Samuel wotete 6:1-21
-
Ovafilisti tava shunifa Oshikefa kuIsrael (1-21)
6 Oshikefa shaJehova osha kala moshitukulwa shOvafilisti oule weemwedi heyali.
2 Ovafilisti ova ifana ovapristeri novanyanekeli, ndele tava ti: “Oshikefa shaJehova natu shi ninge ngahelipi? Tu lombweleni nghee tu na oku shi shunifa konhele yasho.”
3 Ova nyamukula va ti: “Ngeenge otamu tumu oshikefa shehangano laJehova Kalunga kaIsrael, omu na oku shi shunifa pamwe neyambo. Ningeni ngaashi tamu dulu mu shi shunife kuye pamwe nelivelombediyambo. Kungaho opo ashike tamu ka veluka notamu ka shiiva kutya omolwashike ehandukilo laye inali dja po punye.”
4 Onghee Ovafilisti ova pula va ti: “Ohatu ke mu tumina elivelombediyambo lashike?” Ova tya: “She likolelela komuvalu wovapangeli vOvafilisti, tumeni oiyelekela itano yoidinda* yoshingoli neemhuku nhano doshingoli, osheshi amushe novapangeli veni omwa hangwa kehandukilo la faafana.
5 Omu na okuninga oiyelekela yoidinda yeni noiyelekela yeemhuku deni, odo tadi nyonauna po edu leni, nomu na okufimaneka Kalunga kaIsrael. Pamwe ota ka kufa po ehandukilo olo li li punye, pukalunga keni nomedu leni.
6 Omolwashike mwa kukutika omitima deni ngaashi Ovaegipiti naFarao ovo va li va kukutika omitima davo? Eshi Kalunga a li e va handukila neenghono, ova lekela Ovaisrael, ndele tava di mo.
7 Paife longekideni etemba lipe neengobe mbali, odo di na outana noinadi enda nale kondjoko. Kutileni eengobe odo di nane etemba, ashike outana vado va shunifeni keumbo, kokule nado.
8 Kufeni Oshikefa shaJehova noku shi tula metemba, ndele oihongwanima yoshingoli oyo tamu mu tumine, i li elivelombediyambo, tamu i tula mokakefa ke li popepi nasho. Opo nee shi tumeni,
9 ndele tamu kala mwe shi tala. Ngeenge osha i nondjila yokuBet-semes, koshitukulwa shasho, osha yela kutya Kalunga oye e tu ningila owii ou u fike apa. Ndele ngeenge hasho, ohatu ka shiiva kutya haye a li e tu handukila. Owii oo owe tu hanga ashike ngahenya.”
10 Ovalumenhu ovo osho va ninga. Ova kufa eengobe mbali, odo di na outana, ndele tave di kutile di nane etemba, noutana ove va idilila peumbo.
11 Opo nee ova tula Oshikefa shaJehova metemba nosho yo okakefa oko ke na eemhuku doshingoli noiyelekela yoidinda yavo.
12 Eengobe odo oda ya da yukilila nondjila oyo ya finda kuBet-semes. Oda kala mondjila oyo ya kula, tadi ende tadi kwena. Inadi kandukila kolulyo, ile kolumosho. Ovapangeli vOvafilisti ova li tava ende ve di shikula efimbo alishe olo fiyo okeengaba daBet-semes.
13 Ovanhu vomuBet-semes ova li tava teya oilya yo-wheat mefilu. Eshi va yelula omesho avo, nova mona Oshikefa, ova li ve shi hafela unene.
14 Eengobe odo oda nana etemba fiyo omepya laJosua, Omubet-semes, noda kanghama omo popepi nemanya la kula. Onghee ova tetaula po etemba, ndele tava yambele Jehova eengobe odo di li exwikiloyambo.
15 Ovalevi ova kufa Oshikefa shaJehova nokakefa oko ka li pamwe nasho, oko ke na oihongwanima yoshingoli, ndele tave i tula kemanya la kula. Ovalumenhu vomuBet-semes ova yambela Jehova omaxwikiloyambo nomayambo amwe vali mefiku olo.
16 Eshi ovapangeli vatano vOvafilisti ve shi mona, ova shuna kuEkron mefiku olo.
17 Oiyelekela yoidinda yoshingoli oyo Ovafilisti va tuma, i li elivelombediyambo kuJehova, oyo ei: shimwe oshaAsdod, shimwe oshaGasa, shimwe oshaAskelon, shimwe oshaGat nashimwe oshaEkron.
18 Omuvalu woiyelekela weemhuku doshingoli owa li u fike pomuvalu woilando aishe yOvafilisti yovapangeli vatano, oilando oyo i na omakuma male, nomikunda domoshilongo omo.
Emanya la kula opo va li va tenheka Oshikefa shaJehova oli li ondombwedi fiyo okunena mepya laJosua, Omubet-semes.
19 Ashike Kalunga okwa dipaa ovalumenhu vomuBet-semes, molwaashi ova tala Oshikefa shaJehova. Okwa dipaa ovanhu 50 070,* novanhu ova li va hovela okulila, molwaashi Jehova okwe va dipaa edipao linyanyalifi.
20 Onghee ovalumenhu vomuBet-semes ova pula va ti: “Olyelye ta dulu okufikama koshipala shaJehova, Kalunga ou omuyapuki, na Kalunga ou ota ka ya kulyelye, ngeenge a di po pufye?”
21 Opo nee ova tuma ovatumwa kovakalimo vomuKiriat-jearim va ti: “Ovafilisti ova alula Oshikefa shaJehova. Ileni mu dje ko nasho.”
