Omafimbo otete 11:1-47
11 Mokweendela ko kwefimbo, Ovaisrael aveshe ova ongala puDavid, muHebron, ndele tava ti: “Tala, fye otu li ovapambele voye vopopepi elela.*
2 Monakudiwa, ofimbo Saul a li ohamba, oove wa li omuwiliki waIsrael momalwoodi asho.* Jehova, Kalunga koye, okwe ku lombwela, a ti: ‘Oto ka lifa oshiwana shange, Israel, noto ka ninga omuwiliki woshiwana shange, Israel.’”
3 Onghee ovakulunhu aveshe vaIsrael ove uya kohamba kuHebron, na David okwa ninga ehangano navo muHebron, koshipala shaJehova. Opo nee ova vaeka David a ninge ohamba yaIsrael, metwokumwe nondjovo yaJehova, oyo a popya okupitila muSamuel.
4 Lwanima, David nOvaisrael aveshe ova ya kuJerusalem, sha hala okutya, Jebus, oko Ovajebusi va li hava di.
5 Ovakalimo vomuJebus ova sheka David, tava ti: “Ku na efiku u uye ko oku.” Ashike David okwa kwata ko ohotengulu yaSion, oyo paife hai ifanwa Oshilando shaDavid.
6 Onghee David okwa tya: “Ou a ponokele tete Ovajebusi ota ningi elenga* nosho yo omuwiliki.” Joab, omonamati waSerua, oye a ponoka tete, nokwa ninga elenga.
7 Opo nee David okwa kala ha di mohotengulu. Nomolwaasho have i ifana Oshilando shaDavid.
8 Okwa hovela okutunga oshilando osho e shi dingilila, okudja kOshikulundudu* fiyo okoitukulwa oyo ye shi dingilila, na Joab okwe shi tungulula kombinga ikwao.
9 Onghee David okwa enda ta nghonopala unene, na Jehova womatangakwaita okwa li pamwe naye.
10 Ava omitwe dovakwaita ovanaenghono vaDavid, ovo ve mu yambidida unene mouhamba waye, pamwe nOvaisrael aveshe, opo ve mu ninge ohamba, metwokumwe nondjovo yaJehova i na sha naIsrael.
11 Ou omusholondodo wovakwaita ovanaenghono vaDavid: Jasobeam, omonamati waHakmoni, omuwiliki wavakwao vatatu. Okwa dipaa ovanhu ve dulife po 300 neonga poshikando.
12 Eliaser, omonamati waDodo, Omuahohi, oye a li popepi naye, okwa li umwe womovakwaita vatatu ovanaenghono.
13 Okwa li pamwe naDavid muPas-dammim, omo Ovafilisti va li va ongala va ye moita. Opa li epya li yadi oilya yo-barley, novanhu ova li va faduka po omolwOvafilisti.
14 Okwa fikama mokati kepya, ndele te li amene liha kwatwe ko, nokwa kala ta dipaa Ovafilisti. Onghee Jehova okwe va pa efindano* linene.
15 Ovalumenhu vatatu vomovawiliki 30 ova ya kemanya, kuDavid, kekololo laAdullam, ofimbo etangakwaita lOvafilisti la li la onga onhanda mEfilu laRefaim.
16 David okwa li mohotengulu, novakwaita Ovafilisti ova li muBetlehem.
17 Onghee David okwa ti: “Ngeno osha li tashi shiiva ndi nwe omeva omondungu, oyo i li poshivelo shaBetlehem, ngeno ohandi kala nda hafa.”
18 Opo nee ovalumenhu vatatu ove livakela monhanda yOvafilisti, nova teka omeva mondungu, oyo i li poshivelo shaBetlehem, ndele tave a twala kuDavid. Ashike David okwa anya oku a nwa, nokwe a tilashi moipafi yaJehova.
19 Okwa tya: “Pataleko laKalunga, itandi dulu okuninga oshinima sha tya ngaho. Ongahelipi handi dulu okunwa ohonde yovalumenhu ovo va tula eemwenyo davo moshiponga? Osheshi ova li va tula eemwenyo davo moshiponga, eshi ve ke a talele.” Onghee okwa anya oku a nwa. Ei oinima oyo ovakwaita vatatu ovanaenghono va ninga.
