Omafimbo omativali 23:1-21
23 Momudo omutiheyali, Jehoiada okwa katuka nouladi, ndele ta ningi eudafanotwokumwe* nomalenga taa pashukile omafele. Omadina ao oo: Asaria, omonamati waJeroham, Ismael, omonamati waJohanan, Asaria, omonamati waObed, Maasea, omonamati waAdaja, naElisafat, omonamati waSikri.
2 Ova endaenda muJuda ashishe nova ongela Ovalevi va dja moilando aishe yaJuda, nomitwe domaukwaneumbo omapata Ovaisrael. Eshi ve uya kuJerusalem,
3 eongalo alishe ola ninga ehangano nohamba meumbo laKalunga kashili, nokonima yaasho, Jehoiada okwe va lombwela, a ti:
“Taleni, omonamati wohamba ota ka pangela, ngaashi ashike Jehova a udaneka shi na sha novanamati vaDavid.
4 Eshi osho mu na okuninga: Omu na okutukula ovapristeri nOvalevi, ovo have uya mEshabata, meengudu nhatu. Ongudu imwe oyovapashukili vopoivelo;
5 ongudu ikwao otai ka kala peumbo* lohamba, nongudu onhinhatu otai ka kala pOshivelo shEkanghameno, novanhu aveshe otava ka kala moshihale sheumbo laJehova.
6 Inamu efela mo nande omunhu umwe meumbo laJehova, kakele kovapristeri nOvalevi, ovo tava yakula. Ovo ashike ve na okuya mo, molwaashi ova kosholwa omolwoilonga iyapuki, novanhu aveshe ove na okuwanifa po oilonga yavo kuJehova ve li pondje.
7 Ovalevi ove na okudingilila ohamba keembinga adishe, keshe umwe e kwete oilwifo yaye meke. Keshe oo ta i meumbo olo oku na okudipawa. Shikuleni ohamba keshe apa tai i.”*
8 Ovalevi nOvajuda aveshe ova ninga naanaa ngaashi va lombwelwa komupristeri Jehoiada. Keshe umwe okwa kufa ovalumenhu vaye, ovo va hangwa tava yakula mEshabata, pamwe naavo va hangwa itava yakula mEshabata, molwaashi omupristeri Jehoiada ka li a dimbula eengudu odo moilonga yado yokuyakula.
9 Opo nee omupristeri Jehoiada okwa yandja komalenga taa pashukile omafele omaonga, oikelelifo* noikelelifo oyo ya li yohamba David, oyo ya li meumbo laKalunga kashili.
10 Okwa tula po ovanhu aveshe, keshe umwe e kwete oshilwifo meke laye, okudja kolulyo leumbo fiyo okolumosho lalo, poaltari nosho yo peumbo, va dingilila ohamba.
11 Opo nee ova eta omonamati wohamba pondje, ndele tave mu dike oshikoroni* noku mu tenheka Oumbangi,* nove mu ninga ohamba. Jehoiada novanamati vaye ove mu vaeka, ndele tava ti: “Ohamba nai kale nomwenyo mule!”
12 Eshi Atalia a uda ovanhu tava tondoka notava tange ohamba, okwe uya diva kovanhu, keumbo laJehova.
13 Opo nee okwa mona ohamba ya fikama pongudimanya yayo poshivelo. Omalenga novashiki vomanghuma ova li nohamba, novanhu aveshe vomoshilongo ova li va hafa notava shiki omanghuma, novaimbi tava shiki oishikomwa ova li tava kwatele komesho omaimbilohambelelo. Opo nee Atalia okwa pombaula oikutu yaye, ndele ta ingida ta ti: “Oukengeleledi! Oukengeleledi!”
14 Ashike omupristeri Jehoiada okwa tuma omalenga taa pashukile omafele, oo a nangekwa po a kwatele komesho etangakwaita, ndele ta ti kuo: “Mu kufei mo mokati kovakwaita, ndele ngeenge ope na oo te mu shikula, mu dipaeni neongamukonda.” Molwaashi omupristeri okwa ti: “Inamu dipaela Atalia meumbo laJehova.”
15 Onghee ove mu kwata, ndele eshi va fika pOshivelo shEenghambe peumbo* lohamba, ove mu dipaela diva opo.
16 Opo nee Jehoiada okwa ninga ehangano pokati kaye mwene novanhu aveshe nosho yo nohamba, kutya otava twikile okukala oshiwana shaJehova.
17 Konima yaasho, ovanhu aveshe ova ya keumbo* laBaal, ndele tave li ngumauna po, nova nyanyaula po eealtari noihongwafano yaye. Ova dipaela Mattan, omupristeri waBaal, komesho yeealtari.
18 Opo nee Jehoiada okwa tula po ovapristeri nOvalevi va pashukile eumbo laJehova, ovo David a nangeka po meengudu va pashukile eumbo laJehova, opo va yambe omaxwikiloyambo aJehova, she likolelela kwaasho sha shangwa mOmhango yaMoses, tave shi ningi nehafo nosho yo nomaimbilo, tava shikula ewiliko* laDavid.
19 Poivelo yeumbo laJehova, okwa tula po ovapashukili vopoivelo, opo omunhu, oo ina koshoka nandenande, aha dule okuya mo.
20 Okwa kufa omalenga taa pashukile omafele, ovaleli, ovapangeli vovanhu nosho yo ovanhu aveshe vomoshilongo, ndele tava findikile ohamba okudja keumbo laJehova. Ova pitila poshivelo shopombada osho sha finda meumbo* lohamba, ndele tava kaleke ohamba omutumba kolukalwapangelo lomouhamba.
21 Onghee ovanhu aveshe vomoshilongo ova li va hafa, nomoshilando omwa li mu na ombili, molwaashi ova dipaa Atalia neongamukonda.
Eshangelo lopedu
^ Ile “ehangano.”
^ Ile “pombala.”
^ Eln., “ngeenge tai di mo nongeenge tai uya mo.”
^ Oikelelifo inini, naluhapu ohai humbatwa kovaumbi.
^ Ile “oshikoroni shiyapuki.”
^ Oumbangi oo otashi dulika wa li hau tenhekwa komutwe wohamba u li edimbulukifo li na sha nokudiinina Omhango.
^ Ile “pombala.”
^ Ile “kotembeli.”
^ Eln., “omake a.”
^ Ile “mombala.”
