Eehamba eenhivali 14:1-29
14 Momudo omutivali wepangelo laJoas, omonamati waJoahas, ohamba yaIsrael, Amasia, omonamati waJoas, ohamba yaJuda, okwa ninga ohamba.
2 Amasia okwa li e na eedula 25, eshi a ninga ohamba, nokwa pangela muJerusalem oule weedula 29. Edina laina oJoaddin womuJerusalem.
3 Okwa twikila okulonga osho sha yuka momesho aJehova, ashike hangaashi xekulululwa, David. Okwa longa ashishe osho xe, Joas, a li a ninga.
4 Ashike eenhele dokoikulundudu kada li da hanaunwa po, novanhu ova li natango tava yambele keenhele dokoikulundudu nokutwimina ko omayambo.
5 Diva eshi ouhamba wa pamekwa koshi yepangelo laye, okwa dipaa ovapiya vaye, ovo va dipaa xe, ohamba.
6 Ashike ina dipaa ovanamati vovadipai, metwokumwe noshipango shaJehova, osho sha shangwa membo lOmhango yaMoses, tashi ti: “Ooxe kave na okudipawa omolwoshinima osho ovana va ninga, novana kave na okudipawa omolwoshinima osho ooxe va ninga; omunhu oku na ashike okudipawa omolwenyono laye mwene.”
7 Okwa dipaela Ovaedom mEfilu lOmongwa, ovalumenhu 10 000, ndele ta kwata ko Sela moita, nedina lasho ola ninga Jokteel, fiyo okunena.
8 Opo nee Amasia okwa tuma ovatumwa kuJoas, ohamba yaIsrael, omonamati waJoahas, omonamati waJehu, a ti: “Ila, tu lwifafane molwoodi.”*
9 Joas, ohamba yaIsrael, okwa tuma etumwalaka kuAmasia, ohamba yaJuda, a ti: “Oshimeno shomakiya shokuLibanon osha tumina omusederi wokuLibanon etumwalaka, sha ti: ‘Yandja omonakadona woye a ninge omukulukadi womonamati wange.’ Ndele oshifitukuti shokuLibanon osha enda po, ndele tashi lyata oshimeno shomakiya.
10 Oshoshili kutya owa hanauna po Edom, onghee omutima woye owe linenepeka. Hafela efimano loye, ndele kala meumbo* loye mwene. Omolwashike u na okulietela oshiponga nokuteka po, ove pamwe naJuda?”
11 Ashike Amasia ina pwilikina.
Onghee Joas, ohamba yaIsrael, okwa ya, ndele ta ka shakeneka Amasia, ohamba yaJuda, molwoodi, puBet-semes shaJuda.
12 Juda okwa findwa kuIsrael, onghee keshe umwe okwa faduka po, a ya keumbo* laye.
13 Joas, ohamba yaIsrael, okwa kwata po Amasia, ohamba yaJuda, omonamati waJoas, omonamati waAhasia, puBet-semes. Opo nee ove uya kuJerusalem, ndele ta teyaula po ekuma laJerusalem, okudja pOshivelo shaEfraim fiyo okOhuke yOshivelo, oule womaludimbo 400.*
14 Okwa kufa oshingoli ashishe, oshisilveri noinima aishe oyo a hanga meumbo laJehova, naayo a hanga meemhungulilo domeumbo* lohamba nosho yo eenghwate. Opo nee okwa shuna kuSamaria.
15 Ondjokonona aishe yaJoas, osho a ninga nosho yo eenghono daye nanghee a lwifa Amasia, ohamba yaJuda, mbela inai shangwa membo londjokonona yopefimbo leehamba daIsrael?
16 Opo nee Joas okwa nangekwa pooxekulululwa, nokwa pakwa muSamaria, peehamba daIsrael. Omonamati waye, Jerobeam,* okwa ninga ohamba ponhele yaye.
17 Amasia, ohamba yaJuda, omonamati waJoas, okwa kala nomwenyo eedula 15, konima yefyo laJoas, omonamati waJoahas, ohamba yaIsrael.
18 Ondjokonona aishe yaAmasia, mbela inai shangwa membo londjokonona yopefimbo leehamba daJuda?
19 Lwanima, ova pangela omhangela, ve mu ponokele muJerusalem, ashike okwa ya onhapo kuLakis, ndele ova tuma ovalumenhu kuLakis, ve mu shikule nove mu dipaela oko.
20 Onghee ova dja ko ve mu humbata keenghambe, nokwa pakwa pooxekulululwa muJerusalem, mOshilando shaDavid.
21 Ovanhu aveshe vomuJuda ova kufa Asaria,* oo a li e na eedula 16, ndele tave mu ningi ohamba ponhele yaxe, Amasia.
22 Okwa tungulula Elat, ndele te shi shunifa kuJuda, konima eshi ohamba* ya nangekwa pooxekulululwa.
23 Momudo omuti-15 wepangelo laAmasia, omonamati waJoas, ohamba yaJuda, Jerobeam, omonamati waJoas, ohamba yaIsrael, okwa ninga ohamba muSamaria, nokwa pangela oule weedula 41.
24 Okwa twikila okulonga osho shii momesho aJehova. Ina efa po omanyono aeshe oo Jerobeam, omonamati waNebat, a ningifa Israel shi nyone.
25 Okwa shunifa po eengaba daIsrael, okudja kuLebo-hamat* fiyo okefuta laAraba,* ngaashi Jehova, Kalunga kaIsrael, a popya okupitila momupiya waye, Jona, omonamati waAmittai, omuprofeti a dja kuGat-hefer.
26 Jehova okwa mona nghee Ovaisrael va hepekwa neenghono. Kape na oo a li a xupa mo a kwafele Ovaisrael, nokuli naavo vehe na ekwafo lasha, ile inava fimana.
27 Jehova okwa li a udaneka kutya ita ka xulifa po edina laIsrael kombada yedu, onghee okwe va xupifa neke laJerobeam, omonamati waJoas.
28 Ondjokonona aishe yaJerobeam, ashishe osho a ninga, eenghono daye, nghee a lwa, naashi a shunifa Damaskus naHamat kuJuda, muIsrael, mbela inai shangwa membo londjokonona yopefimbo leehamba daIsrael?
29 Opo nee Jerobeam okwa nangekwa pooxekulululwa, pamwe neehamba daIsrael. Omonamati waye, Sakaria, okwa ninga ohamba ponhele yaye.
Eshangelo lopedu
^ Ile “tu shakene oshipala noshipala.”
^ Ile “mombala.”
^ Eln., “etwali.”
^ Eemeta 178 lwaapo. Tala Oshiwedelwako B14.
^ Ile “domombala.”
^ Sha hala okutya, Jerobeam omutivali.
^ Tali ti “Jehova okwa Kwafela.” Okwa ifanwa yo Ussia 2Ee 15:13; 2Om 26:1-23; Jes 6:1 nomuSak 14:5.
^ Sha hala okutya, xe Amasia.
^ Ile “poshivelo shaHamat.”
^ Sha hala okutya, Efuta lOmongwa, ile Efuta la Fya.
