Samuel omutivali 20:1-26
20 Opa li omulumenhu umwe womhote* wedina Sheba, omonamati waBikri, Omubenjamin. Okwa shika enghuma, ndele ta ti: “Katu na oshitukulwa shasha muDavid nokatu na oshitukulwafyuululo momonamati waIsai. Israel, keshe umwe na shune kookalunga* vaye!”
2 Opo nee ovalumenhu aveshe vaIsrael ova efa po okushikula David, ndele tava shikula Sheba, omonamati waBikri. Ashike ovalumenhu vokuJuda ova twikila okushikula ohamba yavo, okudja kuJordan fiyo okuJerusalem.
3 Eshi ohamba David ye uya keumbo* layo muJerusalem, oya kufa ovakulukadi vayo vopomunghulo omulongo, ovo ya li ya fiya po va pashukile eumbo layo, ndele tai va tula meumbo va kale tava pashukilwa. Oya twikila oku va pa oikulya, ashike inai nangala navo nandenande. Ova kala va idililwa, fiyo osheshi va fya, nova kala ngaashi ovafiyekadi, nonande ova li ve na omushamane.
4 Ohamba oya tya kuAmasa: “Ifana ovalumenhu vokuJuda va ongale pwaame meni lomafiku atatu, ndele naave opo yo u na okukala.”
5 Onghee Amasa okwa ifana Juda va ongale pamwe, ashike ye okwe ke uya lwanima shihe fi peufwafimbo olo a tulilwa po kohamba.
6 David okwa tya kuAbisai: “Sheba, omonamati waBikri, otashi dulika e ke tu etele oupyakadi u dulife oo twa etelwa kuAbsalom. Kufa ovapiya vomwene woye u mu taatae, opo aha mone oilando i na omakuma male, ndele te tu faduka po.”
7 Onghee ovakwaita vaJoab, Ovakereti, Ovapleti nosho yo ovalumenhu aveshe ovanaenghono ova ya ve ke mu shikule; ova dja mo muJerusalem va ka shikule Sheba, omonamati waBikri.
8 Eshi ve uya popepi nemanya la kula muGibeon, Amasa okwe uya oku va shakeneka. Joab okwa li a djala oikutu yomolwoodi, neongamukonda laye ola li moshilaleko, e li homata moshiya. Eshi a ehena puAmasa, eongamukonda ola wa mo.
9 Joab okwa tya kuAmasa: “Ou li tuu nawa mumwameme?” Opo nee Joab okwa kwata eendjedi daAmasa neke laye lokolulyo a fa ngeno te mu xupita.
10 Amasa ka li ta yandje elitulemo keongamukonda olo la li meke laJoab, opo nee Joab okwe mu twa medimo, ndele omandjadja aye taa wile pedu. Ka li a pumbwa oku mu twa olutivali, okwe mu twa ashike lumwe, ndele ta fi. Opo nee Joab nomumwaina Abisai ova shikula Sheba, omonamati waBikri.
11 Umwe womovakwaita ovanyasha vaJoab okwa li a fikama puye, ndele ta ti: “Keshe oo a ama kombinga yaJoab naDavid, na shikule Joab!”
12 Efimbo alishe olo, Amasa okwa kala a nangala mohonde yaye mokati kondjila. Eshi omulumenhu a mona kutya ovanhu aveshe otava kanghama, okwa kufa mo Amasa mondjila. Okwe mu uvika noshikutu, molwaashi okwa mona kutya aveshe ovo va li tava ende puye, ova li tava kanghama.
13 Konima eshi e mu kufa mo mondjila, ovalumenhu aveshe ova shikula Joab, opo va ka taatae Sheba, omonamati waBikri.
14 Sheba okwa pita moitukulwa aishe yomapata aIsrael a yuka kuAbel shaBet-maaka. Ovabikri ova li va ongala pamwe, ndele navo tave mu shikula.
15 Joab novakwaita* vaye ove uya, ndele tava fitikinine Sheba muAbel shaBet-maaka, osho sha li sha dingililwa konduba yomadu. Ove shi ningila ekondeka londuba yomadu, opo va dule oku shi ponokela. Ovalumenhu aveshe ovo va li pamwe naJoab ova li tava ngumuna ekuma, opo ve li ufe po.
16 Omukainhu umwe omunaendunge okwa ingida okudja moshilando ta ti: “Ovalumenhu nye! Pwilikineni! Alikana lombweleni Joab tamu ti, ‘Ila oku, ndi popye naave.’”
17 Onghee okwa ya popepi naye, nomukainhu okwe mu pula a ti: “Oove Joab?” Okwa nyamukula a ti: “Heeno, aame.” Omukainhu okwa tya kuye: “Pwilikina keendjovo domupiya woye.” Okwa ti: “Eewa, onda pwilikina.”
18 Okwa weda ko a ti: “Monale, ova li alushe hava ti, ‘Nava pule muAbel,’ noupyakadi opo hau xulile opo.’
19 Ondi lile po Ovaisrael ovanambili novadiinini. Owa hala okuhanauna po oshilando osho shi li ngaashi omudalakadi muIsrael. Omolwashike wa hala okuhanauna po* efyuululo laJehova?”
20 Joab okwa nyamukula a ti: “Itandi dulu nandenande oku shi hanauna po.
21 Osho hasho nandenande nda hala okuninga. Kakele kaasho, omulumenhu Sheba, omonamati waBikri, a dja koshitukulwa shokeemhunda shaEfraim, okwa tukululila oshibofa* ohamba David. Ngeenge omwa pe nge omulumenhu oo, itandi ka ponokela oshilando.” Opo nee omukainhu okwa tya kuJoab: “Tala, omutwe waye otau ka ekelwa kwoove kombada yekuma!”
22 Omukainhu oo omunaendunge okwa ya kovanhu aveshe, novanhu ovo ova teta ko omutwe waSheba, omonamati waBikri, ndele tave u ekele kuJoab. Konima yaasho, Joab okwa shika enghuma, ndele tava di po poshilando, keshe umwe a yuka keumbo laye, na Joab okwa shuna kohamba kuJerusalem.
23 Joab okwa li ta pashukile etangakwaita alishe laIsrael; Benaia, omonamati waJehoiada, okwa li ta wilike Ovakereti nOvapleti.
24 Adoram okwa li a ifanwa a longele ohamba; Josafat, omonamati waAhilud, okwa li omushangi wondjokonona.
25 Sheva okwa li hamushanga; Sadok naAbjatar ova li ovapristeri.
26 Ira, Omujair, okwa li yo a ninga elenga ekulunhu* laDavid.
Eshangelo lopedu
^ Ile “omunashibofa.”
^ Ile tashi dulika, “komatwali.”
^ Ile “kombala.”
^ Eln., “navo.”
^ Eln., “pona po.”
^ Eln., “yelulila eke laye.”
^ Eln., “okwa ninga omupristeri.”
