Embo etivali lOvakorinto 4:1-18
4 Molwaashi otu na oshilongayakulo eshi twa pewa omolwefilonghenda olo twa ulikilwa, itatu sholola.
2 Otwa efa po oilonga yomeholeko ififa ohoni, katu na omakoto noihatu pengifa eendjovo daKalunga. Ndele ohatu ulikile ovanhu osho eendjovo daKalunga tadi ti, nokungaho ohatu ulike kutya ohatu longo oilonga ya wapala koshipala shaKalunga opo ovanhu aveshe va kale ve i shii.
3 Ndele ngeenge onghundana iwa oyo hatu udifa oya holekwa,* oya holekwa ovo tava ka hanaunwa po,
4 ovo vehe na eitavelo omadiladilo avo okwa twikifwa kukalunga kounyuni ou,* opo vaha minikilwe kouyelele woshinge shonghundana iwa i na sha naKristus, oo e li efano laKalunga.
5 Eshi hatu udifa, ihatu popi kombinga yetu vene, ndele okombinga yaKristus Jesus e li Omwene. Fye ovapiya veni omolwaJesus.
6 Osheshi Kalunga okwa tile: “Ouyelele nau minikile momilaulu.” Okwa minikila momitima detu, nouyelele oo otau yandje eshiivo likumwifi kombinga yaye okupitila muKristus.*
7 Nonande otwa fa oitoo yedu, otwa humbata emona olo, naasho otashi ulike kutya otu na eenghono di dule dopaushitwe odo da dja kuKalunga, ndele inadi dja mufye vene.
8 Ohatu shakeneke omaupyakadi e lili noku lili, ndele ihatu sholola; hatu kala twa ngwangwana, ndele otu na eteelelo.
9 Ohatu hepekwa, ndele inatu ekelwashi; hatu dengwa, ndele ohatu xupu.
10 Ohatu lididimikile omaudjuu a kwata moiti a faafana naao Jesus e lididimikila, opo shi yandje oumbangi kovanhu kutya ohatu mono oixuna ngaashi Jesus.
11 Nonande otu na omwenyo, eemwenyo detu alushe odi li moshiponga molwaashi otu li ovashikuli vaJesus, naasho ohashi yandje oumbangi kovanhu kutya ohatu mono oixuna ngaashi Jesus.
12 Ohatu kala twa taalela efyo omolwoilonga yetu yokuudifa, ndele otamu ka mona omwenyo omolwayo.
13 Omishangwa oda ti: “Ondi na eitavelo nomolwaasho handi popi.” Nafye ohatu ulike kutya otu na yo eitavelo nomolwaasho hatu popi,
14 notu shi shii kutya oo a nyumuna Jesus nafye ote ke tu nyumuna yo tu ka kale pamwe naJesus.
15 Oinima oyo oya ningwa omolweni opo efilonghenda laKalunga li hapupale, osheshi ohali hapupala ngeenge ovanhu vahapu tava tange Kalunga noku mu pandula.
16 Onghee hano, nonande ounhu wetu wokombada otau nyonauka po, itatu sholola, molwaashi ounhu wetu womeni otau pepalekwa efiku nefiku.
17 Nonande ohatu shakeneke omaudjuu,* omaudjuu oo oopakafimbo noinaa kwata moiti, notae tu etele efimano linene nomwenyo waalushe.
18 Onghee ihatu yandje elitulemo koinima oyo i wetike, ndele okoinima oyo ihe wetike. Osheshi oinima oyo i wetike oyopakafimbo, ndele ei ihe wetike otai kalelele.
Eshangelo lopedu
^ Ile “oya uvikwa.”
^ Ile “konghalelo ei yoinima.” Tala omafatululo oitya.
^ Eln., “okupitila moshipala shaKristus.”
^ Ile “omayeleko.”
