Ovaheberi 11:1-40
11 Eitavelo olo okukala nelineekelo la kola, okulineekela kutya osho sha teelelwa otashi ka wanifwa; okukala noumbangi wa yela kutya osho shihe wetike oshoshili.
2 Omolweitavelo, ovanhu vopefimbo lonale* ova li va pewa ehepaululo liwa.
3 Omolweitavelo, otu shi shii kutya oinima yomeulu noyokombada yedu* oya tulwa peenhele palombwelo laKalunga, opo oinima oyo i wetike i uye po okupitila moinima oyo ihe wetike.
4 Omolweitavelo, Abel okwa yambela Kalunga eyambo la denga mbada li dule laKain, nomolweitavelo okwa shilipalekwa kutya omuyuki osheshi Kalunga okwa li a hokwa* eeshali daye. Nonande okwa fya, ota popi natango omolweitavelo laye.
5 Omolweitavelo, Henok okwa li a kufwa po kuKalunga opo aha mone efyo noka li a shiivika kutya okwa twalwa peni; fimbo ina kufwa po, okwa li a shilipalekwa kutya okwa hafifa Kalunga.
6 Osha yela kutya omunhu ngeenge ke na eitavelo, ita dulu okuhafifa Kalunga, osheshi keshe ou ta ehene kuKalunga oku na okwiitavela kutya oko e li nonokutya oha yandje ondjabi kwaavo tave mu kongo va mana mo.
7 Omolweitavelo, Noa, eshi a pewa elondwelo kuKalunga li na sha noinima oyo ya li inai monika natango, okwa ulika etilokalunga nokwa tunga onguluwato opo a xupife ovaneumbo laye, nomolweitavelo laye okwa tokola ounyuni nokwa talika ko omuyuki.
8 Omolweitavelo, Abraham, eshi a ifanwa kuKalunga, okwa dulika eshi a ya konhele oyo a li ta ka pewa i li efyuululo; okwa ya, nonande ka li e shii oko ta i.
9 Omolweitavelo, okwa kala omunailongo medu olo a li a udanekelwa, a li momatwali pamwe naIsak naJakob ovo navo va li tava ka wanifilwa eudaneko la faafana.
10 Osheshi okwa li a teelela oshilando osho shi na omakanghameno a pama, na Kalunga oye omuduti nomutungi washo.
11 Omolweitavelo, Sara okwa li a ninga oufimba* nonande okwa li omunamido, molwaashi okwa li a itavela kutya oo a udaneka omudiinini.*
12 Onghee omulumenhu oo a li omunamido,* okwa li a dalelwa oludalo lihapu li fike peenyofi dokeulu nola nyengana okuvalulwa ngaashi ehekedu lopomunghulofuta.
13 Nonande aveshe ovo ova fya ve na eitavelo, inava wanifilwa omaudaneko, ndele ova fa ve a mona nove a tambula ko nehafo, nova li va hepaulula moipafi kutya vo ovaenda novanailongo medu omo va li.
14 Ovo va hepaulula ngaho ova ulika kutya otava kongo va mana mo onhele yavo vene omo tava ka kala.
15 Ngeno ova kalele hava diladila konhele oko va dile, ngeno ova mona omhito yokushuna ko.
16 Ndele paife ova halelela onhele iwa, sha hala okutya ya pamba eulu. Onghee Kalunga ina fya ohoni okwiifanwa Kalunga kavo, molwaashi okwe va longekidila oshilando.
17 Omolweitavelo, Abraham, eshi a li a yelekwa, okwa li a tokola okuyamba po Isak. Abraham oo a li a tambula ko nehafo omaudaneko okwa li pokuyamba po omona waye ewifa
18 nonande okwa li a lombwelwa kutya: “Oludalo loye* otali ka dja muIsak.”
19 Okwa li a itavela kutya Kalunga ota dulu okunyumuna omona waye, nomolwaasho a li e mu pewa a fa a dja mefyo, osho tashi ulike osho tashi ka ningwa monakwiiwa.
20 Omolweitavelo, Isak okwa li a nangeka noupuna Jakob naEsau omolwoinima oyo ya li tai ke uya.
21 Omolweitavelo, eshi Jakob a li pokufya, okwa li a nangeka noupuna ovanamati aveshe vaJosef nokuhambelela Kalunga e likolelela kodibo yaye.
