Samuel wotete 17:1-58
17 Ovafilisti ova li va ongela omatangakwaita* avo va ka lwe. Ova li va ongala puSoko shaJuda, nova onga onhanda pokati kaSoko naAseka, muEfes-dammim.
2 Saul novalumenhu Ovaisrael ova li va ongala, nova onga onhanda mefilu laEla, ndele tave lilongekidile olwoodi va ka lwife Ovafilisti.
3 Ovafilisti ova li va ama omhunda kombinga imwe, ofimbo Ovaisrael va li ve i ama kombinga ikwao, nefilu ola li pokati kavo.
4 Monhanda yOvafilisti omwa dja umwe a pyokoka molwoodi, nedina laye oGoliat wokuGat, nofika yaye oya li eemeta nhatu lwaapo.*
5 Okwa li a djala embale longopolo komutwe waye, nokwa li a djala okandjafa koukwaita ke na oipapa yongopolo ye liwila. Ondjudo yokandjafa oko ka longwa mongopolo oya li i fike peesekeli 5 000.*
6 Okwa li a djala oivela yongopolo yokwaamena omaulu aye, nokwa li e likundika komapepe eonga longopolo lixupi.
7 Oshikwatelo sheonga laye, olo lile, osha li sha kula shi fike poshiti shovalongi voiyata, noshitwifo sheonga olo osha li shi na ondjudo yeesekeli 600.* Omuhumbati woshikelelifo shaye okwa li e mu li komesho.
8 Opo nee okwa fikama, ndele ta ingida ovakwaita Ovaisrael, ta ti: “Omolwashike mwe uya mwe lilongekidila olwoodi? Kamu shii kutya ame Omufilisti ependa, ofimbo nye ovapiya vongaho vaSaul? Lihoololeleni omulumenhu, ndele tamu mu tumu e uye kwaame.
9 Ngeenge okwa lu naame, ndele ta dipaa nge, ohatu ka ninga ovapiya veni. Ashike ngeenge onde mu findi noku mu dipaa, nye otamu ka ninga ovapiya vetu noku tu longela.”
10 Omufilisti oo okwa weda ko a ti: “Ohandi ka talifa* nawa ovakwaita Ovaisrael nena. Efeni omulumenhu oo mwa hoolola e uye tu lwe.”
11 Eshi Saul novakwaita aveshe vOvaisrael va uda eendjovo dOmufilisti oo, ova li va tila neenghono.
12 David okwa li omonamati wOmuefrat wokuBetlehem shomuJuda wedina Isai, oo a li e na ovanamati vahetatu, nopefimbo olo Saul a ninga ohamba, Isai okwa li a kulupa.
13 Ovanamati vatatu vaIsai, ovo va li ovakulunhu, ova li va ya naSaul kolwoodi. Omadina ovanamati vaye vatatu, ovo va ile kolwoodi oo aa, oshiveli oEliab, omutivali oAbinadab nomutitatu oShamma.
14 David oye a li munini kuvakwao, novamwaina vatatu ova li va shikula Saul.
15 David okwa kala ha i kuSaul, ye ta shuna koufita weedi daxe kuBetlehem.
16 Pefimbo opo, Omufilisti okwa kala he uya okufikama komesho yavo luvali mefiku, ongula nonguloshi keshe, oule womafiku 40, opo e va lwife.
17 Opo nee Isai okwa lombwela omonamati waye David a ti: “Alikana, kufa oefa* ei yoilya ya fengwa nomingome edi omulongo, ndele to di twala diva kovamwaxo konhanda.
18 Twala oipambu omulongo yotyiisa* kelenga olo tali pashukile eyovi. Ou na yo okutala kutya ovamwaxo ove li po ngahelipi, ndele to di ko noumbangi oo tau ulike kutya ove li nawa.”
19 Ova li pamwe naSaul novalumenhu vakwao aveshe Ovaisrael mefilu laEla, tava lwifa Ovafilisti.
20 Onghee David okwa penduka ongula inene, nokwa fiya umwe ta file oshisho eedi. Opo nee okwa pakela, ndele ta i ngaashi Isai e mu lombwela. Eshi a fika ponhanda, etangakwaita ola li tali i konhele yolwoodi, tali ingida eingido lokuya molwoodi.
21 Ovakwaita Ovaisrael nOvafilisti ova li va shakena nova fikama va taalelafana.
22 David okwa fiya po diva oinima, oyo a twaalela, e i fiya nomupashukili woinima, ndele ta tondoka a finda konhele yolwoodi. Eshi a fika, okwa pula ngeenge ovamwaxe ove li ngoo nawa.
