Samuel wotete 12:1-25
12 Samuel okwa lombwela Ovaisrael aveshe a ti: “Paife onda ninga* ashishe osho mwa pula nge, nonda nangeka po ohamba i mu pangele.
2 Ohamba oyo tai mu pangele* oyo ngaho. Ame onda kulupa nondi na eenghwakutoka. Ovanamati vange ove li pamwe nanye. Onde mu wilika okudja mounyasha wange fiyo opaife.
3 Aame ou. Hokololifei nge koshipala shaJehova noshomuvaekwa waye: Onda kufa po omhedi nondongi yalyelye, ile olyelye nda kengelela, ile nda nyemateka? Mbela ope na ou a pa nge ombubo ndi pengife etokolo? Ngeenge onda ninga sha, ohandi shi mu shunifile.”
4 Ova nyamukula va ti: “Ino tu kengelela, ile u tu nyemateke, ile u tambule ombubo kuumwe.”
5 Onghee okwe va lombwela a ti: “Jehova nomuvaekwa waye ovo eendombwedi deni nena eli kutya, inamu mona nge owii washa mu pataneke nge.”* Opo nee ova tya: “Ye ondombwedi.”
6 Onghee Samuel okwa lombwela ovanhu ta ti: “Jehova, oo a longifa Moses naAron nokwa kufa ooxokulululwa medu laEgipiti, oye ondombwedi.
7 Ileni paife mu fikame apa, nohandi ke mu tokola moipafi yaJehova metwokumwe noilonga aishe youyuki oyo Jehova e mu longela, nye nooxokulululwa.
8 “Diva eshi Jakob e uya muEgipiti, naashi ooxokulululwa va hovela okupula ekwafo kuJehova, Jehova okwa tuma Moses naAron va kufe mo ooxokulululwa muEgipiti nove va eta va kale hava di medu eli.
9 Ashike ova li va dimbwa Jehova Kalunga kavo, nokwe va yandja* meke laSisera, ondjai yetangakwaita laHasor, meke lOvafilisti nomeke lohamba yaMoab, ndele tave va lwifa.
10 Opo nee ova pula ekwafo kuJehova tava ti: ‘Otwa nyona, eshi twa fiya po Jehova tu ka longele ooBaal noihongwafano yaAstoret. Paife tu xupifa meke lovatondi vetu, opo tu ku longele.’
11 Jehova okwa tuma Jerubbaal, Bedan, Jefta naSamuel, nove mu xupifa meke lovatondi veni aveshe ovo ve mu dingilila, opo mu kale meameno.
12 Eshi mwa mona kutya Nahas, ohamba yOvaammoni, okwe uya oku mu lwifa, omwa twikila okulombwela nge tamu ti: ‘Ahawe, fye otwa tokola okukala nohamba tai tu pangele,’ nonande Jehova Kalunga keni oye Ohamba yeni.
13 Ohamba oyo mwa hoolola nomwa pula oyo ei. Taleni, Jehova okwe mu nangekela po ohamba i mu pangele.
14 Ngeenge omwa kala hamu tila Jehova noku mu longela, nomwa dulika kondaka yaye nokupwilikina komalombwelo aJehova, ndele nye nohamba oyo tai mu pangele tamu shikula Jehova Kalunga keni, otamu ka kala nawa.
15 Ashike ngeenge inamu dulika kondaka yaJehova noinamu pwilikina komalombwelo aJehova, Jehova ote ke mu handukila, nye nooxo.
16 Ileni paife mu fikame apa mu tale oshinima shinene osho Jehova ta ka ninga moipafi yeni.
17 Mbela paife kali fi efimbo leteyo loilya yo-wheat? Ohandi ka pula Jehova a ngungumife omingungumo noku lokife odula; kungaho otamu ka shiiva nokuuda ko kutya omwa ninga oshinima shii momesho aJehova, eshi mwa pula mu kale mu na ohamba.”
18 Onghee Samuel okwa pula ekwafo kuJehova, na Jehova okwa ngungumifa omingungumo, nokwa lokifa odula mefiku olo, opo nee ovanhu aveshe ova li va tila unene Jehova naSamuel.
19 Ovanhu aveshe ova lombwela Samuel tava ti: “Ilikana kuJehova Kalunga koye omolwovapiya voye, molwaashi inatu hala okufya, osheshi otwa weda ko enyono limwe komanyono etu aeshe, eshi twa pula ohamba.”
20 Samuel okwa lombwela ovanhu ta ti: “Inamu tila. Omwa longa shili owii aushe oo. Ashike inamu efa po nandenande okushikula Jehova; longeleni Jehova nomutima weni aushe.
21 Inamu mu efa po mu shikule oinima ihe na oshilonga,* oyo ihe na ekwafo lasha noitai dulu okuxupifa, molwaashi kai na oshilonga.*
22 Omolwedina laye linene, Jehova ita ka efa po oshiwana shaye, osheshi Jehova okwe mu hoolola ye mwene mu ninge oshiwana shaye.
23 Kashi li pandunge kwaame okunyona kuJehova mokweefa po oku mu ilikanena, nohandi ka twikila oku mu pa omalombwelo monghedi iwa noya yuka.
24 Kaleni ashike hamu tila Jehova noku mu longela noudiinini* nomutima weni aushe nokudimbuluka alushe oinima inene oyo e mu ningila.
25 Ashike ngeenge omwa ningile owina osho shii, otamu ka xulifwa po, nye nohamba yeni.”
Eshangelo lopedu
^ Eln., “onda pwilikina kondaka yeni moinima aishe oyo.”
^ Eln., “tai ende moipafi yeni.”
^ Eln., “inamu hanga sha meke lange.”
^ Eln., “landifa po.”
^ Ile “ihe li paushili.”
^ Ile “li paushili.”
^ Ile “moshili.”
