Eehamba dotete 11:1-43
11 Nonande ohamba Salomo oya li i hole omonakadona waFarao, oya li yo i hole ovakainhu vahapu ovanailongo: ovakainhu Ovamoab, Ovaammoni, Ovaedom, Ovasidon nOvaheti.
2 Ovakainhu ovo ova li va dja moiwana oyo Jehova a lombwela Ovaisrael, a ti: “Inamu ya mokati kavo,* navo inave uya mokati keni, molwaashi otava ka nwefa mo omitima deni mu shikule ookalunga vavo.” Ashike Salomo okwa li e na ekwatafano navo nokwa li e va hole.
3 Okwa li e na ovakulukadi 700 ovo va li oidale, novakulukadi vopomunghulo 300. Mokweendela ko kwefimbo, ovakulukadi vaye ova li va nwefa mo omutima waye.*
4 Eshi Salomo a kulupa, ovakulukadi vaye ova li va nwefa mo* omutima waye a shikule ookalunga vamwe, noka li ta longele Jehova, Kalunga kaye, nomutima waye aushe, ngaashi xe David a li a ninga.
5 Salomo okwa li a longela Astoret, oshikalungakainhu shOvasidon, naMilkom, oshikalunga shitondifa shOvaammoni.
6 Okwa li a ninga osho shii momesho aJehova, noka li a shikula filufilu* Jehova, ngaashi xe David a li a ninga.
7 Opo nee Salomo okwa ka tungila Kemosh, oshikalunga shitondifa shaMoab, onhele koshikulundudu, komhunda popepi naJerusalem nosho yo Molek, oshikalunga shitondifa shOvaammoni, onhele koshikulundudu.
8 Osho osho a li a ningila ovakulukadi vaye aveshe ovanailongo, ovo va li hava xwike omatwiminoyambo nokuyambela ookalunga vavo.
9 Jehova okwa li a handukila neenghono Salomo, molwaashi omutima waye owa li wa amuka ko kuJehova, Kalunga kaIsrael, oo e mu lihololela lwoikando ivali,
10 nokwa li e mu londwela shi na sha noshinima osho, kutya ina longela ookalunga vamwe. Ashike ka li a dulika kwaasho Jehova e mu lombwela.
11 Opo nee Jehova okwa tya kuSalomo: “Omolwoshinima osho wa ninga, naashi ino diinina ehangano lange neenghedimhango odo nde ku lombwela, ohandi ku kufa filufilu ouhamba, ndele handi u yandje kuumwe womovapiya voye.
12 Ndele omolwaxo David, itandi u ku kufa ofimbo u na omwenyo. Ashike ohandi u kufa meke lomonamati woye,
13 ndele itandi kufa ko ouhamba aushe. Omonamati woye ohandi mu pe epata limwe omolwomupiya wange David nomolwaJerusalem osho nda hoolola.”
14 Opo nee Jehova okwa etela Salomo omutondi, Hadad, Omuedom, womepata leehamba daEdom.
15 Eshi David a finda Edom, Joab, ondjai yetangakwaita, okwa li a ya a ka pake ovo va dipawa, nokwa li ta kendabala okudipaa ovalumenhu aveshe vomuEdom.
16 (Joab nOvaisrael aveshe oko va kala oko oule weemwedi hamano, fiyo osheshi va dipaa ovalumenhu aveshe vomuEdom.)
17 Ndele Hadad okwa li a faduka po novapiya vamwe vaxe Ovaedom, ndele tava i kuEgipiti; Hadad okwa li okamatyona pefimbo opo.
18 Ova dja mo muMidian, ndele tava i kuParan. Ova kufa ovalumenhu muParan, ndele tava i navo kuEgipiti, kuFarao, ohamba yaEgipiti, oo e mu pa eumbo, nokwa yandja elombwelo, opo a kale ta pewa oikulya nokwe mu pa epya.
19 Hadad okwa li a filwa onghenda kuFarao, nokwe mu pa omumwaina womukulukadi waye, Tagpenes,* e mu hombole po.
20 Mokweendela ko kwefimbo, omumwaina waTagpenes okwa dalela Hadad omonamati wedina Genubat, na Tagpenes okwe mu twala keumbo laFarao, ndele Genubat ta kala meumbo laFarao pamwe novanamati vaFarao.
21 Eshi Hadad a li muEgipiti, okwa li a uda kutya David okwa nangekwa pooxekulululwa nonokutya Joab, ondjai yetangakwaita, okwa fya. Onghee Hadad okwa tya kuFarao: “Lekele nge ndi ye kedu letu.”
22 Ashike Farao okwa tya kuye: “Oshike uhe na, eshi u li pwaame, opo u pule ndi ku lekele u ye kedu leni?” Okwa nyamukula, a ti: “Kape na osho ndihe na, ashike lekele nge ndi ye.”
23 Natango, Kalunga okwa etela Salomo omutondi umwe, Reson, omonamati waEliada, oo a faduka po omwene waye, Hadadeser, ohamba yaSoba.
