Eehamba dotete 4:1-34
4 Ohamba Salomo oya pangela muIsrael ashishe.
2 Omalenga ayo* oo aa: Asaria, omonamati waSadok, okwa li omupristeri;
3 Elihoref naAhia, ovanamati vaSisa, ova li oohamushanga; Josafat, omonamati waAhilud, okwa li omushangi wondjokonona;
4 Benaia, omonamati waJehoiada, okwa li ta pashukile etangakwaita; Sadok naAbjatar ova li ovapristeri;
5 Asaria, omonamati waNatan, okwa li ta pashukile ovawiliki; Sabud, omonamati waNatan, okwa li omupristeri nakaume kohamba;
6 Ahisar okwa li ta pashukile eumbo lohamba, na Adoniram, omonamati waAbda, okwa li ta pashukile ovo va ifanwa va longele ohamba.
7 Salomo okwa li e na ovawiliki 12, ovo hava pashukile Ovaisrael aveshe nohava yandje oikulya kohamba nokovaneumbo layo. Keshe umwe okwa li e na oshinakuwanifwa shokuyandja oikulya omwedi umwe modula.
8 Omadina avo oo ngaha: Omonamati waHur, okoshitukulwa shokeemhunda shaEfraim;
9 omonamati waDeker, omuMakas, Saalbim, Bet-semes nomuElon-bet-hanan;
10 omonamati waHesed, omuArubbot, (okwa li e na Soko noitukulwa aishe yomedu laHefer);
11 omonamati waAbinadab, okoikulundudu aishe yaDor, (okwa li a hombola Tafat, omonakadona waSalomo);
12 Baana, omonamati waAhilud, omuTaanak, Megiddo, nomuBetshan ashishe, osho sha taalelafana naSaretan pedu laJisreel, okudja kuBetshan fiyo okuAbel-mehola nosho yo fiyo okoshitukulwa shaJokmeam;
13 omonamati waGeber omuRamot-gilead (okwa li ta pashukile oumukunda vanini vaJair, omonamati waManasse, ovo va li muGilead; okwa li yo ta pashukile oshitukulwa shaArgob, osho shi li muBasan, oilando ya kula 60 i na omakuma noihakifo yongopolo);
14 Ahinadab, omonamati waIddo, omuMahanaim;
15 Ahimas omuNaftali (okwa li a konga Basmat, omonakadona umwe waSalomo a ninge omukulukadi waye);
16 Baana, omonamati waHusai, omuAsser naBealot;
17 Josafat, omonamati waParua, omuIsaskar;
18 Simei, omonamati waEla, omuBenjamin;
19 Geber, omonamati waUri, omoshitukulwa shaGilead, sha hala okutya medu laSihon, ohamba yOvaamori naOg, ohamba yaBasan. Omwa li yo omupashukili umwe, oo a li ta pashukile ovapashukili aveshe medu olo.
20 Ovajuda nOvaisrael ova li vahapu neenghono, ngaashi ehekedu lopomunghulo wefuta, nova li tava li, tava nu nokunyakukwa.
21 Salomo okwa pangela omauhamba aeshe, okudja komulonga* fiyo okedu lOvafilisti nosho yo fiyo okeengaba daEgipiti. Ova eta oifendela* nova longela Salomo okukalamwenyo kwaye akushe.
22 Oikulya oyo ya li hai liwa kuSalomo efiku keshe oya li eekori* 30 doufila wa nakwa nawa nosho yo eekori 60 doufila,
23 eengobe 10 da ondoka, eengobe 20 da dja komaulifilo mawa, eedi 100, eenyati, eemenye, eembabi noikodinghuti ya ondoka.
24 Okwa kala ta pashukile oinima aishe, oyo ya ama kombinga yomulonga,* okudja kuTifsak fiyo okuGasa, mwa kwatelwa eehamba adishe, odo da li da ama kombinga yomulonga, nokwa kala ta hafele ombili moitukulwa aishe oyo ya li ye mu dingilila.
25 Ovajuda nOvaisrael ova kala ve li meameno, keshe umwe okwa li momundjebele waye nomomukwiyu waye, okudja kuDan fiyo okuBer-seba, omafiku aeshe oo Salomo a kala ta pangele.
26 Salomo okwa li e na oyuunda yeenghambe domatemba aye 4 000* nosho yo eenghambe* 12 000.
27 Ovapashukili ovo ova li hava yandje oikulya kohamba Salomo nosho yo kukeshe oo a li ha li poshitaafula shohamba Salomo. Keshe umwe momwedi omo a li e na olufo okwa li e na oshinakuwanifwa shokushilipaleka kutya oinima aishe opo i li.
28 Ngeenge sha pumbiwa ova li yo hava eta omwiidi wa kukuta noihati keenghambe, mwa kwatelwa odo hadi nane omatemba, keshe umwe she likolelela kwaasho a pulwa.
29 Kalunga okwa pa Salomo ounongo muhapu nosho yo omutima u na eshiivo, ngaashi ehekedu lopomunghulofuta.
30 Ounongo waSalomo owa li u dule ounongo wovanhu aveshe vokoushilo, nounongo aushe womuEgipiti.
31 Okwa li omunaendunge e dule ovanhu aveshe, omunaendunge e dule Etan, Omuesrahi nosho yo Heman, Kalkol naDarda, ovanamati vaMahol, nokwa li a fimanekwa moiwana aishe oyo ya li ye mu dingilila.
32 Okwa shanga* omayeletumbulo 3 000, nomaimbilo aye okwa li 1 005.
33 Okwa li ha popi kombinga yomiti, okudja komisederi, odo di li muLibanon, fiyo okoixwa yaisopi, oyo hai mene momakuma; okwa li yo ha popi kombinga yoinamwenyo, eedila,* oinamwenyo inini* nosho yo eeshi.
34 Ovanhu vomoiwana aishe ova li have uya okupwilikina kounongo waSalomo, mwa kwatelwa eehamba dokombada yedu alishe, odo da uda kombinga younongo waye.
Eshangelo lopedu
^ Ile “Ovakomesho mepangelo layo.”
^ Sha hala okutya, Eufrat.
^ Ile “eeshali.”
^ Okori imwe oi fike peelita 220. Tala Oshiwedelwako B14.
^ Sha hala okutya, kouninginino waEufrat.
^ Omuvalu oo otau hangwa momashangelo amwe nosho yo 2 Omafimbo 9:25. Omashangelo amwe okwa ti 40 000.
^ Ile “ovalondinghambe.”
^ Ile “popya.”
^ Ile “oikwamavava.”
^ Tashi dulika oilipwedi noipuka.
