Embo etivali lOvakorinto 11:1-33
11 Nonande onda fa omunhu ehe na eendunge, onda hala mu lididimikile nge.
2 Ondi na ko nasha nanye neenghono ngaashi Kalunga, nomolwaashi nda hala oku mu yandja mu hombolwe kuKristus mu li ngaashi okakadona elela.
3 Ndele ngaashi Eva a kengelelwa nokupukifwa keyoka, onda tila kutya nanye otamu ka pukifwa, ndele tamu kala muhe fi ovadiinini noinamu koshoka. Ashike ovapiya vaKristus ove na okukala ovadiinini nova koshoka.
4 Ngeenge umwe okwe uya kunye te mu udifile kombinga yaJesus umwe, ehe fi oo twe mu udifila, ile te mu etele omhepo imwe i lili ihe fi oyo mu na nale, ile te mu udifile onghundana iwa ihe fi oyo mwa tambula ko nale, ohamu tambula ko noupu osho te mu lombwele.
5 Nghi wete pe na osho tashi ulike kutya ondi dulike kovayapostoli veni ovo have limonikifa va fa ve li nawa.
6 Ndele nonande nghi na ounongo wokupopya, ondi na eshiivo; osho otwe shi mu ulikila filufilu moinima aishe.
7 Ile onda nyona eshi nde mu udifila nehafo onghundana iwa yaKalunga oshali nosho yo eshi nde lininipika opo mu nenepekwe?
8 Onda kwafelwa komaongalo amwe, nokungaho onda fa nde a nyeka opo ndi mu yakule.
9 Onda li ndi na omhumbwe eshi nda li punye, ndele inandi twika nande oumwe womunye omutengi molwaashi ovamwatate vokuMakedonia ova li va wanifa po eemhumbwe dange adishe. Onda kala handi kendabala ndihe mu twike omutengi nohandi ka twikila okuninga ngaho.
10 Ndele fimbo ndi li omushikuli waKristus, kape na osho tashi imbi nge ndi litangele oshinima osho muAkaia ashishe.
11 Omolwashike mbela? Mbela omolwaashi ndihe mu hole? Kalunga oku shi shii kutya ondi mu hole.
12 Ope na ovo have litange nohava ti kutya ove li ovayapostoli ngaashi fye. Ohandi ka twikila okuninga ngaashi handi ningi shito opo vaha kale ve na etomheno lokulitanga.
13 Ovanhu va tya ngaho ovayapostoli ovanaipupulu, hava pukifa ovanhu vakwao nohave lifefa ovayapostoli vaKristus.
14 Onghee hano, itashi kumwifa eshi Satana naye he lifefa omweengeli muwa.*
15 Itashi tu kumwifa yo eshi ovapiya vaye navo have lifefa ovalongi vouyuki, ndele xuuninwa otava ka pewa ondjabi she likolelela koilonga yavo.
16 Natango ohandi ti: Inamu diladila kutya kandi na eendunge. Ndele ngeenge osho tamu diladila ngaho, tambulei nge ko ngaashi omunhu oo ehe na eendunge opo ndi dule okulitanga nande okanini.
17 Itandi popi nda fa omunhu ta shikula oshihopaenenwa shOmwene, ndele ohandi popi nda fa omunhu oo ehe na eendunge, he litange nokwe lineekela muye mwene.
18 Ndele molwaashi ovanhu vahapu otave litangele oinima yopanhu, naame ohandi i litangele yo.
19 Nonande ohamu ti kutya nye ovanaendunge, ohamu lididimikile nehafo ovo vehe na eendunge.
20 Kakele kaasho, ohamu lididimikile ovo tave mu twala moupika, ovo tave mu nyeke oinima yeni nakeshe osho mu na, ovo tave mu linenepekele nosho yo ovo tave mu denge nomanghava moipala.
21 Oshi fifa ohoni okupopya ngaho molwaashi vamwe vomunye ova fa ve wete inatu longifa nawa eenghonopangelo detu.
Ndele molwaashi vamwe inava fya ohoni okulitanga, naame itandi fi ohoni okulitanga, nonande vamwe ove wete nda fa ndihe na eendunge.
22 Mbela ove li Ovaheberi? Naame yo Omuheberi. Mbela Ovaisrael? Naame yo Omuisrael. Mbela ove li oludalo* laAbraham? Naame yo oludalo laAbraham.
23 Mbela ove li ovayakuli vaKristus? Ohandi popi ngaashi elai; ame omuyakuli waKristus ndi va dule: Onda longa oilonga ihapu ndi va dule, onda tulwa modolongo luhapu ndi va dule, onda dengwa luhapu nonda xupa mefyo lwoikando ihapu.
24 Onda dengwa lwoikando itano kOvajuda eengola 39,
25 nda dengwa lwoikando itatu neengola, nda dengwa lumwe nomamanya, nda xupa lwoikando itatu moskepa ya teka nonda li omutenya noufiku aushe mokati kefuta.
26 Onda shakeneka eenghalo didjuu momalweendo ange, ngaashi momilonga, okudja kovanyeki, koshiwana shetu, koiwana imwe, moshilando, mombuwa, mefuta nosho yo mokati kovamwatate ovanaipupulu.
27 Onda longa noudjuu, nda kala omaufiku mahapu inandi kofa, nda fya ondjala nenota, nda kala ndihe na oikulya omafimbo amwe, nonda fya outalala nonghai.*
28 Kakele koinima oyo, ohandi kala yo ndi na oshisho* efiku keshe shi na sha nomaongalo aeshe.
29 Ngeenge umwe oshingone, mbela ame kandi fi oshingone? Ngeenge umwe okwa pundukifwa, mbela kandi na okuhanduka?
30 Ngeenge ohandi litange, ohandi litangele oinima oyo tai ulike oungone wange.
31 Kalunga, oo e na okutangwa fiyo alushe, Xe yOmwene Jesus, oku shi shii kutya itandi fufya.
32 Ngoloneya womuDamaskus oo a li koshi yewiliko lohamba Aretas, okwa li a tula po ovanangeli poshivelo shoshilando opo va kwate nge po,
33 ndele onda li nda kulukifilwa mekende loshilando ndi li moshimbaba, nonda li nda ya onhapo.
Eshangelo lopedu
^ Ile “omweengeli wouyelele.”
^ Eln., “ombuto.”
^ Eln., “nondi li hamunghele.”
^ Ile “handi lipula.”
