Embo etivali lOvakorinto 5:1-21
5 Otu shi shii kutya eumbo letu lokombada yedu, etwali eli, otali ka hanauka po, ndele Kalunga ote ke tu pa eumbo meulu olo tali kalelele, olo inali tungwa nomake.
2 Eshi tu li meumbo* eli, ohatu keme molwaashi otwa halelela okupewa eumbo lomeulu tu li djale ngaashi oikutu,
3 opo ngeenge otwe li djala, itatu ka hangika hamunghele.
4 Fye ava tu li metwali eli ohatu keme notwa wililwa po molwaashi inatu hala oku li dula mo, ndele otwa hala okudjala likwao opo olutu olo hali fi li pingenwe po komwenyo waalushe.
5 Kalunga oye e tu longekidila oinima aishe oyo, nokwe tu pa omhepo iyapuki. Kungaho okwe tu shilipaleka kutya ote ke tu pa omanangeko noupuna.
6 Otu shi shii kutya fimbo tu li meumbo letu lopalutu, katu li pamwe nOmwene, ndele otu na elineekelo
7 osheshi ohatu ende metwokumwe neitavelo, ndele hametwokumwe naasho tu wete.
8 Otu na elineekelo filufilu notwa hala okudja mo molutu eli opo tu ka kale meumbo letu pamwe nOmwene.
9 Onghee hano, kashi na nee mbudi kutya otu li peni, kutya nee otu li naye ile hasho, otwa hala okushilipaleka alushe kutya otwa hokiwa kuye.
10 Osheshi atusheni ohatu ka holoka kolukalwatokolo laKristus opo keshe umwe a pewe ondjabi yaye she likolelela koilonga oyo a longa fimbo a li molutu eli, kutya nee oiwa ile oii.
11 Molwaashi otu shi shii kutya otu na okutila Omwene, otu na okutomha ovanhu va itavele osho hatu va hongo. Fye otu shiivike nawa kuKalunga. Onde lineekela nanye* omwa didilika kutya fye ovanhu va tya ngahelipi.
12 Inatu hala vali okulitanga omolweni, ndele ohatu mu pe omhito mu litange omolwetu opo mu dule okunyamukula ovo have litangele eholokepo lokombada, ndele hashosho shi li momutima.
13 Ngeenge otwe shi ninga twa fa tuhe li nawa momitwe, otwe shi ninga omolwaKalunga, nongeenge otwe shi ninga tu na omadiladilo e li ponhele, omolwouwa weni.
14 Ohole yaKristus otai tu fininike osheshi otu shi shii kutya omunhu umwe okwa fya omolwovanhu aveshe molwaashi aveshe ova fya.
15 Ndele okwa fila ovanhu aveshe opo ovo ve na omwenyo vehe liwapalele vali vo vene, ndele va wapalele Kristus oo e va fila nokwa nyumunwa.
16 Paife ihatu tale ko vali ovanhu pataleko lopanhu. Nonande nale otwa li twa tala ko Kristus pataleko lopanhu, paife hasho vali twe mu tala ko ngaho.
17 Onghee hano, ngeenge ope na ou e na ekwatafano naKristus, okwa ninga eshito lipe; taleni, eshi shikulu osha xula po nope uya osho shipe.
18 Oinima aishe oya dja kuKalunga, oo e tu hanganifa naye mwene okupitila muKristus, nokwe tu pa oshilongayakulo shokuhanganifa.
19 Osho osha hala okutya Kalunga ota longifa Kristus opo a hanganife ovanhu naye mwene, noite va valulile vali omatimba avo. Nokwe tu pa oshilonga shokulombwela ovanhu kutya otava dulu okuhangana naYe.
20 Onghee hano, tu li ovakalelipo vaKristus, ohatu mu indile hatu ti: “Hanganifweni naKalunga.” Kalunga oye ta ningi eindilo la tya ngaho okupitila mufye.
21 Oo ehe fi omulunde okwa ninga omulunde* omolwetu opo tu kale ovayuki koshipala shaKalunga okupitila muye.
