Samuel omutivali 10:1-19
-
Ovaamoni nOvasiria tava findwa (1-19)
10 Lwanima, ohamba yOvaammoni oya fya, nomonamati wayo, Hanun, okwa ninga ohamba ponhele yayo.
2 Opo nee David okwa tya: “Ohandi ka ulikila Hanun, omonamati waNahas, ohole i na oudiinini, ngaashi xe a ulikila nge ohole i na oudiinini.” Onghee David okwa tuma ovapiya vaye ve ke mu hekeleke omolwefyo laxe. Ashike eshi ovapiya vaDavid va ya kedu lOvaammoni,
3 omalenga Ovaammoni okwa tya komwene wavo Hanun: “Mbela oto diladila kutya David okwa fimaneka xo, eshi e ku tumina ovahekeleki? Ku shi shii kutya David okwe ku tumina ovapiya vaye va konakone oshilando, ve shi ndaade, opo e shi hanaune po?”
4 Onghee Hanun okwa kufa ovapiya vaDavid, ndele te va kulula eendjedi kombinga imwe, nokwa teta oikutu yavo okudja komatako okuyuka pedu, ndele te va lekele.
5 Eshi ohamba David ye shi uda, oya tuma ovalumenhu ve ke va shakeneke, molwaashi ova li va fifwa ohoni neenghono, nohamba oye va lombwela ya ti: “Kaleni muJeriko fiyo eendjedi deni da mena, ndele tamu shuna.”
6 Mokweendela ko kwefimbo, Ovaammoni ova mona kutya David okwe va tonda. Onghee ova tuma nova kuta Ovasiria vokuBet-rehob nOvasiria vokuSoba, ovakwaita vokolupadi 20 000, nohamba Maaka pamwe novalumenhu 1 000; nokuIshtob,* okwa dja ovalumenhu 12 000.
7 Eshi David e shi uda, okwa tuma Joab netangakwaita alishe, mwa kwatelwa ovakwaita ovanaenghono.
8 Ovaammoni ova ya, nova li va fikama poshivelo shoshilando, ve lilongekidila olwoodi, ofimbo Ovasiria vokuSoba novokuRehob, pamwe naIshtob* nosho yo Maaka, va li ovo aveke moixwa.
9 Eshi Joab a mona kutya omatangakwaita oku li poku va ponokela taa dilile komesho nokonima, okwa hoolola omatangakwaita amwe, oo a denga mbada muIsrael, ndele te lilongekidile olwoodi noku ka shakeneka Ovasiria.
10 Okwa yandja ovalumenhu vakwao mepashukilo* lomumwaina Abisai, opo e va longekidile olwoodi va ka lwife Ovaammoni.
11 Opo nee okwa tya: “Ngeenge Ovasiria ova dulu nge eenghono, ou na okuuya u kwafele nge. Ashike ngeenge Ovaammoni ove ku dulu eenghono, ohandi uya ndi ku kwafele.
12 Otu na okukala twa pama notu na ouladi omolwoshiwana shetu nomolwoilando yaKalunga ketu, na Jehova ota ka ninga osho tashi mu wapalele.”
13 Opo nee Joab novakwaita vaye ova ya va ka shakeneke Ovasiria molwoodi, nOvasiria ove va faduka po.
14 Eshi Ovaammoni va mona kutya Ovasiria ova faduka po, navo ova faduka po Abisai, ndele tava i moshilando. Eshi Joab a aluka kolwoodi, olo va li tava lu nOvaammoni, okwa ya kuJerusalem.
15 Eshi Ovasiria va mona kutya ova findwa kOvaisrael, ova ongala vali pamwe.
16 Onghee Hadadeser okwa tuma a ifanenwe Ovasiria koshitukulwa shomulonga,* ndele tava i kuHelam, pamwe naSobak, ondjai yetangakwaita laHadadeser, te va wilike.
17 Eshi David e shi shiivifilwa, okwa ongela diva Ovaisrael aveshe, ndele tava tauluka omulonga waJordan nokuya kuHelam. Ovasiria ova li ve lilongekidila olwoodi va ka shakeneke David noku mu lwifa.
18 Onghee Ovasiria ova faduka po Ovaisrael, na David okwa dipaa ovo va londa komatemba 700 novalondinghambe Ovasiria 40 000, nokwa dipaela oko Sobak, ondjai yetangakwaita lavo.
19 Eshi eehamba adishe, ovapiya vaHadadeser, da mona kutya oda findwa kOvaisrael, oda panga ombili diva nOvaisrael, noda kala koshi yepangelo lavo; Ovasiria ova li va tila okukwafela Ovaammoni.
Eshangelo lopedu
^ Ile “ovalumenhu vokuTob.”
^ Ile “novalumenhu vokuTob.”
^ Eln., “meke.”
^ Sha hala okutya, Eufrat.
