Eehamba eenhivali 15:1-38
15 Momudo omuti-27 wepangelo laJerobeam,* ohamba yaIsrael, Asaria,* omonamati waAmasia, ohamba yaJuda, okwa ninga ohamba.
2 Asaria okwa li e na eedula 16, eshi a ninga ohamba, nokwa pangela muJerusalem oule weedula 52. Edina laina oJekolia womuJerusalem.
3 Okwa twikila okulonga osho sha yuka momesho aJehova, ngaashi ashike xe, Amasia, a li a ninga.
4 Ashike eenhele dokoikulundudu kada li da hanaunwa po, novanhu ova li natango tava yambele keenhele dokoikulundudu nokutwimina ko omayambo.
5 Jehova okwa handukila ohamba noya kala omunashilundu, fiyo omefiku omo ya fya; oya kala meumbo li li lile, ofimbo Jotam, omonamati wohamba, a li ta pashukile eumbo,* ta tokola ovanhu vomoshilongo.
6 Ondjokonona aishe yaAsaria, ashishe osho a ninga, mbela inai shangwa membo londjokonona yopefimbo leehamba daJuda?
7 Opo nee Asaria okwa nangekwa pooxekulululwa, nove mu paka pooxekulululwa mOshilando shaDavid. Omonamati waye, Jotam, okwa ninga ohamba ponhele yaye.
8 Momudo omuti-38 wepangelo laAsaria, ohamba yaJuda, Sakaria, omonamati waJerobeam, okwa ninga ohamba yaIsrael muSamaria, nokwa pangela oule weemwedi hamano.
9 Okwa longa osho shii momesho aJehova, ngaashi ashike ooxekulululwa va ninga. Ina efa po okunyona ngaashi Jerobeam, omonamati waNebat, oo a ningifa Israel shi nyone.
10 Opo nee Sallum, omonamati waJabes, okwe mu pangelela omhangela, ndele te mu dipaele puIbleam. Konima eshi e mu dipaa, okwa ninga ohamba ponhele yaye.
11 Ondjokonona aishe yaSakaria oya shangwa membo londjokonona yopefimbo leehamba daIsrael.
12 Osho osha wanifa po ondjovo yaJehova, oyo a popya okupitila muJehu, a ti: “Omapupi ane ovanamati voye, otaa kala omutumba kolukalwapangelo laIsrael.” Naasho osho naanaa sha ningwa.
13 Sallum, omonamati waJabes, okwa ninga ohamba momudo omuti-39 wepangelo laUssia, ohamba yaJuda, nokwa pangela muSamaria omwedi aushe.
14 Opo nee Menahem, omonamati waGadi, okwa dja kuTirsa, ndele ta i kuSamaria nokwa dipaela Sallum, omonamati waJabes, muSamaria. Konima eshi e mu dipaa, okwa ninga ohamba ponhele yaye.
15 Ondjokonona aishe yaSallum nosho yo omhangela oyo a li a pangela, oya shangwa membo londjokonona yopefimbo leehamba daIsrael.
16 Opo nee Menahem okwe uya a dja kuTirsa, ndele ta hanauna po Tifsak noshitukulwa shasho, molwaashi inave mu yeululila omivelo dasho; okwe shi hanauna po, novakainhu ovafimba okwe va taula momadimo.
17 Momudo omuti-39 wepangelo laAsaria, ohamba yaJuda, Menahem, omonamati waGadi, okwa ninga ohamba yaIsrael nokwa pangela muSamaria oule weedula omulongo.
18 Okwa twikila okulonga osho shii momesho aJehova. Ina efa po okunyona, ngaashi Jerobeam, omonamati waNebat, oo a ningifa Israel shi nyone, okukalamwenyo kwaye akushe.
19 Pul, ohamba yaAssiria, okwe uya moshilongo, na Menahem okwa yandja kuPul oitalenti* 1 000 yoshisilveri, opo naye e mu yambidide a pameke ouhamba waye.
20 Opo Menahem a dule okwoongela oshisilveri noku shi yandja kohamba yaAssiria, okwe shi kufa kovalumenhu aveshe Ovaisrael, ovo va tumbala nova punapala, eesekeli* 50 doshisilveri. Opo nee ohamba yaAssiria oya piluka ko, noinai kala mo moshilongo.
