Eehamba eenhivali 16:1-20
16 Momudo omuti-17 wepangelo laPeka, omonamati waRemalia, Ahas, omonamati waJotam, ohamba yaJuda, okwa ninga ohamba.
2 Ahas okwa ninga ohamba, eshi a li e na eedula 20, nokwa pangela muJerusalem oule weedula 16. Ka li a longa osho sha yuka momesho aJehova, Kalunga kaye, ngaashi xekulululwa, David, a li a ninga.
3 Ponhele yaasho, okwa shikula ondjila yeehamba daIsrael, nokwa endifa nokuli ovanamati vaye momundilo, ta shikula oilonga itondifa, oyo ya li hai longwa koiwana, oyo Jehova a taataa mo moipafi yOvaisrael.
4 Okwa kala yo ta yambe omayambo nomatwiminoyambo keenhele dokoikulundudu, koikulundudu nosho yo koshi yomuti keshe wa kula.
5 Onghee Resin, ohamba yaSiria, nosho yo Peka, omonamati waRemalia, ohamba yaIsrael, ove uya okulwifa Jerusalem. Ova nangela Ahas, ashike inava dula okukwata ko oshilando.
6 Pefimbo opo, Resin, ohamba yaSiria, okwa shunifa Elat kuEdom, konima eshi a taataa mo Ovajuda* muElat. Ovaedom ova ya muElat, nova kala hava di omo fiyo okunena.
7 Opo nee Ahas okwa tuma ovatumwa kuTiglat-pileser, ohamba yaAssiria, ta ti: “Ame omupiya woye nomonamati woye. Ila u xupife nge momake ohamba yaSiria nomomake ohamba yaIsrael, odo tadi ponokele nge.”
8 Opo nee Ahas okwa kufa oshisilveri noshingoli, osho sha li meumbo laJehova nosho yo meemhungulilo deumbo* lohamba, ndele ta tumine ohamba yaAssiria ombubo.
9 Ohamba yaAssiria oya nyamukula eindilo laAhas, ndele ta i i kuDamaskus noku shi kwata ko, noya twala ovanhu vamo moukwatwa kuKir, ndele tai dipaa Resin.
10 Onghee ohamba Ahas oya ya i ka shakeneke Tiglat-pileser, ohamba yaAssiria, kuDamaskus. Eshi ohamba ya mona oaltari, oyo ya li muDamaskus, oya tumina omupristeri Uria ondungefaneko yoaltari, tai ulike omutungilo wayo nanghee ya longwa.
11 Omupristeri Uria okwa tunga oaltari metwokumwe newiliko alishe olo ohamba Ahas ya tuma okudja kuDamaskus. Omupristeri Uria okwa mana oku i tunga, ofimbo ohamba Ahas inai dja ko kuDamaskus.
12 Eshi ohamba ya aluka kuDamaskus, oya mona oaltari, ndele tai i koaltari oyo nokuyambela ko omayambo.
13 Oya twikila okuyambela ko omaxwikiloyambo ayo, noya twimina ko eendjayambo dayo koaltari; oya tila ko yo oikunwayambo yayo, noya shamina ko ohonde yomayambo ayo oukumwe.
14 Opo nee oya kufa po oaltari yongopolo, oyo ya li moipafi yaJehova komesho yeumbo, pokati koaltari ipe neumbo laJehova, ndele tai i tula kombinga yokolundume loaltari yayo.
15 Ohamba Ahas oya lombwela omupristeri Uria, ya ti: “Koaltari inene, twimina ko exwikiloyambo ongula nosho yo eendjayambo konguloshi, exwikiloyambo lohamba neendjayambo dayo nosho yo omaxwikiloyambo, eendjayambo noikunwayambo yovanhu aveshe. Ou na yo okushamina ko ohonde aishe yomaxwikiloyambo nosho yo ohonde aishe yomayambo makwao. Shi na sha noaltari yongopolo, aame ndi na okutokola osho tashi ka ningilwa ko.”
16 Omupristeri Uria okwa ninga ashike osho ohamba Ahas ya popya.
17 Natango, ohamba Ahas oya teta oubloka vomomunghulo voutemba moutukulwa vanini, ndele tai kufa ko eembaali kuvo. Oya kufa yo etemba, olo la li la tenhekwa keengobe dongopolo, odo da li tadi li yambidida, ndele tai li tula kemanya.
18 Oya kufa po okatala oko ka li ka tungwa popepi neumbo, oko ka li haka longifwa mEshabata, ndele tai pate ondjila oyo ya dja keumbo lohamba ya finda keumbo laJehova; oye shi ninga omolwohamba yaAssiria.
19 Ondjokonona aishe yaAhas, osho a ninga, mbela inai shangwa membo londjokonona yopefimbo leehamba daJuda?
20 Opo nee Ahas okwa nangekwa pooxekulululwa, nokwa pakwa pooxekulululwa mOshilando shaDavid. Omonamati waye, Hiskia,* okwa ninga ohamba ponhele yaye.
