Esra 5:1-17
5 Omuprofeti Haggai naSakaria, omutekulu waIddo, ova li va xunganeka medina laKalunga kaIsrael, oo a li pamwe navo, shi na sha nOvajuda, ovo va li muJuda nomuJerusalem.
2 Opo nee Serubbabel, omonamati waSalatiel, naJesua, omonamati waJosadak, ova li va hovela okutungulula otembeli yaKalunga, oyo ya li muJerusalem, novaprofeti vaKalunga ova li pamwe navo nova li tave va yambidida.
3 Pefimbo opo, Tattenai, ngoloneya woshitukulwa osho shi li Kombada yOmulonga,* Setar-bosenai navakwao ove uya kuvo noku va pula tava ti: “Olyelye e mu lombwela mu tunge otembeli ei nokumanifa etungo eli?”
4 Natango, ove va pula tava ti: “Ovalumenhu ava tava tungu etungo eli ovo oolyelye?”
5 Ndele Kalunga okwa li ta pashukile* ovakulunhu vOvajuda, onghee kava li ve va kelela, fiyo osheshi ehokololo la tuminwa Darius, nonhumwafo i na sha naasho ya shunifwa.
6 Ei onhumwafo oyo Tattenai, ngoloneya woshitukulwa osho shi li Kombada yOmulonga, Setar-bosenai navakwao, oongoloneya, ovo ve na eendodo dopedu voshitukulwa osho shi li Kombada yOmulonga, va tumina ohamba Darius.
7 Ove mu tumina ehokololo, olo va shanga, tava ti:
“Kohamba Darius:
“Ombili nai kale naave!
8 Ohamba nai shiive kutya otwa li twa ya koshitukulwalongo shaJuda, kotembeli yaKalunga munene, notai tungwa nomamanya manene, a tulwa peenhele, nomakuma okwa tulwa oipilangi. Ovanhu ova longa oilonga nehalo liwa notai xumu komesho omolweenghendabala davo.
9 Opo nee otwa pula ovakulunhu vavo hatu ti: ‘Olyelye e mu lombwela mu tunge otembeli ei nokumanifa etungo eli?’
10 Otwe va pula yo omadina avo tu ku shiivifile, opo tu dule okushanga omadina ovalumenhu ovo tava kwatele komesho.
11 “Ove tu nyamukula va ti: ‘Fye ovapiya vaKalunga, oo ta pangele eulu nedu, nohatu tungulula otembeli, oyo ya li ya tungwa omido dihapu da pita, oyo ya li ya tungwa nokumanifwa kohamba inene yaIsrael.
12 Ndele molwaashi ootatekulululwa ova handukifa Kalunga komeulu, okwe va yandja momake ohamba Nebukadnesar yaBabilon, Omukaldea, oyo ya hanauna po otembeli ei noya twala ovanhu moukwatwa kuBabilon.
13 Kakele kaasho, momudo wotete wepangelo lohamba Kores yaBabilon, ohamba Kores oya yandja elombwelo, opo otembeli yaKalunga i tungululwe.
14 Shikwao vali, ohamba Kores oya li ya kufa oikwatelwa yoshingoli noyoshisilveri motembeli yaBabilon, ya dja motembeli yaKalunga, oyo Nebukadnesar a li a kufa motembeli muJerusalem noku i twala kotembeli kuBabilon. Oya li ya pewa omulumenhu wedina Sesbassar,* oo a li a nangekwa po kuKores e li ngoloneya.
15 Kores okwa tya kuye: “Kufa oikwatelwa ei. Inda, ndele to i twala kotembeli oyo i li muJerusalem, notembeli yaKalunga nai tungululwe ponhele apa ya li nale.”
16 Opo nee Sesbassar okwe uya nokwa dika po ekanghameno lotembeli yaKalunga, oyo i li muJerusalem, noya kala tai tungwa okudja kefiku olo fiyo opaife, ndele inai pwa natango.’
17 “Ngeenge otashi wapalele ohamba, naku ningwe omakonakono meemhungulilo domouhamba waBabilon, ku talike ngeenge ohamba Kores oya yandja tuu shili elombwelo li na sha nokutungulula otembeli yaKalunga muJerusalem, opo nee hatu tuminwa etokolo lohamba li na sha naasho.”
Eshangelo lopedu
^ Ile “shaEufrat.”
^ Eln., “eisho laKalunga kavo ola li.”
^ Tashi dulika Serubabel, muEsra 2:2; 3:8.
