Omafimbo omativali 1:1-17
1 Salomo, omonamati waDavid, okwa ninga omunaenghono mouhamba waye, na Jehova, Kalunga kaye, okwa kala pamwe naye nokwe mu pa efimano linene.
2 Salomo okwa ifana Ovaisrael aveshe, omalenga taa pashukile omayovi nomafele, ovatokoli nomalenga aeshe Ovaisrael aveshe, omitwe domaukwaneumbo omapata.
3 Opo nee Salomo neongalo alishe ova ya konhele yokoshikulundudu, kuGibeon, molwaashi oko kwa li etwali lokwoongalela laKalunga kashili, olo Moses, omupiya waJehova, a ningila mombuwa.
4 Ashike David okwa kufa oshikefa shaKalunga kashili kuKiriat-jearim, ndele te shi twala konhele oyo e shi longekidila. Okwe shi dikila etwali muJerusalem.
5 Oaltari yongopolo, oyo ya ningwa kuBesaleel, omonamati waUri, omonamati waHur, oya tulwa komesho yetwalihangano laJehova. Salomo neongalo ova kala hava ilikana ve li komesho yayo.*
6 Salomo oko a yandjela omayambo moipafi yaJehova, nokwa yamba omaxwikiloyambo 1 000 koaltari yongopolo yometwali lokwoongalela.
7 Oufiku oo, Kalunga okwe lihololela Salomo, ndele ta ti kuye: “Pula osho wa hala ndi ku pe.”
8 Salomo okwa lombwela Kalunga, a ti: “Owa ulikila tate, David, ohole inene i na oudiinini, nowa ninga nge ohamba ponhele yaye.
9 Jehova Kalunga, eudaneko olo wa udanekela tate, David, nali wanifwe po, osheshi owa ninga nge ohamba yovanhu ovo vahapu neenghono ngaashi ondwi yedu.
10 Pe nge ounongo neshiivo ndi dule okuwilika oshiwana eshi,* osheshi olyelye ta dulu okutokola oshiwana shoye eshi shinene?”
11 Opo nee Kalunga okwa lombwela Salomo, a ti: “Molwaashi eshi osho wa halelela nomutima woye, noino pula u pewe oupuna, efimano, efyo lovatondi voye, ile okukala nomwenyo efimbo lile,* ndele owa pula u pewe ounongo neshiivo u dule okutokola oshiwana shange, osho nde ku ninga ohamba yasho,
12 oto ka pewa ounongo neshiivo, ndele ohandi ke ku pa yo oupuna nefimano, oyo pehe na nande oimwe yomeehamba, odo de ku tetekela, ya li i na oinima oyo, nokape na oyo tai ke ku shikula tai ka kala i na oinima oyo.”
13 Onghee Salomo okwa dja ko konhele yokoshikulundudu, kuGibeon, komesho yetwali lokwoongalela, nokwa ya kuJerusalem, nokwa pangela Ovaisrael.
14 Salomo okwa kala te likongele omatemba nosho yo eenghambe.* Okwa li e na omatemba 1 400 nosho yo eenghambe* 12 000; okwa kala e i tula moilando, omo hamu kala omatemba, popepi naye, muJerusalem.
15 Ohamba oye likongela oshisilveri noshingoli shihapu muJerusalem, ngaashi omamanya mahapu, nomuShefela oye likongela mo omiti domisederi dihapu neenghono, ngaashi omiti da fa omikwiyu.*
16 Eenghambe daSalomo oda li hadi di kuEgipiti, novashingifi vohamba ova li have likongele oufita weenghambe* kondado ya faafana.
17 Etemba keshe, olo la dja kuEgipiti, ola li li na ondado yoisilveri 600, nondado yonghambe oya li 150. Ova li yo have di tumu keehamba adishe dOvaheti nokeehamba daSiria.
Eshangelo lopedu
^ Ile “oko hava ka pula ekwafo kuKalunga.”
^ Eln., “okufikama nokwaaluka komesho yoshiwana eshi.”
^ Eln., “omafiku mahapu.”
^ Ile “ovalondinghambe.”
^ Ile “ovalondinghambe.”
^ Omiti domisikamore.
^ Ile tashi dulika, “okudja kuEgipiti nokudja kuKuve; ovashingifi vohamba ova li have di lande okudja kuKuve,” tashi dulika tashi ulike kuKilikia.