20 Abisai, omumwaina waJoab, okwa ninga omuwiliki wavakwao vatatu; okwa dipaa ovanhu ve dulife 300 neonga laye, nokwa li e shiivike nawa, ngaashi ashike ovalumenhu venya vatatu.
21 Muvakwao venya vatatu, okwa li a yooloka ko filufilu e dule vavali vomuvo, nokwa li ondjai yavo, ashike ka li e na ondodo i fike pwaayo yaavenya votete vatatu.
22 Benaia, omonamati waJehoiada, okwa li omulumenhu omuladi,* oo a longa oilonganghono muKabseel. Okwa dipaa ovanamati vavali vaAriel, wokuMoab, nokwa li a ya melambo lomeva, mefiku olo kwa li ku na o-snow, ndele ta dipaa onghoshi.
23 Okwa li yo a dipaa omulumenhu umwe Omuegipiti, oo a li munene neenghono, e na oule womaludimbo* atano. Nonande Omuegipiti oo okwa li e na eonga meke laye, li fike poshiti shovalongi voiyata, okwa ya kuye nodibo, nokwa nyeka ko eonga olo la li meke lOmuegipiti, ndele te li mu dipaifa.
24 Oinima oyo oya ningwa kuBenaia, omonamati waJehoiada, nokwa li ha ningi ngaashi ovakwaita vatatu votete ovanaenghono.
25 Nonande okwa li a yooloka ko filufilu kwaaveshe ovo omilongo nhatu, ka li nande e na ondodo i fike pwaayo yovakwaita votete vatatu. Ashike David okwa li e mu nangeka po a kale umwe womovanangeli vaye.
26 Ovakwaita ovanaenghono vometangakwaita ovo: Asahel, omumwaina waJoab, Elhanan, omonamati waDodo, wokuBetlehem,
27 Sammot, Omuharodi, Heles, Omupeloni,
28 Ira, omonamati waIkkes, Omutekoa, Abieser, Omuanatot,
29 Sibbekai, Omuhusai, Ilai, Omuahohi,
30 Maharai, Omunetofa, Heled, omonamati waBaana, Omunetofa,
31 Ittai, omonamati waRibai, wokuGibea shOvabenjamin, Benaia, Omupiratoni,
32 Hurai, womomalufilu* aGaas, Abiel, Omuarabat,
33 Asmavet, Omubahurim, Eliaba, Omusaalbim,
34 ovanamati vaHasem, Omugison, Jonatan, omonamati waSage, Omuharari,
35 Ahiam, omonamati waSakar, Omuharari, Elifal, omonamati waUr,
36 Hefer, Omumekera, Ahia, Omupeloni,
37 Hesro, Omukarmel, Naarai, omonamati waEsbai,
38 Joel, omumwaina waNatan, Mibhar, omonamati waHagri,
39 Selek, Omuammoni, Naharai, Omubeerot, omuhumbati woilwifo yaJoab, omonamati waSerua,
40 Ira, Omuiitri, Gareb, Omuiitri,
41 Uria, Omuheti, Sabad, omonamati waAhlai,
42 Adina, omonamati waSisa, Omuruben, omutwe wOvaruben, nokwa li pamwe novanhu 30;
43 Hanan, omonamati waMaaka, Josafat, Omumitni,
44 Ussia, Omuastera, Sama naJeiel, ovanamati vaHotam, Omuaroeri,
45 Jediael, omonamati waShimri, nomumwaina Joha, Omutisi;
46 Eliel, Omumahavim, Jeribai naJosavia, ovanamati vaElnaam, naItma, Omumoab;
47 Eliel, Obed naJaasiel, Omumesobaja.
Eshangelo lopedu
^ Eln., “ekipa nonhumba yoye.”
^ Eln., “ou he va kufa mo noku va alulila muIsrael.”
^ Eln., “omutwe.”
^ Ile “kuMillo.” Oshitya shOshiheberi tashi ti “yadeka.”
^ Ile “exupifo.”
^ Eln., “omonamati womulumenhu omukwanyati.”
^ Oule waye owa li eemeta 2,23 lwaapo. Tala Oshiwedelwako B14.
^ Tala Omafatululo oitya.
