Samuel wotete 21:1-15
21 Lwanima, David okwe uya muNob, komupristeri Ahimelek. Eshi Ahimelek a ka shakeneka David, okwa hovela okukakama, ndele te mu pula ta ti: “Omolwashike we uyila oku oove auke?”
2 David okwa nyamukula omupristeri Ahimelek a ti: “Ohamba oya lombwela nge ndi ka ninge oshinima shonhumba, ndele oya ti: ‘Ino shiivifila nande oumwe kombinga yoshinima osho handi ku lombwele u ka ninge nosho yo omalombwelo oo nde ku pa.’ Onda ninga elongekido novalumenhu ovanyasha tu shakene konhele yonhumba.
3 Ngeenge ou na po omingome nhano paife, di pe nge, ile u pe nge keshe eshi u na po.”
4 Omupristeri okwa nyamukula David a ti: “Kape na omingome dakwalukeshe, ndele ope na ashike odo diyapuki, notadi dulu ashike okupewa ovalumenhu ovanyasha, ovo va kala kokule novakainhu.”*
5 David okwa nyamukula omupristeri a ti: “Otwa kala filufilu kokule novakainhu ngaashi shito, ngeenge hatu i momalwoodi. Ngeenge shito ovalumenhu ovo ovanyasha ohava kala ve liyapula, ngeenge tava i momalweendo ongaho, mbela molweendo eli le likalekelwa itava kala vayapuki shi dulife shito?”
6 Onghee omupristeri okwe mu pa omingome diyapuki, molwaashi kapa li omingome dakwalukeshe, kakele ashike kwaado dokutalika, odo da kufwa mo metwalihangano laJehova, di pingenwe po naado opo da ningwa mefiku olo.
7 Umwe womovapiya vaSaul omo a li efiku olo, a idililwa metwalihangano koshipala shaJehova. Edina laye oDoeg, Omuedom, omukulunhu wovafita voimuna yaSaul.
8 Opo nee David okwa tya kuAhimelek: “Meemhungulilo doye ku na mo eonga, ile eongamukonda? Inandi uya neongamukonda lange, ile noilwifo yange, molwaashi oshilonga shohamba osha endelela.”
9 Onghee omupristeri okwa tya: “Eongamukonda lOmufilisti Goliat, oo wa dipaela mefilu laEla, omo li li omu konima yokatetahema, la dingilwa elapi. Ngeenge owa hala li ninge po loye, li kufa po, molwaashi olo ashike li li mo omu.” David okwa tya: “Kape na eongamukonda limwe le li fa. Li pe nge.”
10 David okwa fikama mefiku olo, ndele ta twikile okufaduka po Saul nokwa ya kohamba Akis yokuGat.
11 Ovapiya vaAkis ova tya kuye: “Ou ke fi David, ohamba yomedu olo? Ou haye va imba shi na sha naye, eshi va li tava dana tava ti:‘Saul okwa dipaa omayovi,Na David omayovi omilongo’?”
12 Eendjovo odo oda li da kuma omutima waDavid nokwa li a tila unene ohamba Akis yokuGat.
13 Onghee okwa li te liningifa a fa omuyananghwengu moipafi yavo nokwa li te lihumbata a fa elai, eshi a li puvo.* Okwa li ta ningi omadidiliko komivelo, nokwa li ta yeya omayeye taa kunguluka keendjedi daye.
14 Xuuninwa, Akis okwa tya kovapiya vaye: “Omu wete kutya omulumenhu ou omuyananghwengu. Omolwashike mwe mu etela nge?
15 Mbela ame ondi na omhumbwe yovalumenhu ovayananghwengu, opo mu etele nge omulumenhu ou ta ningi oinima youpwidi moipafi yange? Mbela meumbo lange otamu dulu ngoo okuya omulumenhu ou?”
