Eehamba dotete 8:1-66
8 Pefimbo opo, Salomo okwa li a ongela ovakulunhu vaIsrael, omitwe adishe domapata nomalenga omaukwaneumbo omapata aIsrael. Ova li va ya kOhamba Salomo, kuJerusalem, va ka tale oshikefa shehangano laJehova kOshilando shaDavid, sha hala okutya kuSion.
2 Ovalumenhu aveshe Ovaisrael ova li va ongala koshipala shOhamba Salomo poshivilo,* momwedi Etanim,* sha hala okutya, momwedi omutiheyali.
3 Onghee ovakulunhu aveshe vaIsrael ove uya, novapristeri ova tumba po Oshikefa.
4 Ova twala Oshikefa shaJehova, etwali lokwoongalela noilongifo aishe iyapuki, oyo ya li metwali. Ovapristeri nOvalevi ova twala oinima oyo.
5 Ohamba Salomo nosho yo ongudu aishe yOvaisrael, ovo va li va tumwa ve ke mu shakeneke, ova li komesho yOshikefa osho. Onghee opa li pa yambwa eedi neengobe dihapu neenghono, itadi dulu nokuli okuvalulwa.
6 Opo nee ovapristeri ova twala oshikefa shehangano laJehova monhele yasho, monduda yomeni leumbo, mOuyapuki elela, sha uvikwa komavava ovakerubi.
7 Omavava ovakerubi okwa li a xwaanana kombada yOshikefa, onghee ovakerubi ova li va uvika Oshikefa neepala dasho.
8 Eepala odo oda li dile, neexulo dado oda li tadi dulu okumonika komunhu e li mOuyapuki, popepi nonduda yomeni, ashike kada li tadi dulu okumonika komunhu e li pondje. Omo di li omo fiyo okunena eli.
9 MOshikefa omo kamwa li sha, kakele koipelende ivali yomamanya, oyo Moses a tula mo puHoreb, eshi Jehova a li a ninga ehangano noshiwana shOvaisrael, pefimbo opo sha li tashi di medu laEgipiti.
10 Eshi ovapristeri va dja mo monhele iyapuki, eumbo laJehova ola li la yada oilemo.
11 Ovapristeri kava li tava dulu okufikama va yakule omolwoshilemo osho, molwaashi eumbo laJehova ola li li yadi oshinge shaJehova.
12 Pefimbo opo, Salomo okwa ti: “Jehova okwa ti kutya ota kala momilaulu fokofoko.
13 Onde ku tungila eumbo la tumbala, onhele ya pamenena, u kale mo fiyo alushe.”
14 Opo nee ohamba oya piluka, noya hovela okunangeka noupuna eongalo alishe laIsrael, ofimbo eongalo alishe laIsrael la fikama.
15 Ohamba oya ti: “Jehova, Kalunga kaIsrael, na tangwe, oo a anena tate, David, nokanya kaye, nokwa wanifa po eudaneko laye neke laye, a ti,
16 ‘Okudja kefiku olo nda kufa oshiwana shange Israel muEgipiti, inandi hoolola nande oshilando momapata aeshe aIsrael, omo tamu ka tungilwa eumbo lokufimanekela edina lange, ashike onda hoolola David a wilike oshiwana shange Israel.’
17 Ndele tate, David, okwa li a halelela okutungila Jehova, Kalunga kaIsrael, eumbo lokufimanekela edina laye.
18 Ashike Jehova okwa lombwela tate, David, a ti: ‘Owa li wa halelela okutunga eumbo lokufimanekela edina lange, nowa ninga nawa, eshi wa li u na ehalo la tya ngaho.
19 Ndele haave to tungu eumbo olo, ashike omonamati woye, oo to ka dalelwa,* oye ta ka tunga eumbo omo tamu ka fimanekelwa edina lange.’
20 Jehova okwa wanifa po eudaneko olo a udaneka, molwaashi onda pingena po tate, David, nondi li omutumba kolukalwapangelo laIsrael, ngaashi ashike Jehova a udaneka. Onda tunga yo eumbo lokufimanekela edina laJehova, Kalunga kaIsrael,
21 nonda ninga mo onhele yOshikefa omo mu na oipelende yehangano, olo Jehova a li a ninga nootatekulululwa, eshi a li te va kufa medu laEgipiti.”
