Omafimbo omativali 32:1-33
32 Konima yoinima oyo noyoilonga oyo youdiinini, Sanheerib, ohamba yaAssiria, okwe uya nokwa li a hala okuponokela Juda. Okwa li a kondeka oilando ya dingililwa komakuma a pama, a hala okuponokela mo noku i kwata ko.
2 Eshi Hiskia a mona kutya Sanheerib okwe uya nokwa hala okulwifa Jerusalem,
3 konima eshi a kundafana nomalenga aye nosho yo ovakwaita vaye ovanaenghono, okwa li a tokola okukangheka omeva omeefifiya, oo haa kunguluka a finda kondje yoshilando, nova li ve mu yambidida.
4 Ovanhu vahapu ova li va ongala, ndele tava fitike eefifiya adishe nomakungulukilo oo haa kunguluka a finda moshilando, tava ti: “Omolwashike eehamba daAssiria di na okuuya nokuhanga po omeva mahapu?”
5 Natango, okwa li a tokola toko okutwikila okutungulula ekuma apeshe opo la mbonyauka, nokutungila ko eeshungongulu, nokondje okwa tungila ko ekuma likwao. Okwa wapekulula yo Oshikulundudu* shomOshilando shaDavid, nokwa ninga oilwifo ihapu noikelelifo.
6 Opo nee okwa tulila po ovanhu eendjai domatangakwaita, nokwe va ongaleka pehalandjadja poshivelo shoshilando, ndele te va tu omukumo* ta ti:
7 “Kaleni mu na ouladi nomwa pama. Inamu kala mwa tila, ile mu mbadapale omolwohamba yaAssiria novanhu vahapu aveshe, ovo ve li pamwe nayo, molwaashi pufye ope na vahapu ve dule ovo ve li pamwe nayo.
8 Puyo ope na okwooko kwombelela,* ndele pufye ope na Jehova, Kalunga ketu, te tu kwafele nota lu olwoodi ponhele yetu.” Ovanhu ova li va pamekwa keendjovo daHiskia, ohamba yaJuda.
9 Konima yaasho, ofimbo Sanheerib, ohamba yaAssiria, a li muLakis pamwe novakwaita vaye aveshe ovanaenghono,* okwa tuma ovapiya vaye kuJerusalem, kuHiskia, ohamba yaJuda, nokOvajuda aveshe ovo va li muJerusalem, a ti:
10 “Eshi osho Sanheerib, ohamba yaAssiria, ta ti, ‘Omwe lineekela mushike, eshi mu li natango muJerusalem ofimbo sha dingililwa?
11 Hiskia mbela ite mu pukifa noku mu yandja mu fye kondjala nokenota, eshi ta ti: “Jehova, Kalunga ketu, ote ke tu xupifa meke lohamba yaAssiria”?
12 Hiskia haye ngoo a hanauna po eenhele dokoikulundudu daKalunga keni* neealtari daYe, ndele ta lombwele Juda naJerusalem, ta ti: “Omu na okulinyongamena koaltari imwe, nokuyo oko mu na okutwimina omatwiminoyambo”?
13 Mbela kamu shi shii osho ame nootatekulululwa twa ningila ovanhu aveshe vokoilongo imwe? Mbela ookalunga voiwana yokoilongo imwe ova dula tuu okuxupifa oshilongo shavo meke lange?
14 Oolyelye mokati kookalunga aveshe voiwana, oyo ootatekulululwa va hanauna po, va li va dula okuxupifa ovanhu vavo meke lange, opo Kalunga keni a dule oku mu xupifa meke lange?
15 Inamu efa Hiskia e mu heke, ile e mu pukife nandenande. Inamu mu itavela, molwaashi kape na Kalunga koshiwana shimwe, ile kouhamba a li a dula okuxupifa ovanhu vaye meke lange nosho yo momake ootatekulululwa. Mbela Kalunga keni ota ka dula ngahelipi oku mu xupifa meke lange.’”
16 Ovapiya vaSanheerib ova popya nokuli oinima ihapu i li omhinge naJehova, Kalunga kashili, nosho yo omupiya waye, Hiskia.
17 Sanheerib okwa shanga yo eenhumwafo ta tuku Jehova, Kalunga kaIsrael, nota popi oinima i li omhinge naye, ta ti: “Ngaashi ookalunga voiwana yokoilongo imwe ovo inava dula okuxupifa ovanhu vavo meke lange, na Kalunga kaHiskia ita ka xupifa oshiwana shaye meke lange.”
