Ovaheberi 12:1-29
12 Ndele molwaashi otu na ongudu oyo inene* yeendombwedi ye tu dingilila, natu tulei po omutengi keshe noulunde oo hau tu dingatele noupu nokutondoka nelididimiko mefiyafanepo olo tu li mulo,
2 ofimbo twa tala nelitulemo kuJesus, oo ta ka pefa ovanhu omwenyo noku li oshihopaenenwa dingi sheitavelo. Okwe lididimikila omuti womahepeko,* a li ehe na ko nasha nomasheko omolwehafo olo a li ta ka mona, nokwa ka kala omutumba kolukalwapangelo kolulyo laKalunga.
3 Diladileni kombinga yaao e lididimikila omasheko ovalunde ovo ve litokola vo vene, opo muha loloke nokusholola.*
4 Eshi mwa kala tamu kondjifa oulunde oo, kape na nande oumwe womunye e u kondjifa fiyo omefyo.
5 Omwa dimbwa filufilu ekumaido olo mwa pewa kuKalunga mu li ovana vaye, a ti: “Omumwange, ino dina outekuduliko oo to pewa kuJehova, ino sholola ngeenge te ku pukulula;
6 osheshi Jehova oha yandje outekuduliko kwaavo e hole noha handukile* keshe oo a tala ko e li omona waye.”
7 Elididimiko oli li oshitukulwa shoutekuduliko weni.* Kalunga ota ungaunga nanye ngaashi ovana vaye. Osheshi omona elipi iha pewa outekuduliko kuxe?
8 Ngeenge Kalunga ihe mu pe outekuduliko ngaashi he shi ningile vamwe, kamu fi lela ovana vaye, ndele oludalo lokondje yohombo.
9 Shimwe vali, ootate vopanhu* ohave tu pe outekuduliko notwe va fimaneka. Mbela katu na okudulika filufilu kuTate yetu oo e tu vaeka nomhepo iyapuki nokwe tu pa omwenyo?
10 Osheshi outekuduliko oo have tu pe owopakafimbo nowe likolelela kwaasho va tala ko sha yuka, ndele Kalunga ohe u tu pe omolwouwa wetu, opo tu kale ovayapuki ngaashi ye.
11 Outekuduliko ihau kala u hafifa pefimbo opo tau yandjwa, ndele ou nyikifa oluhodi, ashike lwanima ovo va deulwa kuo, ohava kala ovayuki novanambili.
12 Onghee hano, pamekeni omaoko neengolo odo dihe na eenghono,
13 yukifeni eemhadi deni mondjila, opo oilema iha naipale, ndele i veluke.
14 Lalakaneneni ombili novanhu aveshe nosho yo ouyapuki, osheshi ngeenge omunhu ke fi omuyapuki, ita ka mona Omwene.
15 Lungameni opo paha kale nande oumwe ta xutwifa efilonghenda laKalunga; paha twiyuke omudi u na oudiyo oo tau eta omaupyakadi nokunyateka vahapu.
16 Lungameni yo opo mokati keni muha kale omuhaeli* ile oo ehe na olupandu loinima iyapuki, ngaashi Esau oo a li a yandja po oushiveli waye, opo a pewe oikulya.
17 Osheshi omu shi shii kutya lwanima eshi a li a hala okunangekwa noupuna, okwa li a talika ko ina wana. Nonande okwa li ta lili nota kendabala okwiitavelifa xe, ka li a pondola.
18 Nye kamwa li mwa ehena popepi nomhunda oyo hai dulu okukumwa, oyo ya xwama omundilo, ya uvikwa koshilemo shilaula, komulaulu, koshikungulu shomhepo,
19 nokwa li kwa udika ewi lenghuma nondaka ya popya novanhu okudja meulu, ndele eshi ve i uda, ova li va indila Moses vaha pwilikine vali kuyo.
20 Ova li va tilifwa kelombwelo olo tali ti: “Nokuli noshinamwenyo tashi kumu komhunda, oshi na okudipawa nomamanya.”
21 Moses naye okwa li a tilifwa kemoniko olo, nokwa ti: “Onda tila nohandi kakama.”
22 Ndele nye omwa ehena popepi nomhunda Sion, oshilando shaKalunga omunamwenyo, Jerusalem shomeulu nosho yo ongudu yovaengeli omayovi omilongo
23 va ongala pamwe. Omwa ehena popepi neongalo loiveli oyo ya shangelwa meulu nosho yo naKalunga Omutokoli waaveshe nowaavo va vaekwa nomhepo iyapuki nova ningwa va wanenena,
24 nomwa ehena yo popepi naJesus, omupokati wehangano lipe, oo e tu shamina nohonde yaye oyo i dule yaAbel.
25 Lungameni muhe lipwililikile ou ta popi nanye. Ngeenge ovo va li inava pwilikina kwaao a li e va pa elondwelo lopakalunga kombada yedu ova li va handukilwa, mbela fye itatu ka handukilwa sha kwata moiti ngeenge otwa kala inatu pwilikina kwaao ta popi nafye okudja meulu?
26 Pefimbo linya ondaka yaye oya li ya kakamifa edu, ashike paife okwa ti: “Itandi ka kakamifa vali edu alike, ndele ohandi ka kakamifa yo eulu.”
27 Outumbulilo “kakamifa vali” otau ulike kutya Kalunga ota ka xulifa po oinima oyo ya kakamifwa, oinima oyo ina shita, opo oyo inai kakamifwa i kale po.
28 Onghee hano, molwaashi ohatu ka mona Ouhamba oo itau dulu okukakamifwa, natu twikileni okumona ouwa mefilonghenda laKalunga, opo tu dule okulongela Kalunga oilonga iyapuki tu na etilokalunga nefimaneko.
29 Kalunga ketu oku li ngaashi omundilo oo hau lungwinifa filufilu.
Eshangelo lopedu
^ Eln., “oshilemo osho shinene.”
^ Tala omafatululo oitya.
^ Ile “eemwenyo deni diha sholole.”
^ Ile “noha denge.”
^ Ile “shedeulo leni.”
^ Eln., “ootate vopambelela.”
^ Tala omafatululo oitya, “Oluhaelo.”
