Eehamba dotete 10:1-29
10 Ohambakainhu yokuSheba oya uda kombinga yaSalomo shi na sha nedina laJehova, onghee oye uya i mu yeleke nomapulo a kitakana.*
2 Oye uya muJerusalem pamwe nongudu inene yovapiya vayo, eengamelo da humbata omaadi o-balsam, oshingoli shihapu nosho yo omamanya ondilo. Opo nee oya ya kuSalomo, ndele tai mu lombwele oinima aishe oyo ya li momutima wayo.
3 Onghee Salomo okwa nyamukula omapulo ayo aeshe. Kapa li sha shidjuu* kohamba Salomo oku i yelifila.
4 Eshi ohambakainhu yokuSheba ya mona ounongo aushe waSalomo, eumbo olo a tunga,
5 oikulya yoposhitaafula shaye, nghee ovapiya vaye hava kala omutumba, nghee ovayakuli voposhitaafula va unganekwa nosho yo omidjalo davo, ovapindili vaye nosho yo omaxwikiloyambo, oo ha yambe pandjikilile keumbo laJehova, oya li ya kumwa neenghono.*
6 Ohambakainhu oya tya kohamba Salomo: “Ehokololo olo nda uda koshilongo shetu kombinga yaasho wa pondola* nosho yo kombinga younongo woye oloshili.
7 Ashike kanda li nda itavela omahokololo oo, fiyo osheshi nde uya, nonde shi mona nomesho ange mwene. Tala, kanda li nda lombwelwa ehokololo le lixwa po. Ounongo nosho yo oupuna woye ou dule kokule pwaasho nda uda.
8 Ovalumenhu nosho yo ovapiya voye, ovo hava kala alushe pamwe naave, nohava pwilikine kounongo woye, otava kala va hafa.
9 Jehova, Kalunga koye, na tangwe, oo e ku hokwa nokwe ku tula kolukalwapangelo laIsrael. Molwaashi Jehova oku hole Israel fiyo alushe, okwe ku hoolola u ninge ohamba, opo u tokole sha yuka nou pangele pauyuki.”
10 Opo nee ohambakainhu oya pa ohamba Salomo oitalenti* yoshingoli 120, omaadi mahapu o-balsam nosho yo omamanya ondilo. Kape na nande oumwe a eta omaadi o-balsam e fike pwaao ohambakainhu yokuSheba ya etela ohamba Salomo.
11 Eeskepa daHiram, odo da li da humbata oshingoli okudja kuOfir, oda etelela yo omiti domi-algum dihapu neenghono nomamanya ondilo a dja kuOfir.
12 Moiti yomi-algum, ohamba oya honga mo oiti yokuyambidida eumbo laJehova nosho yo eumbo* lohamba. Oya honga mo yo ouxumbafeta nosho yo oishikomwa yeengodi yovaimbi. Kape na vali oo a eta mo omiti domi-algum di fike opo, noinadi monika mo vali fiyo okunena.
13 Ohamba Salomo oya pa yo ohambakainhu yokuSheba keshe osho ya li ya hala noya pula, nokwe i wedela ko, molwaashi okwa li ha yandje.* Opo nee ohambakainhu oya dja po, ndele tai shuna koshilongo shavo, pamwe novapiya vayo.
14 Oshingoli osho sha li sha pewa Salomo moule wodula imwe osha li shi na ondjudo i fike poitalenti yoshingoli 666,
15 osho inashi kwatela mo oinima oyo ya dja kovashingifi ovaendi noinima oyo ya etwa mo pamangeshefelo nosho yo oinima oyo ya etwa mo keehamba adishe dokuAraba nokoongoloneya vomoshilongo.
16 Ohamba Salomo oya ninga oikelelifo 200 ya kula, ya vaekwa noshingoli (oshikelelifo keshe osha tulwa eesekeli* 600 doshingoli)
17 noikelelifo* 300 ya vaekwa noshingoli (nokoshikelelifo keshe okwa tulwa eemina* nhatu doshingoli). Opo nee ohamba oye i tula meumbo hali ifanwa Omufitu waLibanon.