23 Ofimbo a li ta popi navo, okwa dja omukwaita a pyokoka wedina Goliat, Omufilisti wokuGat. Okwe uya a dja movakwaita Ovafilisti, ndele ta popi eendjovo da faafana naado a popya nale, na David okwe mu uda.
24 Eshi ovalumenhu aveshe Ovaisrael ve mu mona, ove mu faduka po, va tila.
25 Ovalumenhu Ovaisrael ova li tava ti: “Omulumenhu oo te uya omwe mu mona ngoo? Okwe uya okusheka* Ovaisrael. Ohamba otai ka yandja omamona mahapu komulumenhu oo te mu dipaa, otai ke mu pa omonakadona wayo, notai ka mangulula eumbo laxe koinakuwanifwa aishe i na sha nohamba yOvaisrael.”
26 David okwa hovela okupula ovalumenhu ovo va li va fikama popepi naye ta ti: “Oshike tashi ka ningilwa omunhu oo ta dipaa Omufilisti winya, nokukufa po odino mOvaisrael? Osheshi Omufilisti omuhenakalunga oo oye lyelye, opo a sheke* ovakwaita vaKalunga omunamwenyo?”
27 Opo nee ovanhu ove mu lombwela oshinima sha faafana va ti: “Eshi osho tashi ka ningilwa omunhu oo te mu dipaa.”
28 Eshi omukulu waye, Eliab, e mu uda ta popi novalumenhu ovo, okwa li a handukila David, ndele ta ti: “Owe uyila ko shike oku? Eedi dinya dinini owe di fiya nalyelye mombuwa? Ondi shii nawa elinenepeko loye nomahalo mai omutima woye. Owe uya ashike okutala olwoodi.”
29 Opo nee David okwa ti: “Onda ninga shike? Onda li ashike handi pula!”
30 Okwa piluka, nokwa taalela kuumwe, ndele te mu pula oshinima sha faafana, novanhu ove mu nyamukula ngaashi va li ve mu nyamukula nale.
31 Eendjovo odo David a popya oda udika kuvamwe, ndele tave di lombwele Saul. Opo nee okwe mu tuma e uye kuye.
32 David okwa lombwela Saul a ti: “Hamunhu a kwatwa koumbada omolwaye. Omupiya woye ota i a ka lwife Omufilisti oo.”
33 Ashike Saul okwa tya kuDavid: “Ito dulu okulwa nOmufilisti oo, osheshi ove okamatyona, ofimbo ye okwa kala omukwaita okudja kounyasha waye.”
34 David okwa tya kuSaul: “Eshi omupiya woye a li ta lifa oimuna yaxe, moufita omwe uyile onghoshi nosho yo emwangha, ndele aishe tai kufa mo odi.
35 Opo nee onde i shikula nonde i ponokela, ndele handi nyeke mo odi mokanya kayo. Eshi ya totela nge, onde i kwata molududi layo,* ndele handi i dipaa.
36 Omupiya woye okwa dipaa onghoshi nosho yo emwangha, nOmufilisti oo omuhenakalunga osho ta ka ningilwa, osheshi okwa sheka* etangakwaita laKalunga omunamwenyo.”
37 David okwa weda ko a ti: “Jehova, oo a xupifa nge konghoshi nokemwangha, ota ka xupifa nge yo meke lOmufilisti oo.” Opo nee Saul okwa tya kuDavid: “Inda, na Jehova na kale pamwe naave.”
38 Onghee Saul okwa dika David oikutu yaye. Okwe mu dika embale longopolo komutwe waye nosho yo okandjafa koukwaita.
39 David okwa homata eongamukonda kombada yoikutu yaye, ndele ta kendabala okweenda, ashike ka li ta dulu, molwaashi oinima oyo ka li e i ika. Opo nee okwa tya kuSaul: “Itandi dulu okuya noinima ei, molwaashi inandi i ika.” Onghee David okwe i dula mo.
40 Opo nee okwa kufa odibo meke laye nosho yo oumanya vatano va fefengwa nawa molufilu, ndele te va tula mokandjatona kokandjato kaye kokoufita, nokwa li yo e na oshiumbifo shaye meke laye. Opo nee okwa ya a finda kOmufilisti.
