Embo lotete lOvakorinto 4:1-21
4 Otwa hala ovanhu ve tu tale ko tu li ovapiya vaKristus nomalenga oshiholekwa shiyapuki shaKalunga.
2 Ndele omalenga oku na okukala haa longo noudiinini.
3 Inashi fimana kwaame ndi tokolwe kunye ile kovatokoli. Nokuli naame mwene itandi litokola.
4 Osheshi ondi na eliudo la yela. Ashike osho hasho tashi ulike kutya ame omuyuki, ndele Jehova oye ta tokola nge.
5 Onghee inamu tokola fimbo efimbo inali fika, ndele teeleleni Omwene e uye, oo ta ka holola pouyelele oinima oyo ya holekwa momilaulu nota ka holola osho shi li momitima dovanhu. Opo nee Kalunga ota ka pandula keshe umwe omolwoilonga yaye.
6 Ovamwatate, onde mu shangela kombinga yange naApollos omolwouwa weni opo mu landule oshihopaenenwa shetu mu kale metwokumwe neendjovo edi tadi ti: “Inamu koyelela osho sha shangwa,” opo muha kwatwe kounhwa, mu kale mwa fimaneka vamwe nokudina vamwe.
7 Oshike u na she ku ningifa u diladile kutya ou dule vamwe? Ile, oshike u na ino shi pewa? Ngeenge owe shi pewa, omolwashike to litange wa fa ino shi pewa?
8 Mbela omwa wanenwa nale? Mbela omwa punapala? Mbela omwa hovela okupangela ngaashi eehamba? Onda hala ngeno mu hovele okupangela ngaashi eehamba opo nafye tu hovele okupangela pamwe nanye.
9 Kwaame, tu li ovayapostoli, otwa fa twa tulwa kuKalunga mokapale komaudano xuuninwa onga ovanhu ovo va tokolelwa efyo opo tu talike kounyuni aushe, kovaengeli nokovanhu.
10 Otwa talika ko omalai omolwaKristus, ndele nye omwa talika ko ovanaendunge muKristus; fye oingone, ndele nye ovanaenghono; omwa fimanekwa, ashike fye otwa dinika.
11 Fiyo okunena otwa fya ondjala nenota, tu na onghai,* hatu dengwa, tuhe na omaumbo,
12 twa loloka nohatu longo nomake etu. Ngeenge hatu tukwa, ohatu nangeke noupuna; ngeenge hatu hepekwa, ohatu lididimike;
13 ngeenge hatu lundilwa, ohatu popi nombili, nounyuni owe tu tala ko ngaashi oimbodi notwa ekelwashi.
14 Ohandi mu shangele oinima ei, ashike haku mu fifa ohoni, ndele oku mu kumaida ngaashi ovana vange ovaholike.
15 Nonande omu na ovahongi* 10 000 ovo have mu hongo nghee mu na okulandula Kristus, kamu na ooxo vahapu. Ndele ame onda ninga xo yeni molwaashi onde mu udifila onghundana iwa kombinga yaKristus Jesus.
16 Ohandi mu ladipike mu ninge ovahopaeneni vange.
17 Onghee onde mu tumina Timoteus molwaashi oku li omona wange omuholike nomudiinini kOmwene. Ote ke mu dimbulukifa oshihopaenenwa shange nghee nda kala handi longele Kristus Jesus, eshi nda kala handi hongo momaongalo aeshe.
18 Vamwe vomunye ova li va kwatwa kounhwa tava diladila kutya itandi uya kunye.
19 Ngeenge Jehova okwe shi hala, ohandi ke uya diva kunye. Onda hala okumona ovalinenepeki ovo, ashike hakuuda eendjovo davo, ndele okushiiva ngeenge otava wilikwa keenghono domhepo yaKalunga ile hasho.
20 Eendjovo hado hadi ulike kutya omunhu oha dulika kOuhamba waKalunga, ndele oilonga yaye, naasho otashi ulike kutya oha wilikwa komhepo yaKalunga.
21 Oshilipi po mwa hala? Omwa hala ndi uye kunye ndi na odibo ile ohole nombili?*