21 Ondjokonona aishe yaMenahem, ashishe osho a ninga, mbela inai shangwa membo londjokonona yopefimbo leehamba daIsrael?
22 Opo nee Menahem okwa nangekwa pooxekulululwa. Omonamati waye, Pekahia, okwa ninga ohamba ponhele yaye.
23 Momudo omuti-50 wepangelo laAsaria, ohamba yaJuda, Pekahia, omonamati waMenahem, okwa ninga ohamba yaIsrael muSamaria, nokwa pangela oule weedula mbali.
24 Okwa twikila okulonga osho shii momesho aJehova. Ina efa po okunyona ngaashi Jerobeam, omonamati waNebat, oo a ningifa Israel shi nyone.
25 Opo nee omuyakuli waye, Peka, omonamati waRemalia, okwe mu pangelela omhangela, nokwe mu dipaela muSamaria, moshungongulu ya pama yeumbo* lohamba, pamwe naArgob nosho yo Arie. Okwa li e li pamwe novalumenhu 50 vokuGilead, nokonima eshi e mu dipaa, okwa ninga ohamba ponhele yaye.
26 Ondjokonona aishe yaPekahia, ashishe osho a ninga, oya shangwa membo londjokonona yopefimbo leehamba daIsrael.
27 Momudo omuti-52 wepangelo laAsaria, ohamba yaJuda, Peka, omonamati waRemalia, okwa ninga ohamba yaIsrael muSamaria, nokwa pangela oule weedula 20.
28 Okwa twikila okulonga osho shii momesho aJehova. Ina efa po okunyona ngaashi Jerobeam, omonamati waNebat, oo a ningifa Israel shi nyone.
29 Pefimbo laPeka, ohamba yaIsrael, Tiglat-pileser, ohamba yaAssiria, okwa ponokela nokwa kwata ko Ijon, Abel-bet-maaka, Janoak, Kedes, Hasor, Gilead naGalilea, oshitukulwa ashishe shaNaftali, nokwa kufa mo ovakalimo, ndele te va twala moukwatwa kuAssiria.
30 Opo nee Hosea, omonamati waEla, okwa pangelela Peka, omonamati waRemalia, omhangela, nokwe mu ponokela, ndele te mu dipaa. Momudo omuti-20 wepangelo laJotam, omonamati waUssia, Hosea okwa ninga ohamba ponhele yaye.
31 Ondjokonona aishe yaPeka, ashishe osho a ninga, oya shangwa membo londjokonona yopefimbo leehamba daIsrael.
32 Momudo omutivali wepangelo laPeka, omonamati waRemalia, ohamba yaIsrael, Jotam, omonamati waUssia, ohamba yaJuda, okwa ninga ohamba.
33 Okwa li e na eedula 25, eshi a ninga ohamba, nokwa pangela muJerusalem oule weedula 16. Edina laina oJerusa, omonakadona waSadok.
34 Okwa twikila okulonga osho sha yuka momesho aJehova, ngaashi ashike xe, Ussia, a li a ninga.
35 Ashike eenhele dokoikulundudu kada li da hanaunwa po, novanhu ova li natango tava yambele keenhele dokoikulundudu nokutwimina ko omayambo. Jotam oye a li a tunga oshivelo shopombada sheumbo laJehova.
36 Ondjokonona aishe yaJotam, osho a ninga, mbela inai shangwa membo londjokonona yopefimbo leehamba daJuda?
37 Pefimbo opo, Jehova okwa hovela okutuma Resin, ohamba yaSiria, naPeka, omonamati waRemalia, va ka lwife Juda.
38 Opo nee Jotam okwa nangekwa pooxekulululwa, nokwa pakwa pooxekulululwa mOshilando shaDavid, xekulululwa. Omonamati waye, Ahas, okwa ninga ohamba ponhele yaye.
Eshangelo lopedu
^ Sha hala okutya, Jerobeam omutivali.
^ Tali ti “Jehova okwa Kwafela.” Okwa ifanwa yo Ussia 2Ee 15:13; 2Om 26:1-23; Jes 6:1 nomuSak 14:5.
^ Ile “ombala.”
^ Oshitalenti shimwe oshi fike peekilograma 34,2. Tala Oshiwedelwako B14.
^ Osekeli imwe oi fike peegrama 11,4. Tala Oshiwedelwako B14.
^ Ile “yombala.”