41 Omufilisti okwa enda ta ehene popepi naDavid, nomuhumbati woshikelelifo shaye okwa li e mu li komesho.
42 Eshi Omufilisti a tala David, okwa li e mu yemba, molwaashi okwa mona kutya David omumati omunyasha, nokwa li muwa.
43 Omufilisti okwa tya kuDavid: “Mbela ame ombwa, eshi to uya okulwifa nge noiti?” Opo nee Omufilisti okwa pula ookalunga kaye va finge David.
44 Omufilisti okwa tya kuDavid: “Ila kwaame, nohandi ka yandja ombelela yoye keedila dokeulu nokoifitukuti.”
45 David okwa nyamukula Omufilisti a ti: “Oto uya kwaame neongamukonda nomaonga avali, ashike ame ohandi uya kwoove medina laJehova womatangakwaita, Kalunga ketangakwaita laIsrael, oo wa li to sheke.*
46 Jehova ote ke ku yandja momake ange nena eli, nohandi ke ku dipaa, ndele handi tete ko omutwe woye. Nena eli ohandi ka yandja omidimba dovanhu vomonhanda yOvafilisti keedila dokeulu nokoifitukuti yokombada yedu, novanhu aveshe kombada yedu otava ka shiiva kutya Kalunga oku li pamwe naIsrael.
47 Ovanhu aveshe, ava va ongala apa,* otava ka shiiva kutya Jehova iha xupifa neonga, ile neongamukonda, molwaashi olwoodi olaJehova, note ke mu yandja amushe momake etu.”
48 Opo nee Omufilisti okwa enda ta ehene popepi naDavid, ashike David okwa tondokela diva konhele yolwoodi a ka shakeneke Omufilisti oo.
49 David okwa ya onyala mokandjato kaye, ndele ta kufa mo okamanya nokwe ka umba. Okwa denga Omufilisti mombaba yoshipala, nokamanya oka ningina mombaba yoshipala, ndele Omufilisti ta wile po eombe.
50 Onghee David okwa li a finda Omufilisti noshiumbifo nosho yo nokamanya. Okwa denga Omufilisti nokwe mu dipaa, nonande David ka li e na eongamukonda meke laye.
51 David okwa twikila okutondoka, ndele ta ka kala ofika puye. Opo nee okwa kwata eongamukonda lOmufilisti oo, ndele te li pweya mo moshilaleko shalo, nokwa shilipaleka kutya Omufilisti oo okwa fya mokuteta ko nalo omutwe waye. Eshi Ovafilisti va mona kutya omukwaita wavo omunaenghono okwa fya, ova faduka po.
52 Onghee ovalumenhu Ovaisrael nOvajuda ova hovela okwiingida pombada, nova taataa Ovafilisti okudja kefilu fiyo okomivelo daEkron, nomidimba dOvafilisti oda li da napakana mondjila oyo ya dja kuSaaraim fiyo okuGat nokuEkron.
53 Konima eshi Ovaisrael va aluka kolwoodi, eshi va li tava taataa Ovafilisti, ova kwata ko eenhanda dOvafilisti.
54 Opo nee David okwa kufa omutwe wOmufilisti, ndele te u twala kuJerusalem, ashike oilwifo yOmufilisti okwe i tula metwali laye.
55 Diva eshi Saul a mona David ta i a ka shakeneke Omufilisti, okwa pula Abner ondjai yetangakwaita a ti: “Abner, omumati ou omona walyelye?” Abner okwa nyamukula a ti: “Ohamba, ohandi ku lombwele oshili, kandi shi shii.”
56 Ohamba oya ti: “Pula kutya omunyasha oo omonamati walyelye.”
57 Diva eshi David a aluka kolwoodi, eshi a dipaa Omufilisti, Abner okwe mu kufa, ndele ta i naye kuSaul e na omutwe wOmufilisti meke laye.
58 Opo nee Saul okwa tya kuye: “Mumati ove, xo olyelye?” David okwa nyamukula a ti: “Ame omonamati womupiya woye Isai, Omubetlehem.”
Eshangelo lopedu
^ Eln., “eenhanda.”
^ Eln., “oludimbo limwe nomutamo weke.”
^ Eekilograma 57 lwaapo. Tala Oshiwedelwako B14.
^ Eekilograma 6,84 lwaapo. Tala Oshiwedelwako B14.
^ Ile “shada.”
^ Eelita 22 lwaapo. Tala Oshiwedelwako B14.
^ Eln., “omashini.”
^ Ile “okushada.”
^ Ile “ula nai.”
^ Ile “meehamama.” Eln., “meendjedi dayo.”
^ Ile “ula nai.”
^ Ile “ula nai.”
^ Eln., “eongalo alishe.”
