Deuteronomion 4:1-49
4 “Akutu, Israel, pwilikineni komaufomhango nomatokolo oo handi mu hongo mu a diinine, opo mu kale nomwenyo, nomu dule okuya mu ka kale medu olo Jehova, Kalunga kooxokulululwa, te mu pe.
2 Meendjovo odo handi mu lombwele inamu weda mo sha noinamu kufa mo sha, opo mu dule okudiinina oipango yaJehova, Kalunga keni, oyo handi mu lombwele.
3 “Omwa mona nomesho eni osho Jehova a li a ninga omolwaBaal womuPeor. Jehova, Kalunga keni, okwa hanauna po ovanhu aveshe mokati keni ovo va li va longela Baal womuPeor.
4 Ndele ovo mwa kala ovadiinini kuJehova, Kalunga keni, amushe omu na omwenyo fiyo opaife.
5 Taleni, onde mu pa omaufomhango noku mu honga omatokolo, ngaashi naanaa Jehova, Kalunga kange, a lombwela nge, opo mu ke a diinine medu omo tamu ka kala.
6 Kaleni noku a diinina filufilu, molwaashi kungaho otamu ka ulika kutya omu na ounongo neendunge moipafi yovanhu ovo tava ka uda omaufomhango aeshe oo. Opo nee otava ka tya: ‘Oshiwana eshi shinene oshi na filufilu ounongo neendunge.’
7 Mbela ope na ngoo oshiwana shinene osho ookalunga kasho ve li popepi nasho ngaashi Jehova, Kalunga ketu, he tu nyamukula ngeenge hatu mu ilikana?
8 Oshiwana vali shilipi shinene shi na omaufomhango e li pauyuki nomatokolo ngaashi eemhango adishe odo handi mu pe nena eli?
9 “Kala wa lungama nokulipashukila nawa,* opo uha dimbwe oinima oyo wa mona nomesho noiha dje mo momutima woye mokukalamwenyo kwoye akushe. Ou na yo oku i honga ovana voye novatekulu voye.
10 Mefiku olo wa li wa fikama koshipala shaJehova, Kalunga koye, muHoreb, Jehova okwa lombwela nge, a ti: ‘Ongela ovanhu pwaame va ude eendjovo dange, opo ve lihonge okukala hava tila nge mokukalamwenyo kwavo akushe kombada yedu, nova dule yo okuhonga ovana vavo.’
11 “Onghee omwa li mwe uya popepi nomwa fikama pefina lomhunda, nomhunda oya li tai lundumuka* omundilo wa twa keulu; okwa li ku na oilemo nomilaulu, kwa laula fokofoko.
12 Jehova okwa li a hovela okupopya nanye okupitila momundilo. Omwa uda eendjovo daye, ndele inamu mu mona komudidi, ewi ashike mwa uda.
13 Okwe mu lombwela ehangano olo li li pokati keni naye, olo e mu lombwela mu diinine, sha hala okutya, Oipango Omulongo.* Konima yaasho, okwe i shanga koipelende ivali yomamanya.
14 Jehova okwa lombwela nge pefimbo opo kutya nandi mu honge omaufomhango nomatokolo, oo mu na oku ka diinina medu omo tamu ka ya mu ka kale.
15 “Onghee, lipashukileni nawa,* molwaashi inamu mona sha mefiku olo Jehova a popya nanye muHoreb okupitila mokati komundilo,
16 opo muha nyone mokulihongela oshihongwafano shi li molupe loshinima shonhumba, molupe lomulumenhu, ile lomukainhu,
17 molupe loshinamwenyo keshe osho shi li kombada yedu, ile molupe loudila aveshe ovo hava tuka mewangadjo,
18 molupe loshinima keshe osho tashi linyenge kombada yedu, ile molupe leeshi adishe odo di li momeva kombada yedu.
19 Ndele ngeenge mwa yelula omesho mu tale keulu, ndele tamu mono etango, omwedi neenyofi, omatangakwaita aeshe okeulu, inamu pukifwa mu i twile eengolo nomu i longele. Jehova, Kalunga keni, okwe i yandja aishe kovanhu aveshe ovo ve li kombada yedu alishe.
20 Ndele Jehova okwe mu kufa muEgipiti, omo mwa li tamu hepekwa neenghono mwa fa mu li mediko la hanya lokuhemuna oshivela shilaula, mu ninge oshiwana shaye she likalekelwa,* ngaashi naanaa mu li kunena.
21 “Jehova okwa handukila nge omolweni, nokwaana kutya itandi tauluka omulonga waJordan, ile ndi ye medu liwa olo Jehova, Kalunga keni, te mu pe li li efyuululo.
22 Ame ohandi file medu eli, itandi ka tauluka omulonga waJordan, ashike nye otamu ka tauluka omulonga waJordan, nedu olo liwa otali ka ninga leni.
23 Kaleni mwa lungama muha dimbwe ehangano olo Jehova, Kalunga keni, a ninga nanye, noinamu liningila nande oshihongwafano, ile oshinima keshe osho Jehova, Kalunga keni, e mu shilika.
24 Osheshi Jehova, Kalunga keni, oku li ngaashi omundilo oo hau lungwinifa; Kalunga oo a teelela okulongelwa oye aeke.
25 “Ngeenge omwa ka kala mu na ounona novatekulu, nongeenge omwa kala efimbo lile medu olo, inamu nyona, nye inamu lihongela oshihongwafano sholudi keshe nokuninga osho inashi yuka moipafi yaJehova, Kalunga keni, opo muhe mu nyemateke,
26 ngeenge omwa ningi ngaho, aveshe ovo ve li meulu nokombada yedu otava ningi eembangi nena kutya otamu ka xulifwa po filufilu meendelelo medu olo tamu ka ya, ngeenge mwa tauluka Jordan. Itamu ka kala mo efimbo lile, ndele otamu ka hanaunwa po filufilu.
