Omafimbo omativali 21:1-20
21 Josafat okwa nangekwa pooxekulululwa, nokwa pakwa pooxekulululwa mOshilando shaDavid. Omonamati waye, Jehoram, okwa ninga ohamba ponhele yaye.
2 Ovamwaina, ovanamati vaJosafat, ova li Asaria, Jehiel, Sakaria, Asaria, Mikael naSefatia; aveshe ovo ovanamati vaJosafat, ohamba yaIsrael.
3 Xe okwe va pa eeshali dihapu doshisilveri noshingoli nosho yo oinima i na ongushu, pamwe noilando ya dingililwa komakuma a pama muJuda, ashike okwa yandja ouhamba kuJehoram, molwaashi oye a li oshiveli.
4 Eshi Jehoram a kufa ko ouhamba waxe, okwa pameka ouhamba waye, eshi a dipaa ovamwaina aveshe neongamukonda nosho yo omalenga amwe aIsrael.
5 Jehoram okwa li e na eedula 32, eshi a ninga ohamba, nokwa pangela muJerusalem oule weedula hetatu.
6 Okwa enda mondjila yeehamba daIsrael, ngaashi ashike ovanhu vomeumbo laAhab va ninga, molwaashi okwa li a hombola omonakadona waAhab; okwa twikila okulonga osho shii momesho aJehova.
7 Ashike Jehova ka li a hala okuhanauna po eumbo laDavid omolwehangano olo a ninga naDavid, molwaashi okwe mu udanekela kutya ye novanamati vaye ote ke va pa alushe olamba.
8 Pefimbo laJehoram, Edom okwa li a pilukila po Juda, nokwa li a nangeka po ohamba yaye mwene.
9 Onghee Jehoram novawiliki vaye ova ya kuEdom pamwe nomatemba aye aeshe oita. Okwa fikama oufiku nokwa finda Ovaedom, ovo va li ve mu dingilila, nosho yo ovawiliki vomatemba.
10 Ndele Edom okwa kala ta pilukile po Juda fiyo okunena eli. Libna naye okwa li yo e mu pilukila po pefimbo opo, molwaashi okwa li a efa po Jehova, Kalunga kooxekulululwa.
11 Okwa ninga yo eenhele dokoikulundudu keemhunda daJuda, opo a ningife ovakalimo vomuJerusalem va haele pamhepo, nokweehenifa Ovajuda kokule naKalunga.
12 Lwanima, okwa tuminwa etumwalaka la dja komuprofeti Elia, tali ti: “Eshi osho Jehova, Kalunga kaxokulululwa, David, ta ti, ‘Ino enda meendjila daxo, Josafat, ile meendjila daAsa, ohamba yaJuda.
13 Ndele owa enda mondjila yeehamba daIsrael, nowa ningifa Ovajuda novakalimo vomuJerusalem va haele pamhepo ngaashi eumbo laAhab la haela, nowa dipaa ovamwanyoko, ovaneumbo vaxo, ovo va li xwepo ve ku dule.
14 Onghee hano, Jehova ota ka handukila oshiwana shoye, ovanamati voye, ovakulukadi voye, nota ka hanauna po oinima yoye aishe.
15 Oto ka kwatwa komikifi dihapu efiku keshe, mwa kwatelwa oudu womomandjadja, fiyo osheshi omandjadja oye a dja mo omolwoudu oo.’”
16 Opo nee Jehova okwe linyengifa Ovafilisti* nOvaaraba, ovo va li popepi nOvaetiopia, va ka lwife Jehoram.
17 Onghee ova ponokela Juda nova kufa mo keenghono oinima aishe oyo va hanga meumbo* lohamba nosho yo ovanamati vaye novakulukadi vaye; ova fiya mo ashike Joahas,* omonamati waye munini.
18 Konima yoinima aishe oyo, Jehova okwa li e mu handukila noudu womomandjadja, oo uhe na epango.
19 Lwanima, eshi pa pita eedula mbali, omandjadja aye okwa dja mo omolwoudu waye, nokwa fya ta mono oixuna neenghono koudu waye. Oshiwana shaye kasha li sha tema omundilo, opo shi mu fimaneke, ngaashi sha li sha ningila ooxekulululwa.
20 Jehoram okwa ninga ohamba, eshi a li e na eedula 32, nokwa pangela muJerusalem oule weedula hetatu. Kape na oo a li a uda nai, eshi a fya. Onghee ove mu paka mOshilando shaDavid, ashike kava li ve mu paka meenhele omo hamu pakwa eehamba.
