Petrus wotete 4:1-19
4 Ndele molwaashi Kristus okwa hepekwa eshi a li molutu lopambelela, nanye kaleni mwe lilongekida* okukala hamu diladila ngaashi Kristus, osheshi keshe oo a hepekwa okwa efa po okulonga oulunde,
2 opo a longe ehalo laKalunga okukalamwenyo kwaye akushe e li molutu lopambelela, ndele hakuwanifa po omahalo opanhu.
3 Osheshi osha wana eshi mwa kala hamu wanifa po omahalo ovanhu vomounyuni mokunyona nopehe na ouxwenge,* okuhapangela omahalo eni, okunwa sha pitilila, okukufa ombinga moivilo ihe na elandulafano* nomomafiyafano okunwa oikolwifa nosho yo okulongela oikalunga.
4 Ndele ohashi va kumwifa eshi ihamu longo vali owii pamwe navo, nomolwaasho have mu popile mowii.
5 Ovanhu va tya ngaho otave ke lihokolola kwaao ta ka tokola ovanamwenyo novafi.
6 Nomolwaasho onghundana iwa ya udifilwa yo novafi,* opo va kale nomwenyo pataleko laKalunga nokuwilikwa komhepo yaye nonande ova tokolwa pambelela pataleko lopanhu.
7 Exulilo loinima aishe ola ehena popepi. Onghee hano, kaleni mu na eendunge nomwe lilongekida* okwiilikana.
8 Komesho yaaishe, kaleni mu holafane nohole yomoule, molwaashi ohole ohai tuvikile onduba yomatimba.
9 Yakulafaneni nopehe na okungongota.
10 Ngaashi omalenga oo haa longo noudiinini nokwa ulikilwa efilonghenda laKalunga meenghedi di lili noku lili, yakulafaneni keshe umwe she likolelela koshali oyo a pewa.
11 Keshe ou ta popi, ne shi ninge ngaashi ta popi etumwalaka laKalunga, naau ta yakula, ne shi ninge ngaashi oo a pewa eenghono kuKalunga, opo Kalunga a fimanekwe moinima aishe okupitila muJesus Kristus. Efimano neenghono odaKalunga alushe fiyo alushe. Amen.
12 Ovamwatate ovaholike, inamu kumwa ngeenge tamu shakeneke omayeleko a kwata moiti,* mwa fa ngeno tamu ningilwa oshinima inashi ningwa nale.
13 Mepingafano naasho, kaleni mwa hafa eshi tamu hepekelwa osho Kristus a hepekelwa, opo mu ka mone ehafo linene pefimbo lokuhololwa kwoshinge shaye.
14 Ngeenge tamu shekelwa* edina laKristus, kaleni mwa hafa, molwaashi omhepo yoshinge, sha hala okutya omhepo yaKalunga, oi li pamwe nanye.
15 Onghee hano, inandi hala nande oumwe womunye a hepekwe molwaashi e li omudipai, ombudi, ha longo owii ile he lidopo moinima yavamwe.
16 Ngeenge ope na ou ta hepekwa molwaashi e li Omukriste, ina fya ohoni, ndele na twikile okufimanekifa Kalunga e li Omukriste.
17 Osheshi eli olo efimbo olo la tulwa po, opo etokolo li hovele meumbo laKalunga. Ndele ngeenge ola hovele tete mufye, oshike tashi ka ningilwa ovo ihava dulika konghundana iwa yaKalunga?
18 “Ngeenge omuyuki oku na okulonga noudiinini opo a xupifwe, mbela oshike tashi ka ningilwa omuhenakalunga nomulunde?”
19 Onghee hano, ovo tava hepekwa molwaashi tava longo ehalo laKalunga nava twikile okulonga ouwa nokulineekela* Omushiti oo e li omudiinini.
Eshangelo lopedu
^ Ile “mwa tokola.”
^ Ile “nopehe na okufya ohoni.” MOshigreka, aselgeia. Tala omafatululo oitya.
^ Ile “meenhingo.”
^ Ovafi otava ulike kovanhu ovo va li va fa va fya omolwoulunde wavo.
^ Ile “nomu li oupafi.”
^ Ile “a fa omundilo wa xwama.”
^ Ile “tamu tukilwa.”
^ Ile “nokupandula.”
