Eehamba eenhivali 11:1-21
11 Eshi Atalia, ina yaAhasia, a mona kutya omonamati waye okwa fya, okwa fikama, ndele ta dipaa aveshe ovo va li ve na okuninga eehamba.*
2 Ashike Joseba, omonakadona wohamba Jehoram, omumwaina waAhasia, okwa kufa Joas, omonamati waAhasia, ndele te mu vake mo movanamati vohamba, ovo va li ve na okudipawa, ndele ye nomutekuli waye te va kaleke monduda yomeni yokunangala. Ova pondola mokukala ve mu holeka Atalia, onghee Atalia ine mu dipaa.
3 Joseba okwa kala naye oule weedula hamano, a hondama meumbo laJehova, ofimbo Atalia a li ta pangele oshilongo.
4 Momudo omutiheyali, Jehoiada okwa tuma a ka talelwe omalenga taa pashukile omafele ovanangeli Ovakari nosho yo ovanangeli* vomombala, ndele te va ifana ve uye keumbo laJehova. Okwa ninga eudafanotwokumwe* navo, ndele te va anifa kulo meumbo laJehova, opo nee okwe va ulikila omonamati wohamba.
5 Okwe va lombwela, a ti: “Eshi osho mu na okuninga: Ongudu yeni imwe otai ka kala i na oshinakuwanifwa mEshabata, notai ka kala tai pashukile filufilu eumbo* lohamba.
6 Ongudu ikwao otai ka kala pOshivelo shEkanghameno, nongudu onhinhatu otai ka kala poshivelo osho shi li konima yonhele opo hapa kala ovakwaita vomombala. Otamu ka kala tamu ningi omalufo okupashukila eumbo.
7 Eengudu deni dopavali, odo itadi yakula mEshabata, odi na okupashukila filufilu eumbo laJehova, opo di amene ohamba.
8 Omu na okudingilila ohamba keembinga adishe, keshe umwe e kwete oilwifo yaye meke. Keshe oo ta pitilile ovakwaita, oku na okudipawa. Shikuleni ohamba keshe apa tai i.”*
9 Omalenga taa pashukile omafele okwa ninga naanaa ngaashi a lombwelwa komupristeri Jehoiada. Keshe umwe okwa kufa ovalumenhu vaye, ovo va hangwa tava yakula mEshabata, pamwe naavo va hangwa itava yakula mEshabata, ndele tave uya komupristeri Jehoiada.
10 Onghee omupristeri okwa yandja komalenga taa pashukile omafele omaonga noikelelifo, oyo ya li yohamba David, oyo ya li meumbo laJehova.
11 Ovanangeli vomombala ova kala peenhele davo, keshe umwe e kwete oilwifo meke laye, okudja kolulyo leumbo fiyo okolumosho lalo, poaltari nosho yo peumbo, va dingilila ohamba.
12 Opo nee Jehoiada okwa eta omonamati wohamba pondje, ndele te mu dike oshikoroni* noku mu tenheka Oumbangi.* Ove mu ninga ohamba, ndele tave mu vaeke. Ova hovela okupandula omake, tava ti: “Ohamba nai kale nomwenyo mule!”
13 Eshi Atalia a uda ovanhu tava tondoka, okwe uya diva kovanhu, keumbo laJehova.
14 Opo nee okwa mona ohamba ya fikama pongudimanya, she likolelela konghedindjikilile. Omalenga novashiki vomanghuma ova li nohamba, novanhu aveshe vomoshilongo ova li va hafa notava shiki omanghuma. Opo nee Atalia okwa pombaula oikutu yaye, ndele ta ingida ta ti: “Oukengeleledi! Oukengeleledi!”
15 Ashike omupristeri Jehoiada okwa lombwela omalenga taa pashukile omafele, oo a nangekwa po a kwatele komesho etangakwaita, ndele ta ti kuo: “Mu kufeni mo mokati kovakwaita, ndele ngeenge ope na oo te mu shikula, mu dipaeni neongamukonda!” Molwaashi omupristeri okwa ti: “Inamu dipaela Atalia meumbo laJehova.”
16 Onghee ove mu kwata, ndele eshi va fika poshivelo opo hapa piti eenghambe, ngeenge tadi i meumbo* lohamba, ove mu dipaela opo.
17 Opo nee Jehoiada okwa ninga ehangano pokati kaJehova nohamba nosho yo novanhu, kutya otava twikile okukala oshiwana shaJehova, nokwa ninga yo ehangano pokati kohamba novanhu.
18 Konima yaasho, ovanhu aveshe vomoshilongo osho ova ya keumbo* laBaal, ndele tava ngumauna po eealtari daye, va nyanyaula po oihongwafano yaye filufilu, nova dipaela Mattan, omupristeri waBaal, komesho yeealtari.
Opo nee omupristeri okwa nangeka po ovapashukili, va pashukile eumbo laJehova.
19 Natango okwa kufa omalenga taa pashukile omafele, ovanangeli ve likalekelwa,* ovanangeli vomombala nosho yo ovanhu aveshe vomoshilongo, opo va findikile ohamba okudja keumbo laJehova, nova ya keumbo* lohamba, va pita poshivelo shovanangeli vomombala. Opo nee okwa kala kolukalwapangelo leehamba.
20 Onghee ovanhu aveshe vomoshilongo ova li va hafa, nomoshilando omwa li mu na ombili, molwaashi ova dipaela Atalia peumbo lohamba neongamukonda.
21 Joas okwa li e na eedula heyali, eshi a ninga ohamba.
Eshangelo lopedu
^ Ile “vomoludalo leehamba.”
^ Eln., “eenhondoki.”
^ Ile “ehangano.”
^ Ile “ombala.”
^ Eln., “ngeenge tai di mo, nongeenge tai uya mo.”
^ Ile “oshikoroni shiyapuki.”
^ Oumbangi oo otashi dulika wa li hau tenhekwa komutwe wohamba u li edimbulukifo li na sha nokudiinina Omhango.
^ Ile “mombala.”
^ Ile “kotembeli.”
^ Eln., “Ovakari.”
^ Ile “kombala.”