22 Opo nee Salomo okwa fikama komesho yoaltari yaJehova moipafi yeongalo alishe laIsrael, nokwa yelula omake aye pombada,
23 ndele ta ti: “Jehova, Kalunga kaIsrael, kaku na vali Kalunga umwe e ku fa, kutya nee omeulu, ile okombada yedu, mokudiinina ehangano nokuulikila ovapiya voye ohole i na oudiinini, ovo hava dulika kwoove nomutima wavo aushe.
24 Owa wanifa po eudaneko olo wa udanekela omupiya woye, tate, David. Owa udaneka nokanya koye, nowa wanifa po eudaneko olo neke loye nena eli.
25 Ndele paife, Jehova, Kalunga kaIsrael, wanifa po eudaneko olo wa udanekela omupiya woye, tate, David, eshi wa ti: ‘Ngeenge ovanamati voye ova lungamene onghedi yavo yokukalamwenyo, mokukala ovadiinini kwaame, ngaashi ove wa kala omudiinini kwaame, kolukalwapangelo laIsrael otaku ka kala alushe omulumenhu womoludalo loye.’
26 Ndele paife, alikana, Kalunga kaIsrael, eudaneko olo wa udanekela omupiya woye, tate David, nali kale li shii okulineekelwa.
27 “Ndele mbela Kalunga ota kala ngoo shili kombada yedu? Tala, ngeenge eulu, olo li li pombadambada, itali ku wanene, mbela eumbo linini, olo nda tunga, olo nee tali ku wanene?
28 Alikana, Jehova, Kalunga kange, pwilikina keilikano nokeindilo lomupiya woye, pwilikina yo komupiya woye, eshi te ku pula ekwafo, nokeilikano laye, olo te ku ilikana nena eli.
29 Omesho oye naa pashukile eumbo eli oufiku nomutenya, onhele oyo wa popya wa ti, ‘Edina lange omo tali kala omo,’ u pwilikine keilikano lomupiya woye, oo ta ilikana a taalela konhele ei.
30 Pwilikina komupiya woye, eshi te ku indile ekwafo, nokomaindilo oshiwana shoye Israel, eshi tashi ilikana sha taalela konhele ei, nokupwilikina kuvo okudja monhele yoye yokukala, meulu. Va uda, ndele to va dimine po.
31 “Ngeenge omunhu a nyono kumukwao, ndele ta ningifwa eano,* olo la kwatela mo efingo, ndele konima eshi a ninga eano olo ta ka fikama komesho yoaltari yoye, oyo i li meumbo eli,
32 alikana, pwilikina kuye okudja meulu, ndele to katuka onghatu, nokutokola ovapiya voye mokupopya kutya omukolokoshi oku na ondjo noku mu pa ondjabi yoilonga yaye ii nosho yo mokupopya kutya omuyuki ke na ondjo, noku mu pa ondjabi she likolelela koilonga yaye youyuki.
33 “Ngeenge oshiwana shoye Israel sha findwa kovatondi vasho, molwaashi sha kala tashi nyono kwoove, ndele tashi alukile kwoove, tashi tumbalekifa edina loye, tashi ilikana nokupula ekwafo kwoove motembeli ei,
34 alikana, uda oshiwana shoye Israel, okudja meulu, noku shi dimina po, ndele to shi alulile kedu olo wa li wa pa ooxekulululwa.
35 “Ngeenge eulu ola londo, nodula oya kala inai loka, molwaashi va kala tava nyono kwoove, ndele tava ilikana va taalela konhele ei, tava tumbalekifa edina loye nokweefa po omanyono avo, molwaashi we va ningifa ve lininipike,
36 alikana, uda ovapiya voye okudja meulu, ndele to dimi po omanyono avo, omanyono oshiwana shoye Israel, osheshi oove to va hongo ondjila ya yuka, oyo ve na okweenda nayo. Lokifa yo odula medu loye, olo wa pa oshiwana shoye li li efyuululo.