18 Ohamba oya tunga yo olukalwapangelo linene, ya longifa omayoo eendjaba, ndele tai li vaeke noshingoli elela.
19 Okwa li ku na eetalapa hamano da yuka kolukalwapangelo, nokonima yolukalwapangelo okwa li ku na okatala kongonga. Oshipundi sholukalwapangelo osha li shi na oikwatelo keembinga adishe mbali, nopa li eenghoshi mbali di li ofika komunghulo woikwatelo yoshipundi.
20 Keetalapa hamano okwa li kwa fikama eenghoshi 12, koxulo yotalapa keshe yometalapa hamano oku na onghoshi. Kape na ouhamba umwe wa ninga oshinima sha tya ngaho.
21 Oikwatelwa aishe yokunwina yohamba Salomo oya li ya longwa moshingoli, noilongifo aishe yomeumbo, olo hali ifanwa Omufitu waLibanon, oya li ya longwa moshingoli elela. Kamwa li mu na sha sha longwa moshisilveri, molwaashi pefimbo laSalomo, oshisilveri osha li sha talika ko shihe na ongushu.
22 Ohamba oya li i na eeskepa dihapu hadi i kuTarsis, noda li hadi ende mefuta pamwe neeskepa daHiram. Konima yeedula nhatu keshe, eeskepa odo hadi di kuTarsis ohadi uya da humbata oshingoli noshisilveri, omayoo eendjaba, oomunghima nosho yo eedila domaluvala mawa.*
23 Onghee ohamba Salomo oya li i dule eehamba adishe dokombada yedu moupuna nomounongo.
24 Ovanhu kombada yedu alishe ova li hava i* kuSalomo, opo va pwilikine ounongo oo Kalunga a tula momutima waye.
25 Keshe umwe okwa li ha eta eeshali, oinima ya longwa moshisilveri, oinima ya longwa moshingoli, oikutu, oinima yokuliamena molwoodi, omaadi o-balsam, eenghambe nomamwili, naasho osha kala hashi ningwa omudo keshe.
26 Salomo okwa kala te likongele omatemba nosho yo eenghambe.* Okwa li e na omatemba 1 400 nosho yo eenghambe* 12 000; okwa kala e i tula moilando, omo hamu kala omatemba, popepi naye, muJerusalem.
27 Ohamba oye liongelela oshisilveri shihapu muJerusalem, ngaashi omamanya mahapu, nomuShefela oye likongela mo omiti domisederi dihapu neenghono, ngaashi omiti da fa omikwiyu.*
28 Eenghambe daSalomo oda li hadi di kuEgipiti, novashingifi vohamba ova li have likongele oufita weenghambe* kondado ya faafana.
29 Etemba keshe, olo la dja kuEgipiti, ola li li na ondado yoisilveri 600, nondado yonghambe oya li 150. Ova li yo have di tumu keehamba adishe dOvaheti nokeehamba daSiria.
Eshangelo lopedu
^ Ile “neetumbutumbu.”
^ Eln., “oshiholekwa.”
^ Eln., “muyo kamwa li vali omhepo.”
^ Ile “yeendjovo.”
^ Oshitalenti shimwe oshi fike peekilograma 34,2. Tala Oshiwedelwako B14.
^ Ile “ombala.”
^ Eln., “she likolelela keke lohamba Salomo.”
^ Osekeli imwe oi fike peegrama 11,4. Tala Oshiwedelwako B14.
^ Oikelelifo inini, naluhapu ohai humbatwa kovaumbi.
^ Omina oyo ya popiwa mOmishangwa dOshiheberi oi fike peegrama 570. Tala Oshiwedelwako B14.
^ Ile “ee-peacock.”
^ Eln., “hava ka konga oshipala.”
^ Ile “ovalondinghambe.”
^ Ile “ovalondinghambe.”
^ Omiti domisikamore
^ Ile tashi dulika, “okudja kuEgipiti nokudja kuKuve; ovashingifi vohamba ova li have di lande okudja kuKuve,” tashi dulika tashi ulike kuKilikia.
