Ester 7:1-10
7 Ohamba naHaman ove uya koitelekela yomumbada Ester.
2 Natango, mefiku etivali, fimbo va li tava nu omaviinyu,* ohamba oya tya kuEster: “Omumbada Ester, owa hala okuningilwa shike? Oto shi pewa. Owa hala okupula shike? Nonande etata louhamba wange, otashi ningwa.”
3 Omumbada Ester okwa nyamukula, a ti: “Ngeenge onda filwa onghenda kwoove, ohamba, nongeenge otashi wapalele ohamba, ohandi indile, opo ame nosho yo oshiwana shetu tu kale nomwenyo.
4 Fye otwa landifwa po, ame noshiwana shange, tu kombwe po, tu dipawe notu hanaunwe po. Ngeno otwa landifilwe po tu li ovapika ovalumenhu novakainhu, ngeno onde shi mwenena. Ndele oupyakadi ou kau shii okulipwililikilwa, molwaashi otau ka kuma nai ohamba.”
5 Ohamba Ahasveros oya pula omumbada Ester, ya ti: “Omunhu oo a hala okuninga oshinima osho olyelye noku li peni?”
6 Ester okwa tya: “Omunandubo nomutondi omukolokoshi ou oHaman.”
Haman okwa li a tila omolwohamba nomolwomumbada.
7 Ohamba oya fikama po pomaviinyu ya handuka neenghono, ndele tai i moshikunino shomombala, ashike Haman okwa fikama ta pula ekwafo komumbada Ester omolwomwenyo waye, molwaashi okwa didilika kutya ohamba oya li ya tokola oku mu handukila.
8 Ohamba oya dja mo moshikunino shomombala, ndele tai shuna meumbo, omo mu na omaviinyu noya mona Haman e likolelela ketyofa, oko kwa li Ester. Ohamba oya ingida ya ti: “Okwa hala yo okukwata omumbada keenghono meumbo lange?” Diva eshi ohamba ya mana okupopya eendjovo odo, ova uvika oshipala shaHaman.
9 Harbona, umwe womomalenga ohamba omombala, okwa tya: “Haman okwa longekidila yo Mordekai omuti, oo a popya oshinima osho sha xupifa ohamba. Owa dikwa keumbo laHaman, u na oule womaludimbo 50.”* Opo nee ohamba oya tya: “Mu endjelelifei ko.”
10 Ova endjelelifa Haman komuti, oo a li a longekidila Mordekai, nehandu lohamba ola li la lota.
Eshangelo lopedu
^ Eln., “fimbo va li poitendele yomaviinyu.”
^ Eemeta 22,3 lwaapo. Tala Oshiwedelwako B14.