37 “Ngeenge ondjala ye uya moshilongo, ile oudu wolutapo, omhepo ipyu, oimeno tai kukuta, oshipaxu osho hashi ende meengudu, ile oshipaxu sha nyika oshiponga, ile ngeenge omutondi wavo okwe va kondekele mushimwe shomoilando yomoshilongo osho,* ile ehandukilo loludi limwe li lili, ile omukifi,
38 eilikano keshe, nakeshe osho tashi indilwa komunhu keshe, ile koshiwana shoye ashishe Israel, (osheshi omunhu keshe oku shii oudjuu oo u li momutima waye) ngeenge va yelula omake ve a yukifa keumbo eli,
39 alikana, va uda okudja meulu, monhele yoye yokukala, noku va dimina po, ndele to katuka onghatu. Keshe umwe mu pa ondjabi she likolelela keendjila daye adishe, osheshi ou shii omutima waye (oove auke u shii filufilu osho shi li momutima womunhu keshe),
40 opo va kale have ku tila okukalamwenyo kwavo akushe medu olo wa li wa pa ootatekulululwa.
41 “Natango, shi na sha nomunailongo, oo ehe fi womoshiwana shoye Israel, oo a dja kedu lokokule omolwedina loye*
42 (osheshi otava ka uda kombinga yedina loye linene, eke loye li na eenghono nokwooko kwoye kwa yeluka), ndele te uya, nokwiilikana a taalela keumbo eli,
43 alikana, va uda okudja meulu, monhele yoye yokukala, nokuninga ashishe osho omunailongo te ku pula, opo ovanhu aveshe kombada yedu va shiive edina loye nova kale have ku tila, ngaashi oshiwana shoye Israel hashi ningi, nova shiive kutya eumbo eli nda tunga ola lukilwa edina loye.
44 “Ngeenge oshiwana shoye osha i koita shi ka lwife omutondi washo ngaashi we shi tuma, ndele tashi ilikana kwoove, Jehova, sha taalela koshilando osho wa hoolola nokeumbo eli wa tunga lokufimanekela edina loye,
45 shi uda okudja meulu, eshi tashi ku ilikana noku ku pula ekwafo, ndele to shi yambidida.
46 “Ngeenge ova nyono kwoove (osheshi kape na omunhu iha nyono), ndele to va handukile noku va efela momake omutondi wavo, ndele omutondi wavo te va kwata po, noku va twala moukwatwa kedu lavo, kutya nee okokule, ile opopepi,
47 ndele tave lialuluka ve li kedu oko va twalwa ve li eenghwate, tava alukile kwoove noku ku indila ekwafo kedu lovatondi vavo, tava ti, ‘Otwa nyona, twa ninga epuko, notwa katuka shihe li pandunge,’
48 nova alukile kwoove nomutima wavo aushe nomwenyo* wavo aushe medu lovatondi vavo, ovo ve va twala moukwatwa, ndele tava ilikana kwoove va taalela kedu lavo, olo wa li wa pa ooxekulululwa, nokoshilando, osho wa hoolola, nosho yo kotembeli, oyo nda tungila edina loye,
49 va uda okudja meulu, monhele yoye yokukala, eshi tava ilikana kwoove noku ku pula u va file onghenda, ndele to va yambidida,
50 nokudimina po oshiwana shoye osho sha nyona kwoove, to dimi po omatauluko asho aeshe, oo sha ninga koshipala shoye. Ningifa ovatondi vavo ve va file onghenda, opo nee otave ke va fila onghenda,
51 (osheshi vo oshiwana shoye nefyuululo loye, osho wa kufa muEgipiti, mediko la hanya loshivela shilaula).*
52 Alikana, omesho oye naa pashuke, u tale omupiya woye, eshi ta indile ekwafo, nokupwilikina yo koshiwana shoye Israel, eshi tashi ku ilikana efimbo keshe, opo u shi kwafele.*
53 Omwene Jehova, Omunamapangelo aeshe, oshiwana eshi owe shi likalekela shi li efyuululo loye, we shi kufa mokati kovanhu aveshe vokombada yedu, ngaashi ashike wa li wa popya okupitila momupiya woye Moses, eshi wa li to kufa ootatekulululwa muEgipiti.”
