva ma yela.
23 Natu hepaululeni noudiinini moipafi eteelelo letu nopehe na okutengauka, molwaashi oo a udaneka omudiinini.
24 Natu kaleni tu na ko nasha* navakwetu nokuladipikafana, opo tu kale* tu holafane nokulonga oilonga iwa;
25 inatu efa po okwoongala pamwe, ngaashi vamwe have shi ningi, ndele tu twaafaneni omukumo, unene tuu eshi tu wete efiku tali ehene popepi.
26 Ngeenge otwa nyonene owina konima eshi twa mona eshiivo lashili li na sha noshili, kape na vali eyambo limwe tali ka yambwa omolwomanyono etu,
27 ndele ohatu ka teelela noumbada etokolo nehandu la xwama la fa omundilo, olo tali ka hanga ovo ve li omhinge naKalunga.
28 Keshe oo a li a dina Omhango yaMoses okwa li ha dipawa nopehe na onghenda ngeenge ope na eembangi mbali ile nhatu.
29 Mbela omunhu ota ka mona ehandukilo li fike peni oo ta lyata Omona waKalunga nokwa dina ongushu yohonde yehangano oyo ye mu yapula, nota sheke omhepo yaKalunga oo e mu ulikila efilonghenda?
30 Otu shii ou a ti: “Ehandu olange; aame handi handukile ou ta nyono.” Navali: “Jehova ota ka tokola oshiwana shaye.”
31 Kashi fi tuu oshinima shitilifa umwe ngeenge okwa handukilwa kuKalunga omunamwenyo!
32 Onghee hano, kaleni nokudimbuluka omafimbo onale, eshi mwa li mwa pewa ouyelele nomwa dula okulididimikila oinima ihapu nonande omwa li tamu mono oixuna.
33 Omafimbo amwe omwa li hamu ningwa nai moipafi,* hamu shekwa nokumonifwa oixuna nomwa li hamu hepekwa pamwe* naavo tava hepekwa.
34 Osheshi omwa udila oukwao wananghali ovo ve li modolongo noinamu kanifa ehafo leni eshi mwa nyekwa oinima yeni, molwaashi omu shi shii kutya omu na emona liwa notali kalelele.
35 Onghee hano, inamu efa po ouladi weni,* molwaashi otau ke mu pefa ondjabi inene.
36 Ndele omwa pumbwa elididimiko, opo mu longe ehalo laKalunga mu ka wanifilwe eudaneko.
37 Osheshi “oku na okafimbo kaxupi,” opo “ou te uya a fike diva, noita ka shelelelwa.”
38 “Omuyuki ota ka kala nomwenyo omolweitavelo,” ndele “ngeenge okwa sholola, itandi* ka kala vali nde mu hokwa.”
39 Fye itatu sholola tu ka hanaunwe po, ndele otu na eitavelo olo tali ka xupififa eemwenyo detu.
Eshangelo lopedu
^ Eln., “momushangwatonywa wembo.”
^ Ile “otu na ouladi.”
^ Eln., “da shaminwa nohonde yaJesus.”
^ Ile “hatu lipula.”
^ Ile “opo shi tu linyengife.”
^ Eln., “omwa li mwa fa mu li mokapale komaudano.”
^ Ile “hamu kala pamwe.”
^ Eln., “emanguluko lokupopya.”
^ Ile “omwenyo wange.”