27 Jehova ote ke mu lihanifila mokati koiwana, novanini ashike vomunye tava ka xupa moiwana oyo Jehova te ke mu taataela.
28 Moiwana oyo, otamu ka longela ookalunga voiti novomamanya, ovo va ningwa kovanhu, ookalunga ovo ihava mono ko, ihava udu ko, ihava li noihava udu edimba lasha.
29 “Ngeenge omwa kongo Jehova, Kalunga keni, eshi mu li oko, otamu ke mu mona filufilu, ngeenge omwe mu kongo nomutima weni aushe nosho yo nomwenyo* weni aushe.
30 Ngeenge omwe ke lihanga moupyakadi munene nomwa ningilwa oinima aishe ei, otamu ka alukila kuJehova, Kalunga keni, notamu ka pwilikina kondaka yaye.
31 Osheshi Jehova, Kalunga keni, omunanghenda. Ite ke mu efa, ile e mu hanaune po, ile a dimbwe ehangano olo a anena ooxokulululwa.
32 “Diladileni shi na sha nefimbo lonale, eshi mwaha li po, okudja eshi Kalunga a shitila omunhu kombada yedu; puleni okudja kombinga imwe yeulu fiyo okombinga ikwao yeulu. Mbela opa ningwa ngoo nale oshinima shinene, ile pa udika oshinima sha fa eshi?
33 Mbela ope na ngoo ovanhu va uda nale ondaka yaKalunga ta popi okupitila momundilo, ngaashi mwe i uda, ndele tamu twikile okukala nomwenyo?
34 Mbela Kalunga okwa hetekela ngoo nale okulikufila oshiwana moshiwana shikwao, te shi ningi nomatokolo,* nomadidiliko, noikumwifilonga, noita, neke li na eenghono, nokwooko kwa yeluka nonoilonga itilifa, ngaashi Jehova, Kalunga keni, e shi mu ningila moipafi yeni muEgipiti?
35 Omwa ulikilwa oinima oyo, opo mu shiive kutya Jehova oye Kalunga kashili, nokape na vali umwe, kakele kuye.
36 Okwe mu ningifa mu ude ondaka yaye okudja meulu, opo e mu pukulule, nokwe mu ningifa mu mone omundilo munene kombada yedu, nomwa uda eendjovo daye okudja momundilo oo.
37 “Molwaashi okwa kala e hole ooxokulululwa, nokwa hoolola oludalo lavo olo le va shikula, okwe mu kufa mo muEgipiti neenghono daye dinene, neisho laye tali mu pashukile.
38 Okwa taataa moipafi yeni oiwana inene noi na eenghono i mu dule, opo e mu ete oku noku mu pe edu layo li li efyuululo, ngaashi shi li kunena.
39 Onghee kaleni mu shi shii noku shi koneka okudja nena eli kutya, Jehova oye Kalunga kashili meulu nokombada yedu. Kape na vali umwe.
40 Kaleni nokudiinina omaufomhango aye noipango yaye oyo handi mu lombwele nena, opo shi mu endele nawa nosho yo ovana veni, nopo mu kale efimbo lile medu olo Jehova, Kalunga keni, te mu pe.”
41 Pefimbo opo, Moses okwa hoolola oilando itatu kombinga yokoushilo womulonga waJordan.
42 Ngeenge omunhu a dipaa mukwao shihe fi oshiningilewina noina kala shito e mu tonde, oku na oku ka hondama kushimwe shomoilando oyo, opo a kale nomwenyo.
43 Oilando oyo oBeser shOvaruben, osho shi li mombuwa komhunda ya lalakana, Ramot shOvagad, osho shi li muGilead, nosho yo Golan shOvamanasse, osho shi li muBasan.
44 Ei Omhango oyo Moses a pa Ovaisrael.
45 Aa omadimbulukifo, omaufomhango nomatokolo oo Moses a lombwela Ovaisrael konima eshi va dja muEgipiti.
46 Oinima oyo okwe i va lombwelela popepi nomulonga waJordan, molufilu olo li li popepi naBet-peor, medu laSihon, ohamba yOvaamori, oo a li ha di muHesbon, oo a findwa kuMoses nOvaisrael, eshi va dja muEgipiti.
47 Opo nee ova kufa ko edu laye, nedu laOg, ohamba yaBasan, eehamba mbali dOvaamori odo da li koushilo womulonga waJordan,
48 okudja kuAroer, osho shi li komunghulo wEfilu laArnon, fiyo okomhunda Sion, sha hala okutya, Hermon,
49 naAraba ashishe, osho shi li koushilo womulonga waJordan, fiyo okefuta laAraba* olo li li pefina lomhunda yaPisga.
Eshangelo lopedu
^ Ile “nokupashukila nawa omwenyo woye.”
^ Ile “tai di.”
^ Eln., “Eendjovo Omulongo.”
^ Ile “pashukileni nawa eemwenyo deni.”
^ Ile “emona laye.”
^ Tala Omafatululo oitya.
^ Ile “nomayeleko.”
^ Sha hala okutya, Efuta lOmongwa, ile Efuta la Fya.
