Deuteronomion 18:1-22
18 “Ovapristeri Ovalevi nepata alishe lOvalevi, itali ka pewa oshitukulwa, ile efyuululo pamwe naIsrael. Otava ka lya omayambo, oo a yambelwa Jehova okupitila momundilo, e li efyuululo laye.
2 Itava ka mona efyuululo mokati kovamwaxe. Jehova oye efyuululo lavo, ngaashi ashike e va lombwela.
3 “Oinima oyo ovanhu ve na okuyandja kovapristeri oyo ei: Ngeenge omunhu ta yandje eyambo, kutya nee ongobe yomhedi, ile odi, oku na okupa omupristeri oshipepeti, eehamama netangala.
4 Oilya yeni oyo ya pya tete, omaviinyu eni mape, omaadi eni nosho yo olududi leedi olo mwa kulula ko tete keedi deni, omu na oku i yandja kuye.
5 Jehova, Kalunga keni, okwa hoolola omupristeri oo pamwe novanamati vaye, momapata eni aeshe, va yakule alushe medina laJehova.
6 “Ashike ngeenge Omulevi okwa di mo mushimwe shomoilando yeni, oyo i li muIsrael omo a kala ha di, nokwa* hala okuya konhele oyo Jehova a hoolola,*
7 oku na okuyakula konhele oyo medina laJehova, Kalunga kaye, ngaashi ovamwaxe aveshe, Ovalevi, ovo tava yakula moipafi yaJehova.
8 Oku na okupewa oikulya i fike pamwe noyavo, tai wedwa koinima oyo a mona, eshi a landifa po efyuululo laye.
9 “Ngeenge omwa i medu olo Jehova, Kalunga keni, te mu pe, inamu hopaenena oilonga itondifa yoiwana oyo.
10 Mokati keni inamu kala nande oumwe oo ta endifa omonamati waye, ile omonakadona waye momundilo, omunyanekeli, omhulile, omunhu oo ha tale momukonda, omulodi,
11 omunhu oo ha fingaele vamwe, omunhu oo ha pula ekwafo kovanhu ovo hava kwatafana neemhepo, ile kovaxunganeki vonakwiiwa, ile ha kongo ekwafo koonakufya.
12 Ovanhu ovo hava longo oinima oyo ova tondifa kuJehova, nomolwoilonga oyo itondifa, Jehova, Kalunga keni, ote ke va taataa mo moipafi yeni.
13 Omu na okukala mwa koshoka filufilu koshipala shaJehova, Kalunga keni.
14 “Osheshi oiwana oyo tamu taataa mo oya li hai pwilikine keemhulile nokovanyanekeli, ashike Jehova, Kalunga keni, ine mu pitika mu longe oshinima sha tya ngaho.
15 Jehova, Kalunga keni, ote ke mu pa omuprofeti ngaashi ame, ta di mokati kovamwaxo. Omu na okupwilikina kuye.
16 Jehova, Kalunga keni, okwa nyamukula osho mwe mu indila muHoreb mefiku loshoongalele,* eshi mwa ti: ‘Ino tu efa tu ude ondaka yaJehova, Kalunga ketu, ile tu mone vali omundilo oo munene, opo tuha fye.’
17 Opo nee Jehova okwa lombwela nge, a ti: ‘Osho va popya oshiwa.
18 Ohandi ke va pa omuprofeti e ku fa, tadi mokati kovamwaxe, nohandi ka tula eendjovo dange mokanya kaye, ndele ye ote ke va lombwela ashishe osho nde mu lombwela.
19 Ohandi ka katukila onghatu filufilu omunhu oo ita pwilikine keendjovo dange odo ta ka popya medina lange.
20 “‘Ngeenge omuprofeti okwa popi kuye mwene ondjovo medina lange, oyo inandi mu lombwela a popye, ile a popi medina lookalunga vamwe, omuprofeti oo oku na okufya.
21 Ndele otashi dulika mu lipopile momitima deni kutya: “Ohatu ka shiiva ngahelipi kutya Jehova haye a popya ondjovo oyo?”
22 Ngeenge omuprofeti okwa popi medina laJehova, ndele ondjovo oyo inai wanifwa, Jehova haye a popya ondjovo oyo. Omuprofeti oo okwa popya kuye mwene. Inamu mu tila.’
Eshangelo lopedu
^ Ile “nomwenyo waye.”
^ Sha hala okutya, onhele oyo Jehova a hoolola i li ondingandinga yelongelokalunga.
^ Ile “lokwoongala.”
