Eehamba dotete 12:1-33
12 Rehabeam okwa li a ya kuSekem, osheshi Israel ashishe osha li she uya kuSekem, opo shi mu ninge ohamba.
2 Diva eshi Jerobeam, omonamati waNebat, e shi uda (okwa li natango muEgipiti, molwaashi okwa li a faduka po omolwohamba Salomo, nokwa li ha di muEgipiti),
3 ove mu tuma a ka talwe ko. Konima yaasho, Jerobeam nosho yo ongudu aishe yaIsrael ove uya kuRehabeam, ndele tava ti:
4 “Xo okwe tu twika ondjoko idjuu. Ashike ngeenge owa pupaleke oilonga, oyo xo e tu pa, nosho yo ondjoko idjuu,* oyo e tu twika, ohatu ke ku longela.”
5 Opo nee okwa tya kuvo: “Indeni, ndele tamu alukile kwaame konima yomafiku atatu.” Onghee ovanhu ova ya.
6 Ohamba Rehabeam oya ka pula ovalumenhu ovakulunhu, ovo va li va longela xe, Salomo, ofimbo a li momwenyo, ya ti: “Omayele elipi tamu dulu okupa nge, opo ndi nyamukule ovanhu ava?”
7 Ove mu nyamukula, va ti: “Ngeenge nena owa ningi omuyakuli wovanhu ava, nokupwilikina keindilo lavo, ndele to va pe enyamukulo olo va hala, otava ka kala alushe ovapiya voye.”
8 Ashike ina pwilikina komayele, oo a pewa kovalumenhu ovakulunhu, ndele okwa ka pula ovalumenhu ovanyasha, ovo a putukila pamwe navo, nova li ovayakuli vaye pefimbo opo.
9 Okwe va pula, a ti: “Omayele elipi tamu dulu okupa nge, opo ndi nyamukule ovanhu ovo va tya kwaame, ‘Pupaleka ondjoko oyo xo e tu twika’?”
10 Ovalumenhu ovanyasha, ovo va putukila pamwe naye, ova tya kuye: “Eshi osho u na okulombwela ovanhu ovo va tya kwoove, ‘Xo okwa djuupaleka ondjoko yetu, ashike i pupaleka’; ou na oku va lombwela, to ti, ‘Ohandi ka ungaunga nanye nai, shi dulife pwaasho tate a ungaunga nanye.*
11 Tate okwe mu twika ondjoko idjuu, ashike ame ohandi ka weda ko kondjoko yeni. Tate okwa li e mu denga neengola, ashike ame ohandi ke mu denga neengola di na omakiya.’”
12 Jerobeam novanhu aveshe ove uya kuRehabeam mefiku etitatu, ngaashi ashike ohamba ya tile: “Alukileni kwaame mefiku etitatu.”
13 Ashike ohamba oya nyamukula ovanhu nonyanya, noinai tambula ko omayele oo ya pewa kovalumenhu ovakulunhu.
14 Oye va lombwela she likolelela komayele oo ya pewa kovalumenhu ovanyasha, ya ti: “Tate okwe mu twika ondjoko idjuu, ashike ame ohandi ka weda ko kondjoko yeni. Tate okwa li e mu denga neengola, ashike ame ohandi ke mu denga neengola di na omakiya.”
15 Onghee ohamba inai pwilikina kovanhu, molwaashi Jehova oye a ningifa oiningwanima oyo, opo eendjovo daJehova, odo a popya okupitila muAhia, Omusilo, di wanifilwe Jerobeam, omonamati waNebat.
16 Eshi Ovaisrael aveshe va mona kutya ohamba oya anya okupwilikina kuvo, ova nyamukula ohamba, va ti: “Oshitukulwa shilipi tu na muDavid? Katu na oshitukulwafyuululo momonamati waIsai. Alikana, Israel shuneni kookalunga keni. Nye oludalo laDavid lifileni oshisho.” Opo nee Ovaisrael ova shuna komaumbo* avo.