22 Omolweitavelo, eshi Josef a li pokufya, okwa li a popya shi na sha netembu lOvaisrael nokwa li a yandja omalombwelo* e na sha nomakipa aye.*
23 Omolweitavelo, ovadali vaMoses ova li ve mu holeka oule weemwedi nhatu okudja eshi a dalwa, molwaashi ova li va mona kutya okwa li okahanana kawa, nokava li va tila elombwelo lohamba.
24 Omolweitavelo, eshi Moses a kula, okwa anya okwiifanwa omona wokamonakadona kaFarao,
25 nokwa hoolola okuhepekwa pamwe noshiwana shaKalunga ponhele yokuhafela ouwa woulunde wopakafimbo,
26 molwaashi okwa li a tala ko okushekwa e li Kristus kwa denga mbada ku dule oupuna womuEgipiti, nokwa li a tala kondjabi oyo a li ta ka mona.
27 Omolweitavelo, Moses okwa fiya po Egipiti, hamolwaashi a tila ehandu lohamba, ndele okwa kala te lididimikile omaudjuu a fa e wete oo iha monika.
28 Omolweitavelo, okwa dana Opaasa, ndele ta shamine ohonde komivelo, opo omweengeli waKalunga aha dipae* oiveli yavo.
29 Omolweitavelo, ova taulula Efuta Litilyana va enda poukukutu, ndele eshi Ovaegipiti ve va shikula, ova fya omeva.
30 Omolweitavelo, ekuma laJeriko ola teka po konima eshi ovanhu va li ve li dingonoka omafiku aheyali.
31 Omolweitavelo, Rahab, oo a li ombwada, ka li a hanaunwa po pamwe naavo va li ihava dulika molwaashi okwa li a tambula ko nombili eendadi.
32 Mbela nandi tye vali shike? Efimbo itali pitike nge ndi popye kombinga yaGideon, Barak, Simson, Jefta, David, Samuel nosho yo ovaprofeti vakwao.
33 Omolweitavelo, ova finda omauhamba, ova xumifa komesho ouyuki, ova wanifilwa omaudaneko, ova pata omakanya eenghoshi,
34 ova xupa momundilo wa hanya, ova ya onhapo eongamukonda, ova nghonopalekwa eshi va li ovanghundi, ova pewa eenghono molwoodi nova finda omatangakwaita oo a li e va ponokela.
35 Ovakainhu vamwe ova li va nyumuninwa ovafi vavo, ndele ovanhu vamwe ova li va hepekwa molwaashi inava hala okweefa po eitavelo lavo mokumangululwa, opo va ka mone enyumuko la denga mbada.
36 Kakele kaasho, vamwe ova li va shekwa, va dengwa, va mangwa nomalyenge nova tulwa meedolongo.
37 Ova li va dengwa nomamanya, va li momayeleko, va li va shaaxwa pomakati, va dipawa neongamukonda, va li va djala oikafa yeedi noyoikombo, va li moluhepo, momaudjuu, va ungaungiwa navo nai,
38 nokava li va talwa ko va wana okukala mounyuni. Ova li yo hava kala meembuwa, keemhunda, momakololo nosho yo komikwena.
39 Nonande aveshe ovo ova li va mona ehepaululo liwa omolweitavelo lavo, kava li va wanifilwa osho sha udanekwa,
40 molwaashi Kalunga okwe tu longekidila sha sha denga mbada, opo vaha kale va wanenena tete kufye.
Eshangelo lopedu
^ Ile “lootatekulululwa.”
^ Ile “yomonghalelo yoinima.” Tala omafatululo oitya.
^ Ile “okwa yandja oumbangi kutya okwa tambula ko.”
^ Ile “a pewa eenghono opo a mone oludalo.”
^ Ile “oku shii okulineekelwa.”
^ Eln., “a li a fya.” Sha hala okutya, a li ita dulu okumona oludalo.
^ Eln., “ombuto yoye.”
^ Ile “oshipango.”
^ Ile “nepako laye.”
^ Eln., “aha kume.”
