Eehamba dotete 5:1-18
5 Eshi Hiram, ohamba yaTirus, a uda kutya Salomo okwa vaekwa a ninge ohamba ponhele yaxe, okwa tumina Salomo ovapiya vaye, molwaashi Hiram okwa kala alushe kaume kaDavid.*
2 Salomo okwa tumina Hiram etumwalaka, a ti:
3 “Ou shi shii nawa kutya tate David ka li a dula okutunga eumbo lokufimanekela edina laJehova, Kalunga kaye, omolwoita oyo ya li tai mu dilile keembinga adishe, fiyo osheshi Jehova a finda ovatondi vaye.
4 Paife Jehova, Kalunga kange, okwa pa nge etulumuko keembinga adishe. Kape na nande oumwe ta kondjifa nge, noitandi ningilwa sha nande shii.
5 Onghee onda hala okutunga eumbo lokufimanekela edina laJehova, Kalunga kange, ngaashi ashike Jehova a udanekela tate, David, a ti: ‘Omonamati woye, oo handi ka tula kolukalwapangelo loye ponhele yoye, oye ta ka tunga eumbo lokufimanekela edina lange.’
6 Lombwela paife ovapiya voye va kele nge omiti domisederi domuLibanon. Ovapiya vange otava ka longa pamwe novapiya voye, nohandi ka futa ovapiya voye, she likolelela kofuto oyo wa tula po, molwaashi ou shi shii nawa kutya kape na nande oumwe womufye e shii nawa okuka omiti ngaashi Ovasidon.”
7 Eshi Hiram a uda eendjovo daSalomo, okwa li a hafa neenghono, ndele ta ti: “Jehova na tangwe nena eli, molwaashi okwa pa David omonamati omunaendunge a pangele oshiwana eshi shinene!”*
8 Onghee Hiram okwa tumina Salomo ondjovo, a ti: “Etumwalaka, olo wa tumina nge, onde li uda. Ohandi ningi ashishe osho wa hala mokulongekida omiti domisederi nodomidjenipa.
9 Ovapiya vange otave ke di kufa kuLibanon ve di twale kefuta, nohandi ke di mangela kumwe di kaame mefuta fiyo okonhele oko wa lombwela nge. Ohandi ke di mangululila oko, opo u dule oku di tuta ko, ndele ove oto ka longekida eendja deumbo lange odo handi pula.”
10 Onghee Hiram okwa longekida omiti adishe domisederi nomidjenipa, odo Salomo a li a hala.
11 Salomo okwa pa Hiram oilya yo-wheat i fike peekori* 20 000, i ninge eendja doukwaneumbo waye, nosho yo omaadi eemono a hengwa nawa e fike peekori 20. Salomo okwa kala ha pe Hiram oinima oyo omudo keshe.
12 Jehova okwa pa Salomo ounongo, ngaashi ashike a li e mu udanekela. Pokati kaHiram naSalomo opa kala ombili.*
13 Ohamba Salomo oya li ya tuma ovalumenhu ve ke i longele va dja muIsrael ashishe; ovalumenhu 30 000.
14 Okwa li he va tumu paengudu do 10 000 omwedi keshe. Ova li hava kala oule womwedi kuLibanon, nohava kala oule weemwedi mbali komaumbo avo; Adoniram oye a li ta pashukile ovalumenhu ovo va li va tumwa va ka longele ohamba.
15 Salomo okwa li e na ovanailonga voilonga yokomake 70 000, novahongi vomamanya 80 000, ovo va li keemhunda.
16 Salomo okwa li yo e na ovapashukili 3 300, ovo va li tava pashukile ovanailonga.
17 Ova li va fa omamanya makula, omamanya ondilo palombwelo lohamba, opo va tunge ekanghameno leumbo olo nomamanya oo a hongwa.
18 Onghee ovanailonga vokutunga vaSalomo novaHiram nosho yo Ovagebal ova teta omamanya, nova longekida omiti nomamanya, opo va tunge eumbo olo.
Eshangelo lopedu
^ Ile “okwa kala alushe e hole David.”
^ Ile “shihapu.”
^ Okori imwe oi fike peelita 220. Tala Oshiwedelwako B14.
^ Ile “ehangano.”
