Eehamba eenhivali 23:1-37
23 Onghee ohamba oya tuma ondjovo, nova ongaleka ovakulunhu aveshe vomuJuda novomuJerusalem.
2 Konima yaasho, ohamba oya ya keumbo laJehova pamwe novalumenhu aveshe vomuJuda, ovakalimo aveshe vomuJerusalem, ovapristeri novaprofeti, ovanhu aveshe, okudja kwaao munini fiyo okomukulunhu. Oye va leshela eendjovo adishe odo di li membo lehangano, olo la hangwa meumbo laJehova.
3 Ohamba oya fikama pongudimanya, ndele tai ningi ehangano* koshipala shaJehova, kutya otai ka shikula Jehova nokudiinina oipango yaye, omadimbulukifo aye neenghedimhango daye nomutima wayo aushe nosho yo nomwenyo* wayo aushe, mokuwanifa po eendjovo dehangano, odo da shangwa membo olo. Ovanhu aveshe ova twa kumwe nehangano olo.
4 Ohamba oya lombwela omupristeri munene, Hilkia, ovapristeri vamwe novapashukili vopoivelo va kufe motembeli yaJehova oilongifo aishe, oyo ya ningilwa Baal, opala iyapuki* nosho yo omatangakwaita aeshe okeulu. Opo nee okwe i xwikila kondje yaJerusalem, momapya oo e li mefilu laKidron, ndele ta twala omute wayo kuBetel.
5 Onghee okwa taataa mo ovapristeri voikalunga yokoilongo, ovo va nangekwa po keehamba daJuda, opo va twimine omayambo keenhele dokoikulundudu, odo di li moilando yaJuda nopomudingonoko waJerusalem nosho yo ovo hava twimine omayambo kuBaal, ketango, komwedi nokeengudu deenyofi nosho yo komatangakwaita aeshe okeulu.
6 Okwa kufa opala iyapuki* meumbo laJehova, ndele te i twala kondje yaJerusalem, mEfilu laKidron, nokwe i xwika po mEfilu laKidron, ndele te i nyanyaula fiyo ya ninga ombudu, nombudu yayo okwe i unda keembila dovanhu vongaho.
7 Okwa hanauna po yo eenduda domashenge* omotembeli, odo da li meumbo laJehova, omo ovakainhu va li hava hondjele eefaila dopala iyapuki.*
8 Opo nee okwa kufa mo ovapristeri aveshe moilando yaJuda, opo a nyateke eenhele dokoikulundudu, oko ovapristeri va li hava twimine omayambo, okudja kuGeba fiyo okuBer-seba. Okwa hanauna po yo eenhele dokoikulundudu doivelo, oyo ya li pomuvelo woshivelo shaJosua, elenga loshilando, odo da li kolumosho, ngeenge omunhu ta i moshilando.
9 Ovapristeri vokeenhele dokoikulundudu inava longela koaltari yaJehova, muJerusalem, ashike vo pamwe novamwaina ova lya omungome inau ya efulika.
10 Okwa nyateka yo Tofet, osho shi li mEfilu lOvanamati vaHinnom, opo paha kale nande oumwe ta endifa omonamati waye, ile omonakadona waye momundilo omolwaMolek.
11 Okwa kelela eenghambe, odo eehamba daJuda da yandjela etango, diha ye meumbo laJehova monduda* yaNatan-melek, elenga lomombala, oyo ya li meumbo, omo mwa li mu na oukololo; okwa xwika po omatemba etango momundilo.
12 Ohamba oya hanauna po yo eealtari, odo eehamba daJuda da dika kombada yonduda yaAhas, oyo i li pombada, nosho yo eealtari, odo Manasse a dika moihale ivali, oyo i li meumbo laJehova. Okwe di nyanyaula po, nombudu yado okwe i umbila mEfilu laKidron.
13 Ohamba oya nyateka eenhele dokoikulundudu, odo da li popepi naJerusalem, odo da li kolukadi* lOmhunda yEnyonauko,* oyo Salomo, ohamba yaIsrael, a tungila Astoret, oshikalungakainhu shitondifa shOvasidon; Kemosh, oshikalunga shitondifa shOvamoab; naMilkom, oshikalunga shitondifa shOvaammoni.
14 Okwa teyaula po eengudimanya diyapuki moitandu nokwa tetaula po eepala diyapuki,* nomalambo opo da dja okwe a yadeka noipongolo yovanhu.
15 Okwa ngumauna po yo oaltari, oyo ya li muBetel, onhele yokoshikulundudu, oyo ya ningwa kuJerobeam, omonamati waNebat, oyo ya ningifa Israel a nyone. Konima eshi a ngumauna po oaltari nosho yo onhele yokoshikulundudu, okwa xwika po onhele yokoshikulundudu, nokwe i nyanyaula po fiyo ya ninga ombudu, ndele ta xwike po opala iyapuki.*
16 Eshi Josia a piluka nokwa mona eembila di li komhunda, okwa kufifa mo oipongolo meembila, ndele te i xwike po koaltari, opo e i nyateke, pandjovo yaJehova, oyo ya popiwa komupiya waKalunga kashili, oo a xunganeka kutya oinima oyo oi na okuningwa.
17 Opo nee Josia okwa tya: “Ombila oyo handi tale oyalyelye?” Ovalumenhu vomoshilando ova tya kuye: “Ombila yomupiya waKalunga kashili a dja kuJuda, oo a xunganeka oinima oyo wa ningila oaltari yaBetel.”
18 Onghee okwa ti: “Mu efeni a tulumukwe. Inamu piyaaneka oipongolo yaye.” Onghee inava piyaaneka oipongolo yaye nosho yo oipongolo yomuprofeti, oo a dile kuSamaria.
