Ehololo laJohannes 15:1-8
15 Onda mona edidiliko limwe vali linene nolikumwifi meulu, ovaengeli vaheyali ve kwete omahandukilo aheyali. Omahandukilo oo oo axuuninwa, molwaashi ehandu laKalunga otali ka lota okupitila muo.
2 Onda mona yo oshinima sha fa efuta, shi liwetikile sha fa ekende sha lumbakanifwa nomundilo, nonda mona ovafindani, ovo va finda oshilyani noshihongwafano shasho, nokave na edidiliko lonomola yedina lasho, ve li ofika pefuta olo ve kwete ouxumbafeta va dja kuKalunga.
3 Ova li tava imbi eimbilo laMoses omupiya waKalunga nolOdjona, tava ti:
“Jehova Kalunga, Omunaenghono adishe, oilonga yoye oinene noikumwifi. Ohamba yaalushe, eendjila doye oda yuka nodoshili.
4 Jehova, olyelye ite ku tila nokufimaneka edina loye, molwaashi oove auke omudiinini? Oiwana aishe otai ke uya nokulinyongamena koshipala shoye, shaashi oya mona kutya oho tokola pauyuki.”
5 Konima yaasho, onda mona meulu onhele iyapuki yotembeli omo mu na omalombwelo aKalunga ya yeuluka,
6 nomwa dja ovaengeli vaheyali ve na omahandukilo aheyali va djala oikutu yoliina i yela, tai vilima nove limanga omakwamo oshingoli peenhulo davo.
7 Opo nee shimwe shomoinamwenyo ine osha yandja kovaengeli vaheyali oiyaxa iheyali yoshingoli oyo ya li i yadi ehandu laKalunga, oo ta kala ko fiyo alushe.
8 Ndele monhele iyapuki omwa li tamu twimaana omwifi muhapu omolwoshinge neenghono daKalunga, nokapa li ou ta dulu okuya mo fiyo osheshi omahandukilo aheyali ovaengeli vaheyali a pwa.
