Samuel wotete 8:1-22
8 Eshi Samuel a kulupa, okwa nangeka po ovana vaye va ninge ovatokoli muIsrael.
2 Edina lomonamati woshiveli oJoel, nolaau e mu shikula oAbia. Ova li ovatokoli muBer-seba.
3 Ndele ovanamati vaye kava li va shikula oshihopaenenwa shaye. Ponhele yaasho, ova li ovanalwisho, hava tambula ombubo nohava pengifa ouyuki.
4 Mokweendela ko kwefimbo, ovakulunhu aveshe vOvaisrael ova ongala, ndele tava i kuSamuel, kuRama.
5 Ova tya kuye: “Tala, ove owa kulupa, ashike ovanamati voye itava shikula oshihopaenenwa shoye. Tu hoololela paife ohamba i tu tokole ngaashi oiwana ikwao aishe.”
6 Ndele osho va popya osha li sha udifa nai* Samuel, eshi va ti: “Tu pa ohamba i tu tokole.” Opo nee Samuel okwa ilikana kuJehova,
7 na Jehova okwa tya kuSamuel: “Pwilikina kwaashishe osho ovanhu tave ku lombwele, osheshi haave va efa po, ndele aame va efa po, ou ndi li ohamba yavo.
8 Fiyo okunena otava ningi ngaashi va li va ninga efiku olo nde va kufa muEgipiti. Ova kala hava efa nge po, ndele tava longele ookalunga vamwe, naasho osho tave ku ningile.
9 Pwilikina kuvo. Ashike va londwela filufilu; va lombwela kutya ohamba, oyo tai ke va pangela, otai ka kala i na oufemba woku va pula oinima yonhumba.”
10 Onghee ovanhu ovo va li tava pula Samuel e va hoololele ohamba, okwe va lombwela ashishe osho Jehova a popya.
11 Okwa ti: “Ohamba, oyo tai ke mu pangela, otai ka kala i na oufemba wokuninga oinima ei: Otai ka kufa po ovanamati veni notai ke va tula momatemba ayo, ndele tai ke va ninga ovalondinghambe vayo, navamwe otava ka pashukila omatemba ayo.
12 Otai ka nangeka po vamwe ve li omalenga ayo taa pashukile omayovi, nomalenga taa pashukile omilongo nhano, navamwe otave ke i pululila, tava ka teya oilya yayo notava ka longa oilwifo yayo yomoita nosho yo oikwanoipangifo yomatemba ayo.
13 Otai ka kufa po ovanakadona veni va kale hava ningi omaadi okuvava,* ovateleki novambaki.
14 Otai ka kufa ko oitukulwa iwa yomapya eni, oikunino yeni yomandjebele nomashila eemono deni, ndele tai i yandje kovapiya vayo.
15 Otai ka kufa ko oshitimulongo shomapya eni, oilya noikunino yeni yomandjebele, ndele tai i yandje komalenga ayo omombala nokovapiya vayo.
16 Otai ka kufa po yo ovapiya veni ovalumenhu novakainhu, eengobe deni, odo da ondoka, neendongi deni, ndele tai ke di longifa oilonga yayo.
17 Otai ka kufa ko oshitimulongo sheedi noikombo yeni, notamu ka ninga ovapiya vayo.
18 Efimbo otali uya eshi tamu ka lila omolwohamba oyo mwa hoolola nye vene, ashike Jehova ite ke mu nyamukula mefiku olo.”
19 Ashike ovanhu ova anya okupwilikina kwaasho Samuel e va lombwela, ndele tava ti: “Ahawe, fye otwa hala okukala nohamba tai tu pangele.
20 Opo nee ohatu ka kala ngaashi oiwana ikwao aishe, nohamba yetu otai ke tu tokola, tai tu wilike notai ka lwifa ovatondi vetu.”
21 Konima eshi Samuel a uda ashishe osho ovanhu va popya, okwe shi endulula, opo Jehova e shi ude.
22 Jehova okwa lombwela Samuel a ti: “Pwilikina kuvo, ndele to nangeke po ohamba i va pangele.” Onghee Samuel okwa lombwela ovalumenhu Ovaisrael a ti: “Keshe umwe womunye na shune koshilando shavo.”
