Embo lotete lOvakorinto 15:1-58
15 Ovamwatate, ohandi mu dimbulukifa onghundana iwa oyo nde mu udifila, oyo mwa tambula ko nomwe i diinina.
2 Ngeenge omwa diinine onghundana iwa oyo nde mu udifila, otamu ka xupifwa, ndele ngeenge inamu i diinina, eitavelo leni olongaho.
3 Onde mu lombwela oinima ya fimanenena oyo naame nda lombwelwa, kutya Kristus okwa fya omolwomatimba etu ngaashi Omishangwa da popya.
4 Ndele okwa pakwa nokwa nyumunwa mefiku etitatu ngaashi Omishangwa da ti;
5 opo nee okwe lihololela Kefas,* nolwanima okwe ke lihololela ovayapostoli 12.
6 Konima yaasho, okwe ke lihololela ovamwatate ve dulife 500 ovo va li va ongala pomhito imwe, ovo vahapu vomuvo ve li mokati ketu, ofimbo vamwe va fya nale.
7 Okudja opo okwe lihololela Jakob, nolwanima okwe ke lihololela ovayapostoli aveshe.
8 Ndele xuuninwa okwe ke lihololela nge ame ou nda dalwa nda fa okaana inaka fika okudalwa.
9 Ame ondi dulike kovayapostoli aveshe, noinandi wana nokuli okwiifanwa omuyapostoli molwaashi onda hepekele eongalo laKalunga.
10 Ndele ondi li omuyapostoli omolwefilonghenda laKalunga. Ashike efilonghenda laKalunga inali hepa molwaashi onda longa ndi dule ovayapostoli aveshe, ashike hakeenghono dange, ndele omolwefilonghenda laKalunga.
11 Onghee hano, kutya nee aame ile ovovo tava udifa, atushe ohatu udifa etumwalaka la faafana, olo nanye mwa itavela.
12 Ndele ngeenge ohatu udifa kutya Kristus okwa nyumunwa koufi, omolwashike mokati keni mu na vamwe ovo tava ti kutya kaku na enyumuko?
13 Ngeenge kaku na enyumuko lovafi, osha yela kutya Kristus ina nyumunwa.
14 Ndele ngeenge Kristus ina nyumunwa, okuudifa kwetu neitavelo leni oyongaho.
15 Ngeenge oonakufya itava ka nyumuka shili, osha yela kutya Kalunga ina nyumuna Kristus, nohatu lundile Kalunga eshi hatu ti kutya okwe mu nyumuna.
16 Ngeenge ovafi itava ka nyumunwa, Kristus naye ina nyumunwa.
17 Kakele kaasho, ngeenge Kristus ina nyumunwa, eitavelo leni olongaho, noinamu diminwa po omatimba eni.
18 Ngeenge osho ngaho, osha yela kutya ovo va fya ve li ovahongwa vaKristus itava ka nyumuka.
19 Ngeenge eshi tu li momwenyo otwe lineekela ashike muKristus, otu va etifa onghenda unene tu dule ovanhu aveshe.
20 Ndele Kristus okwa nyumunwa koufi, e li omunyumunwa wotete* waavo va fya.
21 Molwaashi efyo ole uya po okupitila momunhu umwe, enyumuko nalo ole uya po okupitila momunhu umwe.
22 Ngaashi ashike ovanhu aveshe hava fi omolwaAdam, aveshe otava dulu oku ka kala nomwenyo okupitila muKristus.
23 Ndele keshe umwe ota nyumunwa pefimbo laye: Tete oKristus, nokonima ovovo vaKristus, ovo tava ka nyumunwa pokukala po kwaye.
24 Xuuninwa, ngeenge Kristus okwa xulifa po omapangelo aeshe naavo ve na eenghonopangelo, ota ka yandja Ouhamba kuXe, Kalunga.
25 Osheshi Jesus oku na okupangela e li ohamba fiyo osheshi ovatondi vaye aveshe va tulwa koshi yeemhadi daye kuKalunga.
26 Nefyo, olo li li omutondi waxuuninwa, otali ka xulifwa po.
27 Kalunga “okwa tula oinima aishe koshi yeemhadi daye.” Ndele eshi taku tiwa kutya ‘oinima aishe oya tulwa koshi yeemhadi daye,’ osha yela kutya Kalunga oo e i tula ko ina kwatelwa mo.
28 Ngeenge Kalunga okwa tula oinima aishe koshi yeemhadi dOmona, Omona naye ote ke liyandja kuKalunga oo e mu pa oinima aishe, nokungaho Kalunga oye aeke ta ka kala Omupangeli woinima aishe.
29 Ngeenge oonakufya itava ka nyumunwa, ongahelipi shi na sha naavo va ninginifilwa okufya? Nongeenge oonakufya itava ka nyumunwa, omolwashike va ninginifwa eninginifo la tya ngaho?
30 Omolwashike hatu tula alushe* eemwenyo detu moshiponga?
31 Ovamwatate, nonande onda taalela efyo efiku keshe, ohandi litange omolweni eshi mu li ovahongwa vaKristus Jesus Omwene wetu.