17 Ashike Rehabeam okwa twikila okupangela Ovaisrael, ovo va li hava di moilando yaJuda.
18 Opo nee ohamba Rehabeam oya tuma Adoram, oo a li ta pashukile ovanailonga, ovo hava longifwa oilonga idjuu, ashike okwa dipawa nomamanya kOvaisrael aveshe. Ohamba Rehabeam oya londa metemba layo, noya ya onhapo kuJerusalem.
19 Ovaisrael ova kala ihava udafana neumbo laDavid fiyo okunena eli.
20 Diva eshi Ovaisrael aveshe va uda kutya Jerobeam okwa aluka, ove mu ifana koshoongalele noku mu ninga ohamba yaIsrael ashishe. Kape na nande oumwe a shikula eumbo laDavid, kakele kepata laJuda.
21 Eshi Rehabeam a fika muJerusalem, okwa ongaleka diva eumbo alishe laJuda nepata laBenjamin, ovakwaita va deulwa* 180 000 va ka lwife eumbo laIsrael, opo va shunife ouhamba kuRehabeam, omonamati waSalomo.
22 Opo nee ondjovo yaKalunga kashili oye uya kuShemaia, omupiya waKalunga kashili, tai ti:
23 “Lombwela Rehabeam, omonamati waSalomo, ohamba yaJuda, neumbo alishe laJuda nolaBenjamin nosho yo ovanhu aveshe, to ti,
24 ‘Jehova okwa ti: “Inamu ka lwifa ovamwaxo Ovaisrael. Keshe umwe womunye na shune keumbo lavo, osheshi aame nda etifa oshinima osho.”’” Onghee ova dulika kondjovo yaJehova, ndele tava shuna komaumbo avo, ngaashi Jehova e va lombwela.
25 Opo nee Jerobeam okwa tunga* Sekem koshitukulwa shokeemhunda shaEfraim, ndele ta kala oko. Okudja opo okwa ya, ndele ta ka tunga* Penuel.
26 Jerobeam okwe lipopila momutima, a ti: “Paife ouhamba otau shuna keumbo laDavid.
27 Ngeenge ovanhu ova twikile oku ka yambela omayambo keumbo laJehova muJerusalem, ovanhu ava otava ka shuna yo komwene wavo Rehabeam, ohamba yaJuda. Otava ka dipaa nge, ndele tava shuna kuRehabeam, ohamba yaJuda.”
28 Konima eshi ohamba ya tambula ko omayele ovayandjimayele vayo, oya ninga eenhana mbali doshingoli, ndele tai lombwele ovanhu tai ti: “Otashi mu pula shihapu okuya kuJerusalem. Israel, Kalunga keni oye ou, ou e mu kufa mo medu laEgipiti.”
29 Okwa tula onhana imwe muBetel naimwe muDan.
30 Osho oshe va ningifa va nyone, novanhu ova li hava i kuDan va ka longele onhana oyo ya li oko.
31 Okwa tunga omaumbo okulongela ookalunga keenhele dokoikulundudu, nokunangeka po ovapristeri ovo vehe fi Ovalevi.
32 Natango, Jerobeam okwa ninga oshivilo momwedi omutihetatu, mefiku eti-15 lomwedi, ngaashi oshivilo osho hashi ningwa muJuda. Eenhana odo a hambula okwe di yambela omayambo koaltari, oyo a li a ninga muBetel, nokuBetel okwa nangeka ko ovapristeri vokeenhele dokoikulundudu, odo a li a ninga.
33 Okwa hovela okuyamba omayambo koaltari, oyo a ninga muBetel, mefiku eti-15 lomwedi omutihetatu, momwedi oo a hoolola kuye mwene, nokwa ningila Ovaisrael oshivilo, ndele ta i koaltari a ka yambe omayambo nomatwiminoyambo.
Eshangelo lopedu
^ Ile “omahepeko.”
^ Eln., “Okamunwe kange kanini ota ka kala ke dule omatundji atate.”
^ Eln., “komatwali.”
^ Eln., “va hoololwa.”
^ Ile “pameka.”
^ Ile “pameka.”