18 Ova twikila okwiingida mokule ovanhu vomuJerusalem, ovo va li kekuma, melaka lOshijuda, ve va tilife noku va mbadapalifa, opo va kwate ko oshilando.
19 Ova popya oinima i li omhinge naKalunga kaJerusalem, ngaashi ashike oinima i li omhinge oyo va popya i na sha nookalunga vovanhu vokombada yedu, ookalunga ovo ve li oilonga yomake ovanhu.
20 Ndele ohamba Hiskia nomuprofeti Jesaja, omonamati waAmos, ova twikila okwiilikana kombinga yoshinima osho, nokukuwa kuKalunga, oo e li meulu, e va kwafelwe.
21 Opo nee Jehova okwa tuma omweengeli, nokwa hanauna po omukwaita keshe omunaenghono, omuwiliki nondjai yonhanda yohamba yaAssiria, onghee Sanheerib okwa shuna koshilongo shaye a fya ohoni. Lwanima, okwa ya meumbo* lakalunga kaye, navamwe vomovanamati vaye ove mu dipaa neongamukonda.
22 Onghee Jehova okwa xupifa Hiskia novakalimo vomuJerusalem momake aSanheerib, ohamba yaAssiria, nomomake avakwao aveshe, ndele te va pe etulumuko keembinga adishe.
23 Ovanhu vahapu ova etela Jehova eeshali kuJerusalem, nova etela yo oinima iwa elela Hiskia, ohamba yaJuda, na Hiskia okwa li a fimanekwa unene koiwana aishe konima yaasho.
24 Pefimbo olo, Hiskia okwa li ta ehama nokwa li e li pokufya, ndele okwa ilikana kuJehova, oo e mu nyamukula nokwe mu pa edidiliko.
25 Ashike Hiskia ina ulika olupandu omolwoinima iwa, oyo ye mu ningilwa, molwaashi omutima waye owa li we linenepeka, nokwa ningifa Kalunga e mu handukile nosho yo Juda naJerusalem.
26 Lwanima, Hiskia okwe lininipika nokwa efa po okukala e na ounhwa, ye novakalimo vomuJerusalem, na Jehova ine va handukila vali pefimbo laHiskia.
27 Hiskia okwa li e na oupuna muhapu, nokwa li a fimanekwa; okwe liningila eemhungulilo doshisilveri, doshingoli, domamanya ondilo, domaadi o-balsam, doikelelifo nodoinima aishe oyo a hala.
28 Okwa ninga yo eemhungulilo doilya, omaviinyu mape nodomaadi nosho yo oyuunda yoimuna aishe ya yoolokafana noyuunda yeedi noyoikombo.
29 Okwe likongela yo oilando nosho yo oimuna ihapu, eedi, oikombo neengobe, molwaashi Kalunga okwe mu pa emona lihapu neenghono.
30 Hiskia oye a li a fitika eefifiya domeva domuGihon, ndele ta panunine omeva kouninginino wOshilando shaDavid, na Hiskia okwa li a pondola moilonga yaye aishe.
31 Ashike ovapopikalelipo vomalenga aBabilon ova li va tumwa ve ke mu pule kombinga yedidiliko olo la ningwa moshilongo; Kalunga kashili okwa li e mu fiya po oye aeke, opo e mu yeleke a shiive ashishe osho shi li momutima waye.
32 Ondjokonona aishe yaHiskia, noilonga oyo a longa omolwohole yaye i na oudiinini, oya shangwa memoniko lomuprofeti Jesaja, omonamati waAmos, mEmbo lEehamba daJuda nodaIsrael.
33 Opo nee Hiskia okwa nangekwa pooxekulululwa, nove mu paka koshikulundudu, ponhele opo pa pakwa ovanamati vaDavid; Ovajuda aveshe novakalimo vomuJerusalem ove mu fimaneka pefyo laye. Omonamati waye, Manasse, okwa ninga ohamba ponhele yaye.
Eshangelo lopedu
^ Ile “Millo.” Oshitya shOshiheberi tashi ti “yadeka.”
^ Eln., “popi nomitima davo.”
^ Ile “eenghono dopanhu.”
^ Ile “etangakwaita layo alishe enaenghono nependafule.”
^ Eln., “yaye.”
^ Ile “motembeli.”