32 Ngeenge onda lwa noilyani muEfeso ngaashi vamwe va li va ninga, oshi na ekwafo lashike? Ngeenge oonakufya itava nyumunwa, “natu lyeni nokunwa osheshi mongula ohatu fi.”
33 Inamu lifufya. Ookaume vai ohava nyono po eenghedi diwa.
34 Ningeni eendunge nokulonga osho sha yuka, ndele hawii, osheshi vamwe vomunye kave shii Kalunga. Ohandi popi ngaho opo ndi mu fife ohoni.
35 Ndele vamwe otashi dulika va tye: “Oonakufya otava ka nyumunwa ngahelipi? Mbela otava ka nyumunwa ve na omalutu a tya ngahelipi?”
36 Elai ove, osho ho kunu ohashi file mo tete opo shi mene nawa.
37 Ngeenge to kunu, oho kunu ashike ombuto, kutya nee oyoilya ile oyoludi limwe li lili, ndele eshi hashi ka mena omuno waasho wa kuna.
38 Kalunga oha pe ombuto keshe omuno wayo ngaashi she mu wapalela.
39 Omalutu inaa faafana, olutu lomunhu oli lili, longobe oli lili, loudila oli lili noleeshi oli lili.
40 Ope na omalutu omeulu nosho yo omalutu okombada yedu; ndele oshinge shomalutu omeulu oshi lili noshinge shomalutu okombada yedu oshi lili.
41 Oshinge shetango oshi lili, oshinge shomwedi oshi lili noshinge sheenyofi oshi lili; ndele onyofi keshe oi na oshinge shayo shi lili.
42 Osho osho tashi ka ningwa eshi ovafi tava ka nyumunwa. Omalutu oo a fya otaa nyonauka, ashike ovanhu otava ka nyumunwa nomalutu ihaa nyonauka.
43 Oshimhu ngeenge tashi pakwa,* inashi fimana, ndele omunhu ngeenge ta nyumunwa, oha fimanekwa. Oshimhu ohashi pakwa moungone, nomunhu oha nyumunwa e na eenghono.
44 Ohaku pakwa olutu lopambelela, ndele taku nyumunwa olutu lopamhepo. Ngeenge ope na omalutu opambelela, ope na yo omalutu opamhepo.
45 Onghee hano, Omishangwa oda ti: “Adam wotete okwa ninga omunamwenyo.”* Ndele Adam waxuuninwa okwa ninga omhepo hai yandje omwenyo.
46 Eshi shopamhepo hasho she uya tete, ndele osheshi shopambelela, opo nee lwanima osheshi shopamhepo.
47 Omunhu wotete owokombada yedu nokwa shitwa mondwi yedu, ofimbo omunhu omutivali okwa dja meulu.
48 Ovanhu ovo va shitwa mondwi yedu ova fa oo Kalunga a shita tete okudja mondwi yedu, naavo vomeulu ova fa oo a dile meulu.
49 Ngaashi ashike twa fa oo a shitwa mondwi yedu, ohatu ka kala yo twa fa oo a dile meulu.
50 Ovamwatate, ohandi mu lombwele kutya ombelela nohonde itai ka fyuulula Ouhamba waKalunga, naashi hashi nyonauka itashi ka fyuulula osho ihashi nyonauka.
51 Taleni, ohandi mu lombwele oshiholekwa shiyapuki: Atushe itatu ka fya, ndele ohatu ka shitululwa
52 mepakumo leisho pefimbo leshiko lenghuma laxuuninwa. Osheshi enghuma otali ka shikwa, noonakufya otava ka nyumunwa nomalutu ihaa nyonauka, nohatu ka shitululwa.
53 Osho hashi nyonauka otashi djala osho ihashi nyonauka, naasho hashi fi otashi djala osho ihashi fi.
54 Ndele ngeenge osho hashi nyonauka osha djala osho ihashi nyonauka, naasho hashi fi osha djala osho ihashi fi, eendjovo edi tadi ti: “Efyo ola xulifwa po fiyo alushe” otadi ka wanifwa.
55 “Efyo, efindano loye oli li peni? Efyo, eenghono doye odi li peni?”
56 Oulunde oo hau etifa efyo, neenghono doulunde odo Omhango.*
57 Ndele Kalunga na pandulwe eshi e tu kwafela tu finde efyo okupitila mOmwene wetu Jesus Kristus!
58 Onghee hano, ovamwatate ovaholike, kaleni mwa pama, ihamu tengauka, kaleni alushe hamu longo shihapu moilonga yOmwene, nokukala mu shi shii kutya oilonga oyo tamu longele Omwene kai fi oshimha.
Eshangelo lopedu
^ Oo ha ifanwa yo Petrus.
^ Eln., “oshiimati shotete.”
^ Ile “efimbo keshe.”
^ Ile “tashi tulwa medu.”
^ Ile “omwenyo.”
^ Ile “Omhango ohai yandje eenghono koulunde.”