19 Josia okwa hanauna po yo omatwali aeshe okeenhele dokoikulundudu, oo a li moilando yaSamaria, oo a tungwa keehamba daIsrael, opo di nyemateke Kalunga, nokwe a ningila naanaa ngaashi a ninga muBetel.
20 Okwa yambela keealtari ovapristeri aveshe vokeenhele dokoikulundudu, ovo va li oko, nokwa xwikila ko oipongolo yovanhu. Konima yaasho, okwa shuna kuJerusalem.
21 Ohamba oya lombwela ovanhu aveshe, ya ti: “Daneni Opaasa omolwaJehova, Kalunga keni, ngaashi sha shangwa membo eli lehangano.”
22 Inapa danwa nale Opaasa ngaashi oyo, okudja pefimbo olo eshi ovatokoli va li tava tokola muIsrael, ile pomafiku aeshe eehamba daIsrael nodaJuda.
23 Ashike momudo omuti-18 wepangelo lohamba Josia, Opaasa oyo ya danwa omolwaJehova, oya li ya danenwa muJerusalem.
24 Josia okwa yeleka mo filufilu yo ovo hava kwatafana neemhepo, ovaxunganeki vonakwiiwa, oihongwafano* yaterafim, oikalunga itondifa* noinima aishe itondifa oyo ya li muJuda nomuJerusalem, opo a wanife po eendjovo dOmhango, odo da shangwa membo, olo omupristeri Hilkia a hanga meumbo laJehova.
25 Kapa li nande ohamba ye mu fa mwaado de mu tetekela, oyo ya alukila kuJehova nomutima wayo aushe nomwenyo* wayo aushe neenghono dayo adishe, she likolelela kOmhango aishe yaMoses; nokapa li nande oimwe ye mu fa mwaado de mu shikula.
26 Ashike Jehova okwa li a handukila neenghono Juda omolwoinima aishe ii, oyo Manasse a ninga, opo e mu nyemateke.
27 Jehova okwa ti: “Ohandi ka hanauna po yo Juda koshipala shange, ngaashi ashike nda hanauna po Israel; ohandi ke liteeka po oshilando osho nda hoolola, Jerusalem, neumbo olo nda popya kutya, ‘Edina lange otali ka twikila okukala mo.’”
28 Ondjokonona aishe yaJosia, ashishe osho a ninga, mbela inai shangwa membo londjokonona yopefimbo leehamba daJuda?
29 Pefimbo laJosia, Farao Neko, ohamba yaEgipiti, okwa ya a ka shakeneke ohamba yaAssiria pomulonga waEufrat, nohamba Josia oya ya i ke mu lwife, ashike eshi Neko e i mona, okwe i dipaela puMegiddo.
30 Onghee ovapiya vayo ova kufa omudimba wayo muMegiddo, ve u endifa metemba, ndele tave u twala kuJerusalem, nove i paka mombila yayo. Opo nee ovanhu vomoshilongo ova kufa Joahas, omonamati waJosia, ndele tave mu vaeke nove mu ninga ohamba ponhele yaxe.
31 Joahas okwa ninga ohamba, eshi a li e na eedula 23, nokwa pangela muJerusalem oule weemwedi nhatu. Edina laina oHamutal, omonakadona waJeremia, a dja kuLibna.
32 Okwa hovela okulonga osho shii momesho aJehova, she likolelela kwaashishe osho ooxekulululwa va ninga.
33 Farao Neko okwe mu tula modolongo muRibla, moshilongo shaHamat, opo e mu kelele aha pangele muJerusalem, nokwa futifa ovakalimo vomoshilongo oitalenti* yoisilveri 100 nosho yo oshitalenti shoshingoli.
34 Shikwao vali, Farao Neko okwa ninga Eliakim, omonamati waJosia, ohamba ponhele yaxe, Josia, nokwe mu lukulula, ndele ta ningi Jehoiakim. Ashike okwa kufa Joahas, ndele te mu twala kuEgipiti, oko a ka fila lwanima.
35 Jehoiakim okwa yandja kuFarao oshisilveri noshingoli, ashike okwa li e na okupula ovanhu vomoshilongo va fute oifendela, opo a yandje oshisilveri osho Farao a li ta pula. Okwa kufa oshisilveri noshingoli komunhu keshe womoshilongo, osho sha tengenekwa, opo e shi yandje kuFarao Neko.
36 Jehoiakim okwa ninga ohamba, eshi a li e na eedula 25, nokwa pangela muJerusalem oule weedula 11. Edina laina oSebidda, omonakadona waPedaia, a dja kuRuma.
37 Okwa twikila okulonga osho shii momesho aJehova, she likolelela kwaashishe osho ooxekulululwa va ninga.
Eshangelo lopedu
^ Ile “pepaleke ehangano.”
^ Tala Omafatululo oitya.
^ Tala Omafatululo oitya.
^ Tala Omafatululo oitya.
^ Ile “dovalumenhu ovo hava endwa konima.”
^ Tala Omafatululo oitya.
^ Ile “monduda yokulila.”
^ Eln., “kolulyo.” Sha hala okutya, kolukadi ngeenge umwe a taalela koushilo.
^ Sha hala okutya, Omhunda yEemono, kombinga yokolukadi komukunghulo elela, nohai ifanwa yo Omhunda yOmatauluko.
^ Tala Omafatululo oitya.
^ Tala Omafatululo oitya.
^ Ile “oikalunga yomeumbo.”
^ Oshitya shOshiheberi otashi dulika sha pambafana noshitya “onyata,” nohashi longifwa okuyukifwa koinima itondifa.
^ Tala Omafatululo oitya.
^ Oshitalenti shimwe oshi fike peekilograma 34,2. Tala Oshiwedelwako B14.
