Samuel omutivali 9:1-13
-
David ta ulikile Mefiboset ohole i na oudiinini (1-13)
9 David okwa pula a ti: “Mbela opa xupa vali umwe womepata laSaul, oo handi dulu okuulikila ohole i na oudiinini omolwaJonatan?”
2 Opa li omupiya umwe womepata laSaul wedina Siba. Onghee ove mu ifana e uye kohamba David, noye mu pula ya ti: “Oove Siba?” Okwa nyamukula a ti: “Heeno omwene wange, aame.”
3 Ohamba oya twikila ko ya ti: “Mbela ope na nande oumwe a xupa po womepata laSaul, oo handi dulu okuulikila ohole yaKalunga i na oudiinini?” Siba okwa nyamukula ohamba a ti: “Ope na natango omonamati waJonatan; okwa lemana keemhadi adishe.”
4 Ohamba oye mu pula ya ti: “Oku li peni?” Siba okwa nyamukula ohamba a ti: “Oku li kuLo-debar, meumbo laMakir, omonamati waAmmiel.”
5 Opo nee ohamba David oye mu tuma ko diva, ndele ta kufwa ko kuLo-debar keumbo laMakir, omonamati waAmmiel.
6 Eshi Mefiboset, omonamati waJonatan, omonamati waSaul, e uya kuDavid, okwe linyongamena diva pedu, ndele ta nangala eombe. David okwa ti: “Mefiboset!” Opo nee okwa nyamukula a ti: “Omupiya woye oye ou.”
7 David okwa tya kuye: “Ino tila, ohandi ke ku ulikila filufilu ohole i na oudiinini omolwaxo, Jonatan. Ohandi ke ku shunifila edu alishe laxokulu Saul, noto ka kala alushe to li* poshitaafula shange.”
8 Eshi e shi uda, okwe linyongamena pedu, ndele ta ti: “Omupiya woye oye lyelye, opo u yandje elitulemo* komupiya woye oo e li ngaashi ombwa ya fya?”
9 Ohamba oya tuma i ifanenwe Siba, omupiya waSaul, ndele tai ti kuye: “Oinima aishe oyo ya li yaSaul neumbo laye alishe, ohandi i yandje komutekulu womwene woye.
10 Ove, ovanamati voye novapiya voye, otamu ka longa epya laye, ndele tamu ka ongela oilikolomwa yomepya olo, notamu ke i pa ovapambele vomutekulu womwene woye va lye. Ashike Mefiboset, omutekulu womwene woye, ota ka lya alushe poshitaafula shange.”
Siba okwa li e na ovanamati 15 novapiya 20.
11 Opo nee Siba okwa tya kohamba: “Omupiya woye ota ka ninga ashishe osho a lombwelwa a ninge komwene waye ohamba.” Onghee Mefiboset okwa kala ha li poshitaafula shaDavid* e li ngaashi umwe womovanamati vohamba.
12 Mefiboset okwa li yo e na omonamati munini wedina Mikka, novanhu aveshe ovo va li meumbo laSiba ova ninga ovapiya vaMefiboset.
13 Eshi Mefiboset a kala muJerusalem, okwa kala alushe ha li poshitaafula shohamba; okwa li a lemana keemhadi adishe.
Eshangelo lopedu
^ Eln., “to ka lya omungome.”
^ Eln., “u taalelife oshipala.”
^ Ile tashi dulika, “shange.”