24 Eshi David a finda* ovalumenhu vokuSoba, Reson okwe likongela ovalumenhu, ndele ta ningi ondjai yetangakwaita. Opo nee ova ya kuDamaskus, ndele tava kala oko, nokwa hovela okupangela Damaskus.
25 Reson naye okwa ninga omutondi waIsrael pefimbo alishe lokupangela kwaSalomo, e va hepeka ngaashi Hadad, nokwa kala e tonde Ovaisrael pefimbo opo a li ta pangele Siria.
26 Opa li yo Jerobeam, omonamati waNebat, Omuefraim, a dja kuSereda, omupiya waSalomo, oo a dalwa komufiyekadi wedina Serua. Naye okwa li a tukululila oshibofa* ohamba.
27 Eshi osho she mu ningifa a tukululile oshibofa ohamba: Salomo okwa li a tunga Millo* nokwa li a pameka oshilando shaxe, sha hala okutya, Oshilando shaDavid.
28 Jerobeam okwa li omulumenhu omunaenghono. Eshi Salomo a mona kutya omulumenhu oo omunyasha okwa li ha longo noudiinini, okwe mu ninga omupashukili wovanailonga aveshe vomeumbo laJosef.
29 Pefimbo opo, Jerobeam okwa dja mo muJerusalem, nokwa hangwa mondjila komuprofeti Ahia, Omusilo. Ahia okwa li a djala oshikutu shipe, novo aveke vavali va li mondjila.
30 Ahia okwa kwata oshikutu shipe osho a li a djala, ndele te shi pombaula moitukulwa 12.
31 Opo nee okwa tya kuJerobeam:
“Kufa po oipambu ei omulongo i ninge yoye, molwaashi Jehova, Kalunga kaIsrael, okwa ti: ‘Ouhamba ohandi u kufa mo meke laSalomo, ndele handi ku pe omapata omulongo.
32 Ndele epata limwe otali ningi laye omolwomupiya wange David nomolwaJerusalem, oshilando osho nda hoolola momapata aeshe aIsrael.
33 Ohandi ningi ngaho, molwaashi ova fiya nge po, ndele tave ke linyongamena Astoret, oshikalungakainhu shOvasidon, Kemosh, oshikalunga shOvamoab, naMilkom, oshikalunga shOvaammoni, noinava enda meendjila dange, mokuninga osho sha yuka momesho ange, nokudiinina eenghedimhango dange nomatokolo ange, ngaashi xe David a ninga.
34 Ndele itandi ke mu kufa ouhamba aushe, nota twikile okukala elenga okukalamwenyo kwaye akushe, omolwomupiya wange David, ou nda hoolola, molwaashi okwa dulika koipango yange nokeenghedimhango dange.
35 Ashike ouhamba ohandi u kufa mo meke lomonamati waye, ndele handi u ku pe, sha hala okutya, omapata omulongo.
36 Omonamati waye ohandi mu pe epata limwe, opo umwe womoludalo laDavid a twikile okupangela* koshipala shange muJerusalem, oshilando osho nde lihoololela, shi li onhele omo handi tula edina lange.
37 Ohandi ke ku hoolola, noto ka pangela keshe osho wa hala,* noto ka ninga ohamba yaIsrael.
38 Ngeenge owa diinine ashishe osho handi ku lombwele, wa ende meendjila dange nowa ningi osho sha yuka momesho ange, mokudiinina omaufomhango noipango yange, ngaashi ashike omupiya wange David a li a ninga, ohandi ka kala yo pamwe naave. Ohandi ke ku tungila eumbo tali kalelele, ngaashi ashike nda li nda tungila David, nohandi ke ku pa Israel.
39 Ohandi ka fifa ohoni oludalo laDavid omolwoshinima osho, ndele hafiyo alushe.’”
40 Onghee Salomo okwa li ta kendabala okudipaa Jerobeam, ashike Jerobeam okwa faduka po a ya kuEgipiti, kuSisak, ohamba yaEgipiti, nokwa kala kuEgipiti, fiyo osheshi Salomo a fya.
41 Ondjokonona aishe yaSalomo, ashishe osho a ninga nounongo waye, mbela inai shangwa membo londjokonona yaSalomo?
42 Efimbo* olo Salomo a pangela Ovaisrael aveshe muJerusalem, ola li eedula 40.
43 Opo nee Salomo okwa nangekwa pooxekulululwa, nokwa pakwa mOshilando shaDavid, xe, nomonamati waye, Rehabeam, okwa ninga ohamba ponhele yaye.
Eshangelo lopedu
^ Ile “Inamu hombolafana navo.”
^ Ile “ovakulukadi vaye ova li ve mu nwefa mo neenghono.”
^ Ile “va amuna ko.”
^ Eln., “pauyadi.”
^ Sha hala okutya, Tagpenes, omukulukadi wohamba.
^ Eln., “a dipaa.”
^ Eln., “a yelulila omake.”
^ Ile “oshikulundudu shedu.”
^ Eln., “olamba.”
^ Ile “keshe osho omwenyo woye wa hala.”
^ Eln., “Omafiku.”
