Omafimbo omativali 17:1-19
17 Omonamati waAsa, Josafat, okwa ninga ohamba ponhele yaye, nokwa pameka ouhamba waye muIsrael.
2 Okwa tula omatangakwaita moilando aishe yaJuda ya dingililwa komakuma a pama, nokwa ninga eekamba dovakwaita moshilongo shaJuda nomoilando yaEfraim, oyo xe, Asa, a li a kwata ko.
3 Jehova okwa twikila okukala pamwe naJosafat, molwaashi okwa enda meendjila daxekulululwa, David, noina longela ooBaal.
4 Okwa longela Kalunga kaxe nokwa shikula* oshipango shaye, ndele hailonga yOvaisrael.
5 Jehova okwa kala nokupameka ouhamba meke laye; Ovajuda aveshe ova twikila okuyandja eeshali kuJosafat, nokwa li e na oupuna muhapu nokwa fimanekwa neenghono.
6 Okwe linyatipaleka mokushikula eendjila daJehova, nokwa hanauna po eenhele dokoikulundudu nosho yo eepala diyapuki* muJuda.
7 Momudo omutitatu wepangelo laye, okwa tuma omalenga aye, Ben-hail, Obadja, Sakaria, Netanel naMikaia, va ka honge moilando yaJuda.
8 Ovalevi ovo va li pamwe navo: oShemaia, Netania, Sebadia, Asahel, Semiramot, Jehonatan, Adonia, Tobia naTob-adonia, novapristeri ovo va li pamwe navo: oElisama naJehoram.
9 Ova hovela okuhonga muJuda, va ya nembo lOmhango yaJehova, nova ya moilando aishe yaJuda tava hongo ovanhu.
10 Molwaashi omauhamba aeshe oilongo oyo ya dingilila Juda okwa li a kwatwa koumbada omolwaJehova, inaa lwifa Josafat.
11 Ovafilisti ova etela Josafat eeshali noimaliwa i li eemhale.* Ovaaraba ove mu etela eedi deendume 7 700 noikombo yoindume 7 700, ya dja momaufita avo.
12 Josafat okwa enda ta nghonopala, nokwa twikila okutunga oilando ya dingililwa komakuma a pama, noilando yokutuvikila muJuda.
13 Okwa longa oilonga inene moilando yaJuda, nokwa li e na ovakwaita novakwaita ovanaenghono muJerusalem.
14 Ovakwaita ava ova li va tukulwa pamitwe domaukwaneumbo omapata avo: muJuda, omalenga taa pashukile omayovi, elenga Adna, nola li pamwe novakwaita ovanaenghono 300 000.
15 Koshi yewiliko laye okwa li elenga Johanan, nola li pamwe novakwaita ovanaenghono 280 000.
16 Natango, koshi yewiliko laye okwa li Amasia, omonamati waSikri, oo e liyamba moilonga yaJehova, nokwa li pamwe novakwaita ovanaenghono 200 000.
17 MuBenjamin omwa dja Eliada, omukwaita omunaenghono, nokwa li pamwe novalumenhu 200 000 ve na omauta noikelelifo.
18 Koshi yewiliko laye oJosabad, nokwa li pamwe novalumenhu 180 000 va homatela olwoodi.
19 Ova li tava yakula ohamba pamwe naavo va tulwa po kohamba moilando ya dingililwa komakuma a pama, muJuda ashishe.
Eshangelo lopedu
^ Eln., “enda.”
^ Tala Omafatululo oitya.
^ Ile “Oifutomwa oyo ya li hai pewa eehamba.”
