Eehamba eenhivali 7:1-20
7 Elisa okwa tya: “Pwilikina kondjovo yaJehova. Jehova ota ti: ‘Mongula ngaalo, poshivelo* shaSamaria, oshimbale* shoufila wa nakwa nawa otashi ka kala shi na ondado yosekeli* imwe nosho yo oimbale ivali yoilya yo-barley otai ka kala i na ondado yosekeli imwe.’”
2 Omuyakuli wovakwaita, oo a li e lineekelwa kohamba, okwa pula omupiya waKalunga kashili, a ti: “Nonande Jehova okwa lokifa odula okudja meulu,* mbela eshi* otashi ka wanifwa ngoo shili?” Okwa tya: “Oto ke shi limonena nomesho oye, ashike ito ke i lya.”
3 Poshivelo shoshilando opa li ovanashilundu vane, nova lombwelafana tava ti: “Omolwashike tu na okukala omutumba apa fiyo twa fya?
4 Ngeenge otwa ti, ‘Natu yeni moshilando,’ ofimbo moshilando mu na ondjala, ohatu ka fila mo. Nongeenge otwa kala omutumba apa, natango ohatu ka fya. Onghee natu yeni konhanda yOvasiria. Ngeenge ova xupifa eemwenyo detu, ohatu ka kala nomwenyo. Ashike ngeenge otave tu dipaa, ohatu ka fya.”
5 Opo nee ova ya mokati koufiku, ndele tava i monhanda yOvasiria. Eshi va ya monhanda yOvasiria, inava hanga mo omunhu.
6 Jehova okwa ningifa onhanda yaSiria i ude omalinyengo omatemba oita nosho yo eenghambe, elinyengo letangakwaita la kula. Onghee ova lombwelafana va ti: “Taleni, ohamba yaIsrael oya kuta eehamba dOvaheti neehamba daEgipiti di uye di tu lwife.”
7 Diva ova fikama, ndele tava faduka po mokati koufiku, va fiya po omatwali avo, eenghambe, eendongi nonhanda aishe i li ngaashi i li, nova faduka po va ka xupife eemwenyo davo.
8 Eshi ovanashilundu ovo va ya monhanda, ova ya metwali limwe, ndele tava hovele okulya nokunwa. Ova kufa mo oshisilveri, oshingoli noikutu, ndele tava i ve ke i holeke. Eshi va aluka, ova ya vali metwali limwe, ndele tava kufa mo oinima nova ya ve ke i holeke.
9 Xuuninwa, ova lombwelafana va ti: “Osho hatu ningi kashi li mondjila. Eli efiku lehafo, notu na okulombwela vamwe onghundana iwa. Ngeenge otwa ongaonga fiyo osheshi eluwa la tenda, ohatu ke lilongela okuhandukilwa. Natu yeni paife tu ka lopoteni oshinima eshi keumbo lohamba.”
10 Onghee ova ya, ndele tava ifana ovapashukili vopoivelo yoshilando, nove va lombwela tava ti: “Otwa ya monhanda yOvasiria, ashike inatu hanga mo omunhu; inatu uda mo ondaka yomunhu. Omwa li ashike eenghambe neendongi da mangwa, nomatwali okwa fyaala po e li ngaashi e li.”
11 Opo nee ovapashukili vopoivelo ova lombwela ovanhu vomeumbo lohamba onghundana oyo.
12 Diva ohamba oya penduka mokati koufiku, ndele tai lombwele ovapiya vayo, tai ti: “Alikana, nandi mu lombwele osho Ovasiria va hala oku tu ningila. Ove shi shii kutya otwa fya ondjala, onghee ova dja mo monhanda va ka hondame moixwa, tava ti, ‘Otava ka dja mo moshilando, nohatu ke va kwata po ve na omwenyo, nokuya moshilando.’”
13 Onghee umwe womovapiya vaye okwa ti: “Alikana, ovalumenhu vamwe nava kufe eenghambe nhano, odo da xupa po moshilando. Tala, otava ka fya ngaashi ashike ongudu aishe yOvaisrael, oyo ya fyaala mo, tai ka fya. Tala, otava ka hanaunwa po monghedi ya faafana nongudu aishe yOvaisrael, oyo ya hanaunwa po nale. Natu va tumeni tu taleni.”
14 Opo nee ova kufa omatemba avali neenghambe, nohamba oye va tuma va ye konhanda yOvasiria, tai ti: “Indeni mu ka tale.”
15 Ove va shikula fiyo okomulonga waJordan, nomondjila aishe omwa li mu yadi oikutu nosho yo oilongifo oyo Ovasiria va ekelashi, eshi va li tava faduka po va tila. Ovatumwa ova aluka, ndele tave shi lombwele ohamba.
16 Onghee ovanhu ova ya, ndele tava kwata ko onhanda yOvasiria. Oshimbale shoufila wa nakwa nawa osha ka kala shi na ondado yosekeli imwe noimbale ivali* yoilya yo-barley oya ka kala i na ondado yosekeli imwe, ngaashi Jehova a popya.
17 Ohamba oya hoolola omuyakuli wovakwaita, oo ya li ye lineekela, a kale ta pashukile poshivelo. Ashike ovanhu ove mu lyata, fiyo a fila poshivelo, ngaashi ashike omupiya waKalunga kashili a li a lombwela ohamba, eshi ye uya kuye.
18 Osha ningwa ngaashi ashike omupiya waKalunga kashili a li a lombwela ohamba, a ti: “Oimbale ivali yoilya yo-barley otai ka kala i na ondado yosekeli, noshimbale shoufila wa nakwa nawa otashi ka kala shi na ondado yosekeli mongula ngaalo poshivelo shaSamaria.”
19 Ashike omuyakuli wovakwaita okwa pulile omupiya waKalunga kashili, a ti: “Nonande Jehova okwa lokifa odula okudja meulu,* mbela eshi* otashi ka wanifwa ngoo shili?” Onghee Elisa okwa tya: “Oto ke shi limonena nomesho oye, ashike ito ke i lya.”
20 Osho osho naanaa she mu ningilwa, molwaashi ovanhu ove mu lyata fiyo a fila poshivelo.
Eshangelo lopedu
^ Ile “pomalandifilo.”
^ Ile “osea imwe.” Osea imwe oi fike peelita 7,33. Tala Oshiwedelwako B14.
^ Osekeli imwe oi fike peegrama 11,4. Tala Oshiwedelwako B14.
^ Ile “yeulula omivelo dokeulu.”
^ Eln., “ondjovo ei.”
^ Ile “eesea mbali.” Osea imwe oi fike peelita 7,33. Tala Oshiwedelwako B14.
^ Ile “yeulula omivelo dokeulu.”
^ Eln., “ondjovo ngaashi ei.”
