Eehamba eenhivali 21:1-26
21 Manasse okwa ninga ohamba, eshi a li e na eedula 12, nokwa pangela muJerusalem oule weedula 55. Edina laina oHefsiba.
2 Okwa longa osho shii momesho aJehova, ta shikula oilonga itondifa, oyo ya longwa koiwana, oyo Jehova a taataa mo moipafi yOvaisrael.
3 Okwa tungulula eenhele dokoikulundudu, odo xe, Hiskia, a hanauna po, a ningila Baal eealtari nokwa ninga opala iyapuki,* ngaashi ashike Ahab, ohamba yaIsrael, a ninga. Okwe linyongamena etangakwaita alishe lokeulu noku li longela.
4 Okwa tunga yo eealtari meumbo laJehova, olo Jehova a popya kombinga yalo, a ti: “MuJerusalem, ohandi ka tula mo edina lange.”
5 Okwa tungila etangakwaita alishe lokeulu eealtari moihale ivali yomeumbo laJehova.
6 Okwa endifa omonamati waye momundilo, a li omhule, a li ha tale momukonda, e likongela ovo hava kwatafana neemhepo nosho yo ovaxunganeki vonakwiiwa. Okwa longa osho shii unene momesho aJehova, opo e mu nyemateke.
7 Okwa tula oshihongwafano shopala iyapuki,* osho a honga, meumbo, olo Jehova a lombwela David nosho yo omonamati waye, Salomo, kombinga yalo, a ti: “Meumbo eli nomuJerusalem, oo nda hoolola momapata aeshe aIsrael, ohandi ka tula mo edina lange li kale mo fiyo alushe.
8 Itandi ka efa vali Ovaisrael va endaende medu olo nda pa ooxekulululwa, ngeenge otava dulika filufilu kwaashishe osho nde va lombwela, kOmhango aishe, oyo omupiya wange, Moses, e va lombwela va shikule.”
9 Ashike inava dulika, na Manasse okwa kala te va pukifa, e va ningifa va longe osho shii unene ve dule oiwana oyo Jehova a hanauna po moipafi yOvaisrael.
10 Jehova okwa twikila okupopya okupitila movapiya vaye, ovaprofeti, ta ti:
11 “Manasse, ohamba yaJuda, okwa ninga oinima aishe ei itondifa; okwa katuka unene shihe li pandunge e dule Ovaamori aveshe, ovo ve mu tetekela, nokwa nyonifa Juda noikalunga yaye itondifa.*
12 Onghee hano, Jehova, Kalunga kaIsrael, ota ti ngaha: ‘Ohandi ka etela Jerusalem naJuda oupyakadi, nakeshe oo te ke shi uda ota ka kwatwa kehaluko.*
13 Ohandi ka tokola Jerusalem monghedi ya faafana naayo nda tokola Samaria nongaashi nda tokola eumbo laAhab.* Ohandi ka komba Jerusalem noku shi yeleka, ngaashi omunhu ta pushula okayaxa noku ka yeleka, te ka pushula, ndele te ka pwipwike po.
14 Ohandi ka efa po oshixupe shefyuululo lange, nohandi ke shi yandja momake ovatondi vasho. Otashi ka twalwa moukwatwa, noinima yasho otai ka nyekwa ko kovatondi vasho aveshe,
15 molwaashi osha longa osho shii momesho ange, nosha twikila okunyemateka nge, okudja kefiku olo ooxekulululwa va dja muEgipiti fiyo okunena.’”
16 Kakele kenyono laye, eshi a ningifa Juda shi nyone, mokuninga osho shii momesho aJehova, Manasse okwa tilashi yo ohonde ihapu unene, eshi a dipaa ovanhu muJerusalem, okudja kombinga imwe fiyo okuikwao.
17 Ondjokonona aishe yaManasse, ashishe osho a ninga nomanyono oo a ninga, mbela inai shangwa membo londjokonona yopefimbo leehamba daJuda?
18 Opo nee Manasse okwa nangekwa pooxekulululwa, nokwa pakwa moshikunino shomeumbo laye, moshikunino shaUssa. Omonamati waye, Amon, okwa ninga ohamba ponhele yaye.
19 Amon okwa ninga ohamba, eshi a li e na eedula 22, nokwa pangela muJerusalem oule weedula mbali. Edina laina oMesullemet, omonakadona waHarus, a dja kuJotba.
20 Okwa twikila okulonga osho shii momesho aJehova, ngaashi ashike xe, Manasse, a li a ninga.
21 Okwa kala nokweenda meendjila daxe, nokwa twikila okulongela nokulinyongamena oikalunga itondifa, oyo xe a longela.
22 Onghee okwa efa po Jehova, Kalunga kooxekulululwa, noina enda mondjila yaJehova.
23 Xuuninwa, ovapiya vaAmon ove mu pangelela omhangela, nova li va dipaela ohamba meumbo layo.
24 Ashike ovanhu vomoshilongo ova dipaa aveshe, ovo va li va pangelela ohamba Amon omhangela, nova ninga omonamati waye, Josia, ohamba ponhele yaye.
25 Ondjokonona aishe yaAmon, osho a ninga, mbela inai shangwa membo londjokonona yopefimbo leehamba daJuda?
26 Onghee ove mu paka mombila yaye moshikunino shaUssa. Omonamati waye, Josia, okwa ninga ohamba ponhele yaye.
Eshangelo lopedu
^ Tala Omafatululo oitya.
^ Tala Omafatululo oitya.
^ Oshitya shOshiheberi otashi dulika sha pambafana noshitya “onyata,” nohashi longifwa okuyukifwa koinima itondifa.
^ Eln., “omatwi aye otaa ka uma.”
^ Outumbulilo wOshiheberi owa yukifwa kuKalunga ta longifa ongodi yokumeta, oyo hai longifwa kovatungi, opo a tokole oshiwana shaye.
