Deuteronomion 27:1-26
27 Moses pamwe novakulunhu vaIsrael okwa lombwela ovanhu, ta ti: “Diinineni oipango aishe oyo handi mu lombwele nena.
2 Mefiku olo tamu tauluka omulonga waJordan, mwa finda medu olo Jehova, Kalunga keni, te mu pe, dikeni omamanya makula, ndele tamu a kolonga.*
3 Ngeenge mwa tauluka, komamanya oo shangeni ko eendjovo adishe odo di li mOmhango ei, opo mu dule okuya medu olo Jehova, Kalunga keni, te mu pe, edu tali kunguluka omashini nomaadi eenyiki, ngaashi ashike Jehova, Kalunga kooxokulululwa, e mu udanekela.
4 Ngeenge mwa tauluka omulonga waJordan, omu na okudika omamanya oo komhunda yaEbal, ndele tamu a kolonga,* ngaashi ashike handi mu lombwele nena.
5 Omu na yo okutungila ko Jehova, Kalunga keni, oaltari yomamanya. Omamanya oo kamu na oku a teta noilongifo ya longwa moshivela shilaula.
6 Oaltari yaJehova, Kalunga keni, aishe omu na oku i tunga nomamanya, ndele tamu yambele ko omaxwikiloyambo aJehova, Kalunga keni.
7 Omu na okuyamba omayambo oukumwe, ndele tamu a lile oko, notamu ka kala mwa hafa moipafi yaJehova, Kalunga keni.
8 Komamanya oo shangeni ko eendjovo adishe dOmhango ei da yela nawa.”
9 Opo nee Moses novapristeri Ovalevi ova popya nOvaisrael aveshe, tava ti: “Israel, ngungumana nokupwilikina. Nena eli omwa ninga oshiwana shaJehova, Kalunga keni.
10 Omu na okupwilikina kondaka yaJehova, Kalunga keni, nokudulika koipango yaye nokomaufomhango aye, oo handi mu lombwele nena.”
11 Moses okwa lombwela ovanhu mefiku olo, ta ti:
12 Omapata aa taa shikula otaa ka kala ofika komhunda yaGerisim a nangeke noupuna ovanhu, ngeenge mwa tauluka omulonga waJordan: Simeon, Levi, Juda, Isaskar, Josef naBenjamin.
13 Omapata aa taa shikula otaa ka fikama komhunda yaEbal nokuhepaulula efingo: Ruben, Gad, Asser, Sebulon, Dan naNaftali.
14 Ovalevi otava ka nyamukula ovalumenhu aveshe vomuIsrael nondaka yopombada tava ti:
15 “‘Omufingwa omunhu oo ha hongo oihongwafano, ile ha hambula oihongwafano moivela,* oshinima osho shitondifa kuJehova, onghulungu oyo hai longo oilonga yokomake* nohe i holeke.’ (Opo nee ovanhu aveshe otava ka nyamukula tava ti: ‘Amen!’*)
16 “‘Omufingwa omunhu oo ha ungaunga naxe, ile naina nodino.’ (Opo nee ovanhu aveshe otava ka tya: ‘Amen!’)
17 “‘Omufingwa omunhu oo ta lundulula edidiliko longaba yamushiinda shaye.’ (Opo nee ovanhu aveshe otava ka tya: ‘Amen!’)
18 “‘Omufingwa omunhu oo ta ningifa omupofi a puke mo mondjila yaye.’ (Opo nee ovanhu aveshe otava ka tya: ‘Amen!’)
19 “‘Omufingwa omunhu oo ha pengifa etokolo lovanailongo, lounona ovo vehe na ooxe,* ile lovafiyekadi.’ (Opo nee ovanhu aveshe otava ka tya: ‘Amen!’)
20 “‘Omufingwa omunhu oo ta nangala nomukulukadi waxe, osheshi okwa fifa xe ohoni.’ (Opo nee ovanhu aveshe otava ka tya: ‘Amen!’)
21 “‘Omufingwa omunhu oo ta nangala noshinamwenyo keshe.’ (Opo nee ovanhu aveshe otava ka tya: ‘Amen!’)
22 “‘Omufingwa omunhu oo ta nangala nomumwainakadona, a dalwa kuxe, ile kuina.’ (Opo nee ovanhu aveshe otava ka tya: ‘Amen!’)
23 “‘Omufingwa omunhu oo ta nangala nainamweno.’ (Opo nee ovanhu aveshe otava ka tya: ‘Amen!’)
24 “‘Omufingwa omunhu oo ta nangele nokudipaa mushiinda shaye.’ (Opo nee ovanhu aveshe otava ka tya: ‘Amen!’)
25 “‘Omufingwa omunhu oo ha tambula ombubo, opo a dipae omunhu oo ehe na etimba.’* (Opo nee ovanhu aveshe otava ka tya: ‘Amen!’)
26 “‘Omufingwa omunhu oo iha diinine eendjovo dOmhango ei noku di wanifa po.’ (Opo nee ovanhu aveshe otava ka tya: ‘Amen!’)
Eshangelo lopedu
^ Ile “tamu a pleistele nomunhoko.”
^ Ile “tamu a pleistele nomunhoko.”
^ Ile “oikalunga ya hemunwa.”
^ Ile “omulongi womiti noivela.”
^ Ile “Nashi kale ngaho.”
^ Ile “eefiye.”
^ Ile “omwenyo uhe na etimba.”
