Samuel wotete 3:1-21
-
Samuel ta ifanwa a ninge omuprofeti (1-21)
3 Lwanima, okamati Samuel oka li taka longele* Jehova koshi yepashukilo laEli. Ashike pefimbo opo Jehova ka li naanaa ha tumu ondjovo yaye kovanhu, nomamoniko kaa li e shiivike apeshe.
2 Efiku limwe Eli okwa li a nangala monduda yaye, nomesho aye okwa li taa ende taa twika, noka li e wete ko nawa.
3 Olamba yaKalunga kaya li natango ya dima, na Samuel okwa li a nangala motembeli* yaJehova, omo mwa li oshikefa shaKalunga.
4 Opo nee Jehova okwa ifana Samuel. Samuel okwa nyamukula a ti: “Aame ou.”
5 Samuel okwa tondokela kuEli, ndele ta ti: “Aame ou, owa ifana nge.” Ashike Eli okwa tya: “Inandi ku ifana. Shuna u ka nangale.” Onghee okwa ya, ndele ta nangala.
6 Jehova okwa ifana vali a ti: “Samuel!” Samuel okwa penduka, nokwa ya kuEli, ndele ta ti: “Aame ou, owa ifana nge.” Ashike Eli okwa tya: “Mumati wange, inandi ku ifana. Shuna u ka nangale.”
7 (Samuel ka li e shii Jehova nawa, noka li a hololelwa natango ondjovo yaJehova.)
8 Onghee Jehova okwa ifana vali oshikando oshititatu a ti: “Samuel!” Opo nee Samuel okwa penduka, nokwa ya kuEli, ndele ta ti: “Aame ou, owa ifana nge.”
Eli okwa li a mona kutya Jehova oye a li ta ifana okamati oko.
9 Onghee Eli okwa tya kuSamuel: “Inda u ka nangale, nongeenge okwe ku ifana, ou na okutya, ‘Jehova, popya, omupiya woye ota pwilikine.’” Samuel okwa ya, ndele ta ka nangala konhele yaye.
10 Jehova okwe uya, ndele ta fikama opo, nokwa ifana ngaashi a li e shi ninga oikando ikwao, a ti: “Samuel, Samuel!” Opo nee Samuel okwa tya: “Popya, omupiya woye ota pwilikine.”
11 Jehova okwa tya kuSamuel: “Tala, ohandi ka ninga oshinima muIsrael, nakeshe ou te ke shi uda ota ka kwatwa kehaluko.*
12 Mefiku olo ohandi ka wanifila Eli ashishe osho nda popya shi na sha neumbo laye, okudja pehovelo fiyo okexulilo.
13 Ou na oku mu lombwela kutya ohandi ka handukila eumbo laye fiyo alushe omolwenyono olo a kala e shii, molwaashi ovanamati vaye ova dina* Kalunga, ashike ine va hanyena.
14 Nomolwaasho nda anena eumbo laEli kutya enyono loukwaneumbo waEli itali futilwa po nandenande komayambo, ile keeshaliyambo.”
15 Samuel okwa nangala fiyo kwa sha, ndele ta yeulula omivelo deumbo laJehova. Samuel okwa li a tila okulombwela Eli emoniko olo.
16 Opo nee Eli okwa ifana Samuel a ti: “Mumati wange, Samuel!” Opo nee Samuel okwa tya: “Aame ou.”
17 Eli okwa pula Samuel a ti: “Okwe ku lombwela etumwalaka lashike? Alikana, ino li holeka nge. Kalunga ne ku katukile onghatu, ngeenge owa holeke nge shimwe shomoinima aishe oyo e ku lombwela.”
18 Onghee Samuel okwe mu lombwela ashishe, noine mu holeka sha nande. Eli okwa tya kuye: “Osha dja kuJehova. Na ninge osho sha yuka momesho aye.”
19 Samuel okwa enda ta kulu, na Jehova okwe mu kwafela, noina efa nande ondjovo yaye imwe i kale inai wanifwa.*
20 Ovaisrael aveshe, okudja kuDan fiyo okuBer-seba, ova li ve shi shii kutya Samuel okwa nangekwa po e li omuprofeti waJehova.
21 Jehova okwa twikila okulihololela Samuel momamoniko muSilo, naasho Jehova okwe shi ninga okupitila mondjovo yaJehova.
Eshangelo lopedu
^ Ile “yakula.”
^ Sha hala okutya, “metwalihangano.”
^ Eln., “omatwi aye otaa ka uma.”
^ Ile “otava tuku.”
^ Eln., “i wile kombada yedu.”
