Ovaheberi 2:1-18
2 Otwa pumbwa okukala hatu yandje elitulemo shi dulife shito koinima oyo twa uda opo tuha twalwaatwalwe.
2 Ngeenge eendjovo odo da popiwa kovaengeli oda kolekwa, naaveshe ovo va li va nyona noinava dulika ova li va handukilwa pauyuki,
3 ongahelipi hatu ka dula okuya onhapo ehandukilo ngeenge otwa dini elongekido laKalunga la fimana li na sha nexupifo? Omwene wetu oye a popya tete kombinga yalo, naavo ve li uda kuye ove li tu lombwela,
4 na Kalunga okwe li koleka okupitila momadidiliko, moikumwifilonga nomoilonganghono i lili noku lili, naashi a tilila ovapiya vaye omhepo iyapuki pahalo laye.
5 Kalunga ina tula po ovaengeli va ka pangele edu olo hatu popi tali ke uya.
6 Ndele omulumenhu umwe okwa shanga ta ti: “Omunhu oshike opo u mu diladile, ile omona womunhu oshike opo u mu file oshisho?
7 Owe mu ninipika a kale e dulike kovaengeli; we mu dika oshishani shoshinge noshefimano, nowe mu nangeka po a pashukile oilonga yomake oye.
8 Oinima aishe owe i tula koshi yeemhadi daye.” Eshi Kalunga a tula oinima aishe mepangelo laye, ina fiya ko sha nandenande. Ashike fiyo opaife katu wete Jesus ta pangele oinima aishe.
9 Ndele Jesus oo a li a ninipikwa a kale e dulike kovaengeli, paife otu mu wete a dikwa oshishani shoshinge noshefimano konima eshi a mona oixuna nokufya, opo a lole efyo ponhele yaaveshe omolwefilonghenda laKalunga.
10 Oinima aishe oi li po omolwaKalunga nomolwefimano laye. Onghee hano, opo Kalunga a fimanekife ovana vahapu, oku wete sha yuka a pitike oo ta ka pefa ovanhu omwenyo a mone oixuna, opo a kale a wana oku va xupifa.
11 Jesus nosho yo aveshe ovo a ninga ovayapuki ove na xe umwe, nomolwaasho ita fi ohoni oku va ifana ovamwaxe,
12 onghee okwa ti: “Edina loye ohandi ke li shiivifila ovamwatate, nohandi ke ku tanga nomaimbilo meongalo.”
13 Okwa ti vali: “Ohandi mu lineekele.” Natango okwa ti: “Taleni, aame ou nounona ovo Jehova a pa nge.”
14 Onghee hano, ngaashi “ounona” ve li pambelela, naye okwa ninga omunhu wopambelela, opo okupitila mefyo laye a dule okuxulifa po omweetifi wefyo, sha hala okutya Ondiaboli,
15 noku dule okumangulula aveshe ovo ve li moupika woumbada wokutila efyo.
16 Osheshi havaengeli lela ta kwafele, ndele ota kwafele oludalo* laAbraham.
17 Onghee okwa faafana “novamwaxe” moinima aishe, opo a ninge omupristeri munene omunanghenda nomudiinini moinima i na sha naKalunga, opo a yandje eyambo* olo tali kwafele ovanhu va kale ve na ekwatafano liwa naKalunga nova diminwe po omatimba avo.
18 Ota dulu okukwafela ovo tava yelekwa, molwaashi naye okwa li a mona oixuna eshi a yelekwa.