54 Diva eshi Salomo a mana okwiilikana nokwiindila efilonghenda kuJehova, okwa dja ko komesho yoaltari yaJehova, oko a li a twa eengolo nokwa yelula omake pombada.
55 Opo nee okwa fikama, nokwa nangeka noupuna eongalo alishe laIsrael newi lopombada, ta ti:
56 “Jehova na tangwe, oo a pa oshiwana shaye Israel onhele yetulumuko, ngaashi a li a udaneka. Kape na nande ondjovo imwe yomomaudaneko aeshe mawa, oo a udaneka okupitila momupiya waye Moses, inai wanifwa.
57 Jehova, Kalunga ketu, na kale pamwe nafye, ngaashi a li pamwe nootatekulululwa. Ine tu efa noine tu ekelashi.
58 Ne tu nanene kuye, opo tu ende meendjila daye adishe notu diinine oipango yaye, omaufomhango aye nomatokolo aye, oo a li a lombwela ootatekulululwa va diinine.
59 Eendjovo dange edi, eshi handi pula ekwafo kuJehova, nadi kale alushe popepi naJehova, Kalunga ketu, omutenya noufiku, opo a yambidide omupiya waye nosho yo oshiwana shaye Israel efiku keshe tashi pula ekwafo,
60 novanhu aveshe kombada yedu otava ka shiiva kutya Jehova oye Kalunga kashili. Kape na vali umwe e lili.
61 Onghee longeleni* Jehova, Kalunga ketu, nomutima weni aushe mokudulika komaufomhango aye nomokudiinina oipango yaye ngaashi tamu shi ningi nena eli.”
62 Opo nee ohamba nOvaisrael aveshe ova yamba omayambo mahapu koshipala shaJehova.
63 Salomo okwa yambela Jehova omayambo oukumwe: Okwa yamba eengobe 22 000 needi 120 000. Kungaho, ohamba nOvaisrael aveshe ova li va yapula eumbo laJehova.
64 Mefiku olo, ohamba oya li ya yapula oshihale shopokati, osho sha li komesho yeumbo laJehova, osheshi opo ya li i na okuyambela omaxwikiloyambo, eendjayambo nosho yo oinghene yomayambo oukumwe, molwaashi oaltari yongopolo, oyo ya li koshipala shaJehova, oya li inini unene, nokaya li tai wana omaxwikiloyambo, eendjayambo noinghene yomayambo oukumwe.
65 Pefimbo opo, Salomo okwa li a ninga oshivilo pamwe nOvaisrael aveshe, eongalo linene, okudja kuLebo-hamat* fiyo okEfilu laEgipiti, koshipala shaJehova, Kalunga ketu, omafiku 7 nosho yo mafiku makwao 7, kumwe aeshe omafiku 14.
66 Mefiku la shikula ko,* okwa lekela ovanhu, nova nangeka noupuna ohamba, ndele tava i komaumbo avo nehafo nova tunhukwa komitima omolwouwa aushe oo Jehova a ulikila David, omupiya waye, nosho yo oshiwana shaye, Israel.
Eshangelo lopedu
^ Sha hala okutya, Oshivilo shOmatwali.
^ Tala Oshiwedelwako B15.
^ Eln., “omonamati woye oo ta di moshinena shoye.”
^ Ile “oo a nyonenwa te mu fingi.” Sha hala okutya, eano olo la kwatela mo efingo li li ondjabi, molwaashi ine li wanifa po.
^ Eln., “medu loivelo yaye.”
^ Ile “omolwedina liwa.”
^ Tala Omafatululo oitya.
^ Ediko la hanya loshivela shilaula otali ulike komafininiko a kwata moiti.
^ Ile “pwilikina kuvo, kashi na nee mbudi kutya otave ku pula shike.”
^ Ile “liyandjeni filufilu.”
^ Ile “koshivelo shaHamat.”
^ Eln., “etihetatu,” sha hala okutya, efiku olo la shikula oshikando oshitivali shomafiku aheyali.
