Samuel omutivali 21:1-22
21 Pefimbo laDavid opa li ondjala oule weedula nhatu da shikulafana, na David okwa pula ekwafo kuJehova, ndele Jehova ta ti: “Saul oku na etimba lohonde nosho yo eumbo laye, molwaashi okwa dipaa Ovagibeon.”
2 Opo nee ohamba oya ifana Ovagibeon, ndele tai popi navo. (Ovagibeon ovo kava li Ovaisrael, ashike Ovaamori ovo va xupa po, nOvaisrael ova li va ana kutya otave va xupifa, ashike Saul okwa li a tokola oku va dipaa omolwouladi wokwaamena oshiwana shaIsrael noshaJuda.)
3 David okwa tya kOvagibeon: “Nandi mu ningile shike, nongahelipi handi dulu okukufa po etimba lohonde, opo mu nangeke noupuna oshiwana* shaJehova?”
4 Ovagibeon ova tya kuye: “Itatu pula oshisilveri, ile oshingoli omolwoshinima osho Saul neumbo laye ve tu ningila, noitatu dulu okudipaa nande omunhu umwe muIsrael.” Onghee okwa tya kuvo: “Keshe osho tamu popi, ohandi ke shi mu ningila.”
5 Ova tya kohamba: “Omulumenhu oo a li ta kendabala oku tu xulifa po nokwa pangela omhangela, opo moshitukulwa shOvaisrael muha fyaale nande oumwe womufye,
6 natu pewe ovanamati vaye vaheyali. Ohatu ke va dipaa nokweendjelelifa omidimba davo* koshipala shaJehova muGibea shaSaul, oo a hoololwa kuJehova.” Ohamba oya tya: “Ohandi va yandje kunye.”
7 Onghee ohamba oya li ya kenukila Mefiboset, omonamati waJonatan, omonamati waSaul, omolweano olo la ningwa moipafi yaJehova pokati kaDavid naJonatan, omonamati waSaul.
8 Ohamba oya kufa Armoni naMefiboset, ovanamati vavali vaRispa, omonakadona waAia, ovo a dalela Saul, nosho yo ovanamati vatano vaMikal,* omonakadona waSaul, ovo a dalela Adriel, omonamati waBarsillai, Omumeholati.
9 Opo nee okwe va yandja kOvagibeon, ndele tave va dipaa noku va endjelelifa pomhunda moipafi yaJehova. Aveshe vaheyali ova fila pamwe nova li va dipawa pehovelo lomafiku okuteya, sha hala okutya, pehovelo leteyo loilya yo-barley.
10 Rispa, omonakadona waAia okwa kufa eeshako, ndele te di yale komamanya, okudja pehovelo leteyo fiyo osheshi odula ya hovela okuloka omidimba odo; ina efa eedila dokeulu di wile komidimba odo omutenya, noina efa oifitukuti i ehene popepi nado oufiku.
11 David okwa li a lombwelwa osho omukulukadi waSaul wopomunghulo, Rispa, omonakadona waAia, a ninga.
12 Opo nee David okwa ya, nokwa kufa ko omakipa aSaul nomakipa omonamati waye, Jonatan, kovakulunhu* vomuJabes-gilead, ovo ve a vaka momapandavanda aBet-san omo Ovafilisti va li ve va mangeleka mefiku olo Ovafilisti va dipaela Saul komhunda yaGilboa.
13 Okwa kufa ko omakipa aSaul nomakipa omonamati waye Jonatan nova kufa ko yo omakipa ovalumenhu ovo va li va dipawa.*
14 Omakipa aSaul noomonamati waye Jonatan ove a paka medu laBenjamin muSela, mombila yaKish, xe yaSaul. Konima eshi va ninga ashishe osho va lombwelwa kohamba, Kalunga okwa pwilikina eindilo lavo li na sha nedu.
15 Natango, opa li vali oita pokati kOvafilisti nOvaisrael. Opo nee David novapiya vaye ova li va ya, ndele tava lwifa Ovafilisti, ashike David okwa li a loloka neenghono.
16 Umwe womoludalo laRefaim wedina Isbi-benob, oo a li e na eonga longopolo li na ondjudo yeesekeli 300,* nokwa li a homata eongamukonda lipe, okwa li a hala okuponokela David.
17 Opo nee Abisai, omonamati waSerua, okwe mu kwafela diva, nokwa ponokela Omufilisti, ndele te mu dipaa. Pefimbo opo, ovakwaita vaDavid ove mu anena va ti: “Ku na vali okuya pamwe nafye kolwoodi! Ku na okudima olamba yaIsrael!”
18 Konima yaasho, Ovafilisti ova ka hangwa vali koita puGob. Pefimbo opo Sibbekai, Omuhusai, okwa dipaa Saf womoludalo laRefaim.
19 Natango, Ovafilisti ova li va hangwa koita puGob, na Elhanan, omonamati waJaare-orgim, Omubetlehem, okwa dipaa Goliat, Omugat, oo a li e na eonga li na oshikwatelo shi fike poshiti shovanduluki voiyata.
20 Natango, opa li pa holoka oita puGat, opo pa li omulumenhu umwe mule nomunene neenghono e na ominwe 6 konyala keshe, noku na ominwe 6 komhadi keshe, kumwe adishe odi li 24; omulumenhu oo naye okwa li womoludalo laRefaim.
21 Okwa kala ha sheke Israel. Onghee Jonatan, omonamati waSimei, omumwaina waDavid, okwe mu dipaa.
22 Aveshe ovo vane ova li vomoludalo laRefaim muGat, nova dipawa kuDavid nokovapiya vaye.
Eshangelo lopedu
^ Eln., “efyuululo.”
^ Eln., “ohandi ke va endjelelifa,” sha hala okutya, omaoko nosho yo omaulu avo a tekauka.
^ Ile tashi dulika, “Merab.”
^ Ile tashi dulika, “koovene vedu.”
^ Eln., “va endjelelifwa.”
^ Eekilograma 3,42 lwaapo. Tala Oshiwedelwako B14.
